ປະທານາທິບໍດີ ສະຫະລັດ ທ່ານດໍໂນລ ທຣຳ ໄດ້ກ່າວວ່າ ສະຫະລັດ ໄດ້ກຽມພ້ອມສຳລັບທຸກໆສະຖານະການ ທີ່ຈະເກີດຂຶ້ນຈາກການລະບາດຂອງໄວຣັສໂຄໂຣນາ ໃນຂະນະທີ່ບັນດາເຈົ້າໜ້າທີ່ສາທາລະນະສຸກຂອງສະຫະລັດ ໄດ້ລາຍງານວ່າ ມີຜູ້ເສຍຊີວິດຄົນທຳອິດຈາກໄວຣັສດັ່ງກ່າວນັ້ນ.
ທ່ານທຣຳ ໄດ້ກ່າວໃນວັນເສົາວານນີ້ ຢູ່ທີ່ທຳນຽບຂ່າວ ໃນກອງປະຊຸມຖະແຫລງຂ່າວ ວ່າ ຜູ້ເຄາະຮ້າຍຄົນນັ້ນ ແມ່ນເພດຊາຍໄວໃກ້ເຂົ້າ 60 ປີ ເປັນຜູ້ທີ່ມີ “ຄວາມສ່ຽງສູງດ້ານການແພດ” ຊຶ່ງຜູ້ກ່ຽວໄດ້ເສຍຊີວິດ ໃນມື້ຄືນກ່ອນຢູ່ໃນລັດວໍຊິງຕັນ.
ໃນຂະນະດຽວກັນ ທ່ານໄດ້ກ່າວຕື່ມວ່າ ກໍລະນີຂອງການຕິດເຊື້ອໄວຣັສໂຄໂຣນາຕ່າງໆ ຢູ່ໃນສະຫະລັດ ແມ່ນ “ເປັນໄປໄດ້ສູງ” ຊຶ່ງທ່ານກ່າວຕໍ່ໄປວ່າ “ບໍ່ມີເຫດຜົນໃດ ທີ່ຈະຕື່ນຕົກໃຈເລີຍ.”
ຜູ້ອຳນວຍການສູນກາງຄວບຄຸມ ແລະ ປ້ອງກັນພະຍາດຂອງ ສະຫະລັດ ຫຼື CDC ທ່ານໂຣເບີດ ເຣດຟີລ (Robert Redfield) ໄດ້ກ່າວວ່າ ບໍ່ມີ “ຫຼັກຖານໃດໆທີ່ເຊື່ອມໂຍງກັບການເດີນທາງ” ໃນກໍລະນີດັ່ງກ່າວ ຂອງຜູ້ປ່ວຍຢູ່ໃນລັດວໍຊິງຕັນຜູ້ທີ່ໄດ້ເສຍຊີວິດ.
ຜູ້ປົກຄອງລັດວໍຊິງຕັນ ທ່ານເຈ ອິນສລີ ໄດ້ປະກາດພາວະສຸກເສີນ ໃນວັນເສົາວານນີ້ ໂດຍຊີ້ນຳໃຫ້ອົງການພາຍໃນລັດທັງຫຼາຍ ຈົ່ງໃຊ້ “ແຫລ່ງຊັບພະຍາກອນທຸກຢ່າງທີ່ຈຳເປັນ” ເພື່ອຮັບມືກັບການລະບາດຂອງໄວຣັສໂຄໂຣນາ.
ທ່ານອິນສລີ ໃນເບື້ອງຕົ້ນໄດ້ອະທິບາຍໃນຖະແຫລງການ ເຖິງຄົນປ່ວຍຜູ້ທີ່ໄດ້ເສຍຊີວິດນັ້ນ ວ່າເປັນຜູ້ຊາຍ ແຕ່ໃນເວລາຕໍ່ມາໄດ້ອະທິບາຍ ບຸກຄົນຜູ້ນີ້ ເປັນ “ພົນລະເມືອງລັດວໍຊິງຕັນ.”
ທຳນຽບຂາວໃນວັນເສົາວານນີ້ ຍັງໄດ້ປະກາດໃຫ້ຈຳກັດການເດີນທາງໄປຍັງປະເທດ ອີຣ່ານ ຢ່າງເຄັ່ງຂັດ ລວມທັງພວກຊາວຕ່າງຊາດໃດໆ ຜູ້ທີ່ໄດ້ເດີນທາງໄປຢ້ຽມຢາມປະເທດດັ່ງກ່າວ ພາຍໃນ 14 ວັນຜ່ານມານີ້. ນອກຈາກນັ້ນແລ້ວ ທຳນຽບຂາວ ໄດ້ຍົກລະດັບການແຈ້ງເຕືອນໃນການເດີນທາງຂຶ້ນເຖິງຂັ້ນສູງສຸດ ແລະໃຫ້ຫລີກເວັ້ນການເດີນທາງໄປປະເທດອີຕາລີ ເກົາຫຼີໃຕ້ ແລະປະເທດຕ່າງໆ ທີ່ໄດ້ຮັບຜົນກະທົບໜັກທີ່ສຸດໂດຍໄວຣັສ ນອກເໜືອຈາກປະເທດຈີນ.
ໄວຣັສໂຄໂຣນາ ສືບຕໍ່ແຜ່ລະບາດ ໃນວັນເສົາວານນີ້ ທ່າມກາງຄວາມເປັນຫ່ວງທີ່ມີເພີ້ມຂຶ້ນນັບມື້ ກ່ຽວກັບຄວາມເປັນໄປໄດ້ວ່າ ມັນອາດຈະກໍ່ໃຫ້ເກີດພາວະເສດຖະກິດຖົດຖອຍໃນທົ່ວໂລກ.
ສ່ວນປະເທດຈີນ ໄດ້ລາຍງານໃນວັນເສົາວານນີ້ ວ່າ ກິດຈະການດ້ານການຜະລິດ ໄດ້ຫລຸດລົງຢ່າງຫຼວງຫຼາຍ ໃນເດືອນກຸມພາ ໃນຂະນະດຽວກັນ ເຊື້ອໄວຣັສນີ້ ໄດ້ເຮັດໃຫ້ເສດຖະກິດໃຫຍ່ອັນດັບສອງຂອງໂລກ ຊັກຊ້າລົງ.
ລາຄາຮຸ້ນໃນທົ່ວໂລກ ຕອນປິດຕະຫຼາດຊື້ຂາຍ ໃນສັບປະດານີ້ ຫລຸດລົງຕ່ຳກວ່າ ໃນວັນສຸກ ໂດຍສິ້ນສຸດລົງ ເປັນນຶ່ງໃນອາທິດທີ່ຂີ້ຮ້າຍທີ່ສຸດສຳລັບຕະຫຼາຍຮຸ້ນຕ່າງໆຂອງໂລກ ນັບຕັ້ງແຕ່ວິກິດການດ້ານການເງິນໃນປີ 2008.
