ຕຳຫຼວດໃນພາກຕາເວັນອອກສຽງເໜືອຂອງ ໄນຈີເຣຍ ກ່າວວ່າ ມືລະເບີດສະຫຼະຊີບ ແມ່ຍິງ 2 ຄົນ ໄດ້ຖືກຂ້າຕາຍໂດຍລະເບີດລູກໜຶ່ງຂອງພວກເຂົາເອງໃນວັນເສົາວານນີ້ ໃນຂະນະທີ່ພະຍາຍາມຈະລັດລົດໄປຍັງເມືອງ Maiduguri.
ຕຳຫຼວດທ້ອງຖິ່ນຄົນໜຶ່ງ ກ່າວຕໍ່ ວີໂອເອວ່າ ແມ່ຍິງທັງສອງໄດ້ຢືນຢູ່ແຄມຫົນທາງ ແລະ ພະຍາຍາມທີ່ຈະໂບກເອົາລົດໃນເມືອງ Jakana, ປະມານ 40 ກິໂລແມັດ ທາງພາກຕາເວັນຕົກຂອງເມືອງ Maiguduri, ແຕ່ວ່າ ບໍ່ໄດ້ຮັບຄວາມສົນໃຈຈາກລົດຫຼາຍຄັນທີ່ແລ່ນຜ່ານໄປ.
ລາວກ່າວວ່າ ຕຳຫຼວດໄດ້ຍິນສຽງລະເບີດແຮງດັງຂຶ້ນ ໃນເວລາປະມານບ່າຍ 4:20 ແລະເວລາເຂົາເຈົ້າໄປຮອດບ່ອນເກີດເຫດ ກໍພົບເຫັນສົບແມ່ຍິງຄົນໜຶ່ງ ໃນສະພາບຂາດເປັນຊິ້ນສ່ວນ ແລະອີກຄົນໜຶ່ງນອນຕາຍຢູ່ ໂດຍມີລະເບີດທີ່ບໍ່ທັນແຕກ ມັດຕິດແອວຢູ່.
ລາວກ່າວວ່າ ຕຳຫຼວດໄດ້ລໍຖ້າໃຫ້ຜູ້ຊ່ຽວຊານລະເບີດ ມາປົດຂະນວນລະເບີດ ກ່ອນທີ່ຈະເກັບກູ້ເອົາສົບທັງສອງໄປ.
ຕຳຫຼວດກ່າວວ່າ ບັນດາຜູ້ຂັບຂີ່ລົດຢູ່ອ້ອມເມືອງ Maiguduri ໄດ້ມີຄວາມລະມັດລະວັງ ກັບການຮັບເອົາພວກແມ່ຍິງທີ່ໂບກລົດ ຫຼັງຈາກທີ່ມີຫຼາຍເຫດການ ທີ່ແມ່ຍິງໄດ້ທຳການລະເບີດສະຫຼະຊີບຕົນເອງ.
ໃນວັນຈັນແລ້ວນີ້, ມືລະເບີດສະຫຼະຊີບແມ່ຍິງຄົນໜຶ່ງ ໄດ້ລະເບີດຕົນເອງຢູ່ຕະຫຼາດປາ ໃນເມືອງ Maiguduri, ເຮັດໃຫ້ມີຄົນເສຍຊີວິດຢ່າງໜ້ອຍ 30 ຄົນ.