ຜູ້ສະໝັກເປັນປະທານາທິບໍດີ ສະຫະລັດ ສັງກັດພັກ ເດໂມແຄຣັດ ທ່ານນາງ Hillary Clinton ໄດ້ພົບກັບ ເຈົ້າໜ້າທີ່ສືບສວນສອບສວນ ຂອງອົງການສັນຕິ ບານກາງ FBI ໃນວັນເສົາວານນີ້ ກ່ຽວກັບການນຳໃຊ້ເຄື່ອງບໍລິການອີີແມລ ເອກກະຊົນ ໃນຂະນະທີ່ທ່ານນາງເປັນລັດຖະມົນການຕ່າງປະເທດຢູ່ນັ້ນ ອີງຕາມຄຳເວົ້າຂອງໂຄສົກຮັບຜິດຊອບໃນການໂຄສະນາຫາສຽງ.
ການສຳພາດໄລຍະເວລາປະມານ 3 ຊົ່ວໂມງເຄິ່ງ ໄດ້ມີຂຶ້ນ ຢູ່ທີ່ສຳນັກງານ ໃຫຍ່ຂອງອົງການ FBI ໃນນະຄອນຫຼວງ ວໍຊິງຕັນ.
ທ່ານ Nick Merrill ໂຄສົກຮັບຜິດຊອບໃນການໂຄສະນາຫາສຽງ ຂອງ ທ່ານນາງ Clinton ໄດ້ຂຽນລົງໃນອີເມລ ຕໍ່ສື່ມວນຊົນ ວ່າ “ລັດຖະມົນຕີ ການຕ່າງປະເທດ ຄລິນຕັນ ສະໝັກໃຈໃຫ້ສຳພາດ ໃນຕອນເຊົ້າມື້ນີ້ ກ່ຽວກັບການຈັດແຈງ ອິເມລຂອງທ່ານນາງ ໃນຂະນະທີ່ເປັນ ລັດຖະ ມົນຕີການຕ່າງປະເທດຢູ່ນັ້ນ. ທ່ານນາງ ຍິນດີ ທີ່ໄດ້ມີໂອກາດໃຫ້ການ ຊ່ອຍເຫຼືອກະຊວງຍຸຕິທຳ ໃນການສະຫລຸບຜົນການທົບທວນຄືນນີ້.”
ທ່ານ Merrill ໄດ້ຂຽນຕື່ມອີກວ່າ “ດ້ວຍຄວາມນັບຖື ຕໍ່ຂະບວນການສືບ ສວນສອບສວນ ທ່ານນາງຈະບໍ່ໃຫ້ຄຳເຫັນຕື່ມອີກ ຕໍ່ການສຳພາດ ຂອງ ທ່ານນາງ.”
ການພົບປະ ໄດ້ມີຂຶ້ນຫຼັງຈາກທີ່ ລັດຖະມົນຕີກະຊວງຍຸຕິທຳ ທ່ານນາງ Loretta Lynch ໄດ້ປະກາດເຈຕະນາຂອງທ່ານນາງ ທີ່ຈະຮັບເອົາການສະເໜີແນະ ຈາກພະນັກງານມືອາຊີບຂອງກະຊວງຍຸຕິທຳ ແລະ ບັນດາເຈົ້າໜ້າທີ່ ລັດຖະບານກາງ ໃນການກວດສອບເບິ່ງ ການນຳໃຊ້ບໍລິການ ດ້ານອີເມລສ່ວນຕົວ.
ເປັນທີ່ຄາດກັນວ່າ ບັນດາເຈົ້າໜ້າທີ່ FBI ຈະສະຫລຸບຜົນການສຳພາດໃນ ໄວໆນີ້. ບັນດານັກຊ່ຽວຊານດ້ານກົດໝາຍ ກ່າວວ່າ ພວກເຂົາເຈົ້າບໍ່ຄາດວ່າ ຈະມີການກ່າວຫາກ່ຽວກັບການກະທຳຜິດໃດໆຕໍ່ທ່ານນາງ Clinton ທີ່ຄາດ ວ່າ ຈະໄດ້ຮັບການສະເໜີຊື່ ແຕ່ງຕັ້ງໃຫ້ເປັນຜູ້ສະໝັກ ປະທານາທິບໍດີ ຂອງ ພັກເດໂມແຄຣັດ.
ອ່ານຂ່າວນີ້ຕື່ມ ເປັນພາສາອັງກິດ
