ການປ່ອຍຖ້ຽວບິນທົດລອງທີ່ມີນັກບິນຄັ້ງທຳອິດຂອງຍານອະວະກາດ Boeing Starliner ໄປຫາສະຖານີອະວະກາດສາກົນທີ່ໄດ້ວາງແຜນໄວ້ສຳລັບຄືນວັນຈັນວານນີ້ ໄດ້ຖືກຍົກເລີກກ່ອນການປ່ອຍຂຶ້ນ ເນື່ອງຈາກບັນຫາທາງດ້ານເທັກນິກ.
ສະມາຊິກລູກເຮືອ ທ່ານ ແບຣີ ວິລມໍ (Barry Wilmore) ແລະ ທ່ານ ນາງ ສຸນິຕາ ວິລລ້ຽມ (Sunita Williams) ຫາກໍໄດ້ເຂົ້າໄປໃນແຄບຊູນຍານອະວະກາດ ເມື່ອເຈົ້າໜ້າທີ່ຢູ່ພື້ນດິນໄດ້ຍົກເລີກການປ່ອຍຂຶ້ນ, ໂດຍຢ້ຳວ່າ ວາວປ່ອຍ ອົກຊີເຈນຢູ່ໃນຊັ້ນທີສອງຂອງຈະຫຼວດມີຄວາມບົກຜ່ອງ.
ທ່ານ ວີລມໍ (Wilmore) ແລະ ທ່ານນາງ ວີລລ້ຽມ (Williams), ເຊິ່ງເປັນນັກ ບິນອາວະກາດຜູ້ມີປະສົບການ ກັບອົງການອະວະກາດ NASA ຂອງ ສະຫະລັດ, ຈະຂັບຍານອາວະກາດ Starliner ໄປຫາສະຖານີອະວະກາດ, ບ່ອນທີ່ພວກເຂົາຈະຢູ່ທີ່ນັ້ນ ປະມານນຶ່ງອາທິດ ເພື່ອທົດສອບແຄັບຊູນ ແລະ ລະບົບຍ່ອຍໆຂອງມັນ.
ເຈົ້າຫນ້າທີ່ຂອງບໍລິສັດ United Launch Alliance, ເຊິ່ງເປັນບໍລິສັດທີ່ສ້າງ ຈະຫຼວດ Atlas V ທີ່ຈະນໍາເອົາຍານ Starliner ຂຶ້ນໄປສູ່ອາວະກາດນັ້ນ, ກ່າວວ່າ ນັກວິສະວະກອນໄດ້ຍິນສຽງດັງຫຶ່ງຈາກວາວດັ່ງກ່າວ ໃນລະຫວ່າງ ການນັບຖອຍຫລັງ ເຊິ່ງຊີ້ບອກວ່າມັນອາດເກີນປະສິດທິພາບຂອງມັນ. ບໍລິສັດໄດ້ກ່າວໃນບໍ່ເທົ່າໃດຊົ່ວໂມງຫຼັງຈາກການປ່ອຍຂຶ້ນໃນວັນຈັນ ໄດ້ຖືກຍົກເລີກວ່າ ມັນອາດຈະເປັນກ່ອນວັນສຸກນີ້ ທີ່ພວກເຂົາຈະພະຍາຍາມປ່ອຍຂຶ້ນ ອີກຄັ້ງນຶ່ງ.
ການບິນໃນທ້າຍທີ່ສຸດ ຈະເປັນການທົດສອບຄັ້ງສຸດທ້າຍກ່ອນທີ່ອົງການ NASA ສາມາດຮັບຮອງໃຫ້ Boeing ປະຕິບັດພາລະກິດໄປ ແລະ ມາຢ່າງເປັນປະຈຳຈາກສະຖານີອາວະກາດສຳລັບອົງການດັ່ງກ່າວ.
ຖ້າການທົດລອງຂອງ Boeing ປະສົບຜົນສໍາເລັດ, ມັນຈະກາຍເປັນທາງ ເລືອກທີ່ເຊື່ອຖືໄດ້ສໍາລັບການບິນໃນອະວະກາດຂອງມະນຸດ ອັນດັບທີ 2 ຄ່ຽງຄູ່ກັບຍານອະວະການ SpaceX Dragon ຂອງ ທ່ານ ອີລອນ ມັສກ໌ (Elon Musk). ບໍລິສັດ SpaceX ໄດ້ສົ່ງນັກບິນອາວະກາດຂອງ NASA ໄປແລະມາ ຈາກສະຖານນີອະວະກາດນານາຊາດ ຫຼື ISS ມາຕັ້ງແຕ່ປີ 2020.
ໂຄງການ Starliner ໄດ້ປະສົບກັບຄວາມລົ້ມເຫຼວ ແລະ ຄວາມຫຼ້າຊ້າຫຼາຍປີ.
ໃນລະຫວ່າງການບິນທົດລອງແບບບໍ່ມີລູກເຮືອໃນປີ 2019, ຍານອະວະກາດດັ່ງກ່າວແມ່ນໄດ້ບິນຢູ່ໃນເສັ້ນທາງທີ່ບໍ່ຖືກຕ້ອງ ແລະ ກັບຄືນມາໂດຍບໍ່ໄດ້ໄປຮອດສະຖານີອະວະກາດສາກົນ.
ຟໍຣັມສະແດງຄວາມຄິດເຫັນ