ຫົວໜ້າຂອງທະນາຄານກາງສະຫະລັດ ກ່າວວ່າ ອັດຕາດອກເບ້ຍ
ທີ່ສຳຄັນຂອງສະຫະລັດນັ້ນ ມີທ່າທາງວ່າ ຈະບໍ່ປັບຕົວສູງຂຶ້ນ
ກ່ອນເດືອນມີຖຸນາປີນີ້ ແລະຕະຫລາດຮຸ້ນຕ່າງໆ ຈະໄດ້ຮັບການ
ແຈ້ງເຕືອນ ບາງຢ່າງ ກ່ອນຈະມີການຂຶ້ນດອກເບ້ຍອີຫລີ.
ປະທານທະນາຄານກາງສະຫະລັດ ທ່ານນາງ Janet Yellen
ໄດ້ກ່າວຖະແຫລງໃນວັນອັງຄານວານນີ້ ຕໍ່ຄະນະກຳມະການ
ທະນາຄານຂອງສະພາສູງ ຊຶ່ງເປັນສ່ວນນຶ່ງ ໃນການລາຍງານ
2 ຄັ້ງຕໍ່ປີ ຂອງທ່ານນາງ ກ່ຽວກັບສະພາບເສດຖະກິດ ແລະ
ໃນວິທີໃດ ທີ່ບັນດາຜູ້ກຳນົດນະໂຍບາຍ ຈຶ່ງຈະສາມາດຄວບ
ຄຸມສະຖານະການໄດ້.
ໃນລະຫວ່າງ ວິກິດການທາງດ້ານການເງິນ ອັດຕາດອກເບ້ຍລະຍະສັ້ນຕ່າງໆ ຂອງ
ສະຫະລັດທີ່ສຳຄັນນັ້ນ ໄດ້ຖືກຕັດລົງເຖິງຂັ້ນຕ່ຳສຸດເປັນປະຫວັດການ ເພື່ອຊຸກຍູ້ໃຫ້
ເສດຖະກິດຟື້ນຕົວຂຶ້ນ. ການເຕີບໂຕ ຂອງເສດຖະກິດ ແລະ ການຫລຸດລົງຂອງຄົນ
ວ່າງງານ ເຮັດໃຫ້ພວກນັກເສດຖະສາດ ຄິດວ່າ ການສືບຕໍ່ກະຕຸກຊຸກຍູ້ເສດຖະກິດ
ແມ່ນບໍ່ມີຄວາມຈຳເປັນ ແລະ ພວກເຂົາເຈົ້າຄາດຫວັງວ່າ ທະນາຄານກາງ ຈະຂຶ້ນອັດຕາ
ດອກເບ້ຍໃນກາງປີນີ້.
ທ່ານນາງ Yellen ກ່າວວ່າ ບັນດາເຈົ້າໜ້າທີ່ທະນາຄານກາງ ຈະຍັງຄົງມີຄວາມ “ອົດທົນ” ຢູ່ຕໍ່ໄປ ກ່ອນທີ່ຈະຂຶ້ນອັດຕາດອກເບ້ຍຕ່າງໆ.
ທະນະຄານກາງສະຫະລັດ ແມ່ນຄວນທີ່ຈະທຳງານເພື່ອໃຫ້ໄດ້ມາຊຶ່ງ ການມີວຽກເຮັດ
ງານທຳຢ່າງເຕັມທີ່ ແລະ ລາຄາສິນຄ້າທີ່ທຸ່ນທ່ຽງ ແລະ ອັດຕາເງິນເຟີ້ ໃຫ້ຢູ່ລະດັບຕ່ຳກວ່າ
2 ເປີເຊັນຕໍ່ປີ ຊຶ່ງບັນດານັກຊ່ຽວຊານ ຂອງທະນະຄານກາງ ກ່າວວ່າ ເປັນການດີ ສຳຫລັບ ເສດຖະກິດ.
