ປະທານາທິບໍດີສະຫະລັດ ທ່ານ Barack Obama ຮຽກຮ້ອງໃຫ້ບັນດາສະມາຊິກພັກຣີພັບບລິກັນຢູ່ໃນສະພາ ອະນຸມັດທຶນຕໍ່ສູ້ຕ້ານເຊື້ອໄວຣັສ Zika.
ປະທານາທິບໍດີ Obama ກ່າວໃນວັນເສົາມື້ນີ້ ຢູ່ໃນຄຳປາໄສປະຈຳສັບປະດາ ວ່າ ທ່ານໄດ້ຮ້ອງຂໍຕໍ່ສະພາ ມາໄດ້ກວ່າຫົກເດືອນແລ້ວ ເພື່ອອະນຸມັດທຶນ “ຊັບ ພະຍາກອນສຸກເສີນ” ທີ່ບັນດາຜູ້ຊ່ຽວຊານດ້ານສາທາລະນະສຸກຕ້ອງການເພື່ອຕໍ່ສູ້ກັບເຊື້ອໄວຣັສ Zika ແຕ່ສະພາບໍ່ຍອມ.
ແທນທີ່ຈະເປັນຈັ່ງຊັ້ນ ປະທານາທິບໍດີກ່າວວ່າ “ພວກເຮົາໄດ້ຖືກບັງຄັບໃຫ້ໃຊ້ຊັບພະຍາ ກອນ ທີ່ພວກເຮົາຈຳເປັນຕ້ອງໄດ້ນຳໃຊ້ເພື່ອຕໍ່ສູກັບ Ebola ມະເຮັງ ແລະພະຍາດອຶ່ນໆ.” ທ່ານ Obama ກ່າວວ່າ ວິທີການດັ່ງກ່າວນັ້ນ “ບໍ່ແມ່ນ ການແກ້ໄຂແບບຍືນຍົງ. ແລະສະພາໄດ້ຢຸດພັກເຊົາເປັນເວລາເຈັດອາທິດແລ້ວ ໂດຍບໍ່ໄດ້ເຮັດຫຍັງ ເພື່ອປ້ອງກັນຊາວອາເມຣິກັນ ຈາກການຕິດເຊື້ອໄວຣັສ Zika.”
ປະທານາທິບໍດີ Obama ກ່າວວ່າ “ສະມາຊິກພັກຣີພັບບລິກັນຢູ່ໃນສະພາ ຄວນຖືເອົາເລື້ອງໄວຣັສ Zika ຄືກັນກັບໄພຂົ່ມຂູ່ແລະເຮັດສິ່ງນີ້ເປັນທຸລະກິດທີ່ສຳຄັນສຸດ ເວລາເຂົາ ເຈົ້າກັບ ຄືນມາວໍຊິງຕັນ ຈາກວັນພັກ Labor Day.”
ໃນວັນສຸກວານນີ້ ອົງການອາຫານແລະຢາສະຫະລັດ ຫລື FDA ໄດ້ຂະຫຍາຍລະບຽບໃນ
ການກວດເລືອດທີ່ບໍລິຈາກຫາເຊື້ອໄວຣັສ Zika ໂດຍກ່າວວ່າ ເລືອດດັ່ງກ່າວຄວນຖືກກວດ ກ່ອນນຳໃຊ້.
ອົງການ FDA ກ່າວວ່າ ຕົນໄດ້ປັບປ່ຽນຄຳແນະນຳໃໝ່ ຫລັງຈາກໄດ້ພິຈາລະນາເຖິງຫລັກຖານວິທະຍາສາດທັງໝົດ ແລະຜົນທີ່ອາດຈະຕິດຕາມມາຕໍ່ສຸຂະພາບ ຂອງການຕິດເຊື້ອ ໄວຣັສ Zika ສຳລັບເດັກນ້ອຍທີ່ຍັງບໍ່ທັນເກີດ ແລະບັນດາແມ່ຍິງທີ່ຖືພາ.
