ທ່ານ Fidel Castro ອະດີດຜູ້ນຳຄິວບາ ປະເທດເກາະດອນ
ໃນເຂດທະເລ Caribbean ກ່າວວ່າ ປະເທດຂອງທ່ານ ແມ່ນ
“ຍິນດີທີ່ຈະ ຮ່ວມມື” ກັບສະຫະລັດ ໃນການຕໍ່ສູ້ຕ້ານພະຍາດ
ອີໂບລາ ໃນອາຟຣິກາ ຕາເວັນຕົກ.
ທ່ານ Castro ໄວ 88 ປີ ໄດ້ຂຽນລົງໃນສື່ຂອງລັດເມື່ອວັນເສົາ
ວານນີ້ ວ່າ ການຮ່ວມໄມ້ຮ່ວມມືນີ້ ແມ່ນເປັນຜົນປະໂຫຍດຂອງ
“ສັນຕິພາບໃນໂລກ” ແລະ ບໍ່ແມ່ນຄວາມພະຍາຍາມເພື່ອແກ້
ໄຂບັນຫາຕ່າງໆ ລະຫວ່າງສະຫະລັດ ກັບ ຄິວບາ.
ນັກຂ່າວຂອງໂທລະພາບຄິວບາ ອ່ານຄຳຖະແຫລງຂອງ ທ່ານ
Castro ວ່າດັ່ງນີ້:
“ພວກເຮົາຈະຍິນດີຮ່ວມມືກັບພະນັກງານອາເມຣິກັນ ໃນວຽກງານດັ່ງກ່າວນັ້ນ
ແລະ ບໍ່ແມ່ນເພື່ອຊອກຫາສັນຕິພາບ ລະຫວ່າງສອງລັດ ທີ່ໄດ້ເປັນປໍລະປັກກັນ
ມາຫຼາຍໆ ປີນັ້ນ ແຕ່ແນວໃດກໍຕາມ ເພື່ອສັນຕິພາບໃນໂລກແລ້ວ ຈຸດມຸ່ງໝາຍ
ອັນນັ້ນແມ່ນ ສາມາດແລະກໍຄວນທີ່ຈະ ພະຍາຍາມເຮັດໃຫ້ໄດ້.”
ລັດຖະມົນຕີຕ່າງປະເທດສະຫະລັດ ທ່ານ John Kerry ໄດ້
ກ່າວຊົມເຊີຍຄວາມພະຍາຍາມ ຂອງຄິວບາ ເມື່ອວັນສຸກຜ່ານມາ
ສຳຫລັບການຕອບສະໜອງ ທີ່ໜ້າປະທັບໃຈຂອງຄິວບາ ຕໍ່ວິກິດ
ການອີໂບລາ ຊຶ່ງ ທ່ານ Kerry ກ່າວວ່າ “ຄິວບາ ປະເທດທີ່ມີ
ປະຊາກອນພຽງ 11 ລ້ານຄົນ ໄດ້ສົ່ງພະນັກງານການແພດ
ມືອາຊີບ ຈຳນວນ 165 ຄົນ ແລະ ມີແຜນທີ່ຈະສົ່ງຕື່ມອີກ
ເກືອບ 300ຄົນ” ໄປຍັງອາຟຣິກາຕາເວັນຕົກ ທີ່ໄດ້ຖືກກະທົບ
ຢ່າງໜັກໜ່ວງນັ້ນ.
ຄິວບາມີປະຫວັດ ໃນການສົ່ງທ່ານໝໍຂອງຕົນ ໄປຊ່ວຍໃນເຂດ
ສຸກເສີນຢູ່ທົ່ວໂລກ.
