ຄອບຄົວລູກເຮືອເກົາຫລີໃຕ້ ທີ່ຖືກໂຈນທະເລຈັບໄປ ຮ້ອງຂໍ ຄວາມຊ່ວຍເຫລືອ

ບັນດາ​ຄອບ​ຄົວ​ຂອງ ພວກ​ລູກເຮືອເກົາຫລີ​ໃຕ້ ​ສີ່​ຄົນ​ ທີ່ໄດ້ຖືກ
ໂຈນ​ທະເລ​ໂຊ​ມາ​ເລຍ ຈັບ​ໄປ​ເປັນ​ໂຕ​ປະກັນ ​ໃນ​ປີແລ້ວ​ນີ້ ໄດ້
ວິ​ງວອນຮ້ອງຂໍ​ຄວາມ​ຊ່ວຍ​ເຫ​ລື​ອ ​ໃຫ້​ມີ​ການ​ໂຕ​ປ່ອຍ​ເຂົາ​ເຈົ້າ.

ລູກ​ເຮືອເກົາຫລີ​ໃຕ້ເຫລົ່າ​ນັ້ນ ​ແມ່ນ​ຮວມ​ຢູ່​ໃນ​ກຸ່ມ​ລູກ​ເຮືອ​ກໍາ​
ປັ່ນ​ບັນທຸກ​ນໍ້າມັນ MT Gemini ​ທີ່​ໄດ້​ຖືກ​ຈັບ​ໄປ​ໃນ​ວັນ​ທີ 30 ​
ເມສາ 2011 ​ໃນ​ຂະນະ​ທີ່ກໍາລັງ​ເດີນ​ທາງ​ຈາກປະ​ເທດ​ເຄັນ​ຢາ ​
ໄປ​ຍັງມາ​ເລ​ເຊຍ. ພວກ​ໂຈນ​ທະ​ເລ ​ໄດ້​ປ່ອຍ​ໂຕ​ລູກ​ເຮືອສ່ວນ​
ໃຫຍ່​ ຫລັງ​ຈາກ​ເຈົ້າ​ຂອງ​ເຮືອ​ບັນທຸກ​ນໍ້າມັນ ຊຶ່ງ​ເປັນ​ຊາວສິງ
ກະໂປ ​ໄດ້​ຈ່າຍ​ຄ່າໄຖ່ ທີ່ມີ​ລາຍ​ງານ​ວ່າ​ ຕົກເປັນ​ຈໍາ​ນວນ​ເງິນ
6 ລ້ານ​ໂດ​ລານັ້ນ.

ບັນດາສະມາຊິກ​ຄອບຄົວຂອງ​ຊາວ​ເກົາຫລີ​ໃຕ້​ທັງ​ສີ່ ​ໄດ້ອອກ​
ມາ​ກ່າວ ຕໍ່​ກອງ​ປະຊຸມນັກ​ຂ່າວ​ ເປັນ​ຄັ້ງ​ທໍາອິດ ​ໃນ​ວັນ​ຈັນມື້​ນີ້
ຫລັງ​ຈາກ​ທີ່​ໄດ້​ມິດ​ງຽບຢູ່ ​ໃນ​ລະຫວ່າງ​ທີ່ ລັດຖະບານ​ແ​ລະ​ເຈົ້າ​ຂອງ​ເຮືອ​ເຮັດ​ວຽກ​ ເພື່ອ​ປົດ​ປ່ອຍ​ຜູ້ທີ່​ຍັງຖືກ​ຈັບ​ໄວ້​ເປັນ​ໂຕ​ປະກັນ​ນັ້ນ. ສື່ມວນ​ຊົນ​ເກົາຫລີ​ໃຕ້ ​ໄດ້​ເປີດ​ເຜີຍຂ່າວ​ນີ້​ອອກ​ມາ​ ໃນ​ເດືອນ​ແລ້ວ​ນີ້ ຫລັງ​ຈາກ​ທີ່​ໄດ້​ມິດ​ງຽບ ບໍ່​ໄດ້​ລາຍ​ງານ​ຂ່າວໃດໆ ຕາມ​ຄໍາ​ຂໍ​ຮ້ອງຂອງ​ກະຊວງ​ການ​ຕ່າງປະ​ເທດ ຫລັງ​ຈາກ​ການ​ພະຍາຍາມ​ຊ່ວຍ​ເຫລືອ​ພວກ​ໂຕ​ປະກັນ ໄດ້ປະສົບ​ກັບ​ຄວາມ​ລົ້ມ​ແຫລວ ​ໃນ​ເດືອນ​ພະຈິກ ປີ​ກາຍ​ນີ້.

ບັນດາ​ຄອບຄົວກ່າວ​ໃນ​ຄໍາຖະ​ແຫລ​ງ​ໃນ​ວັນ​ຈັນມື້​ນີ້​ວ່າ ການດໍາ​ເນີນ​ຄວາມ​ພະຍາຍາມເພື່ອປ່ອຍ​ໂຕພວກ​ລູກ​ເຮືອ ​ແມ່ນບໍ່​ໄດ້ຜົນ​ໃດໆ​ເລີຍ ຊຶ່ງ​ເຮັດ​ໃຫ້​ເຂົາ​ເຈົ້າ​ຕ້ອງ​ໄດ້ທໍາ​ການ​ຕັດສິນ​ໃຈ “ອັນຍາກ​ລໍາບາກ” ​ເພື່ອຮຽກຮ້ອງ​ຂໍ​ຄວາມ​ຊ່ວຍ​ເຫລືອ​ຈາກ ລັດຖະບານ ​ແລະ​ປະຊາຊົນເກົາ​ຫລີ​ໃຕ້.

ພວກຄວບ​ຄົວກ່າວ​ວ່າ ​ເຂົາ​ເຈົ້າ​ບໍ່​ໄດ້​ຮັບ​ຄໍາ​ຂ່າວ​ໃດໆ​ເລີຍ ກ່ຽວກັບ​ສະພາບ​ການ​ຂອງ​ພວກລູກ​ເຮືອທັງ​ສີ່. ນາງ Lee Ji-sun ລູກ​ສາວ​ຂອງ​ Lee Sang-hoo ນຶ່ງ​ໃນ​ຈໍານວນ​ນັ້ນ ໄດ້ສະ​ແດງ​ຄວາມໂສກ​ເສົ້າ​ເປັນ​ຫ່ວງ ກ່ຽວ​ກັບ​ສຸຂະ​ພາບຂອງພໍ່​ລາວ ຫລັງ​ຈາກ​ຖືກ​ກັກໂຕ​ມາ​ເປັນ​ເວລາ ປີ​ເຄິ່ງ.