ເມື່ອວັນທີ 8-10 ກັນຍາຜ່ານມາ ຣັດເຊຍອ້າງວ່າ ໄດ້ຈັດໃຫ້ມີ "ການເລືອກຕັ້ງ" ຂຶ້ນຢູ່ໃນ 5 ເຂດຂອງຢູເຄຣນ ທີ່ຖືກຍຶດຄອງເປັນບາງສ່ວນ. ການລົງຄະແນນສຽງທີ່ຜິດກົດໝາຍ ທີ່ຖືກກ່າວຫາວ່າ ມີຂຶ້ນຢູ່ໃນເຂດໂດເນັດ, ລູຮານ, ຊາໂປຣິສເຊຍ ແລະເຄີຊອນແມ່ນຈັດຂຶ້ນສຳລັບຜູ້ສະໝັກເລືອກຕັ້ງ “ສະພາປະຈໍາຂົງເຂດຂອງຣັດເຊຍ.” ຄາດວ່າ ຈະມີການເລືອກຕັ້ງເອົາ ສະມາຊິກ ສະພາດູມາ (Duma) ຂອງຣັດເຊຍ ໃນການແຫລມໄຄຣເມຍ ທີ່ຖືກຜະໜວກ.
ມົສກູ ປະກາດວ່າ ຈຳນວນຜູ້ລົງຄະແນນສຽງໃນການເລືອກຕັ້ງເຫລົ່ານີ້ ແມ່ນສູງ, ຄາດວ່າ ມີຫຼາຍແສນຄົນໄດ້ໄປປ່ອນບັດ.
ໃນວັນທີ 10 ກັນຍາຜ່ານມາ, ທ່ານນາງມາຣີນາ ຊັກຄາໂຣວາ, ປະທານກໍາມາທິການເລືອກຕັ້ງໃນເຂດເຄີຊອນ ຂອງຢູເຄຣນ ທີ່ຍຶດຄອງໂດຍຣັດເຊຍ ກ່າວອ້າງວ່າ:
"ທັງຫມົດ ມີ 65.14 ເປີເຊັນ ຂອງຜູ້ມີສິດລົງຄະແນນໃນເຂດເຄີຊອນໄດ້ໄປປ່ອນບັດ."
ນັ້ນແມ່ນບໍ່ຖືກຕ້ອງ.
ກ່ອນອື່ນໝົດ, ຢູ່ໃນເຂດສົງຄາມເຊັ່ນນັ້ນ “ການເລືອກຕັ້ງ” ແມ່ນຜິດກົດໝາຍ ຢູ່ພາຍໃຕ້ກົດໝາຍສາກົນ.
ໂດຍອ້າງອີງກົດບັດຂອງອົງການສະຫະປະຊາຊາດ ແລະມະຕິ resolution ES-11/4 ທີ່ຖືວ່າຣັດເຊຍຍຶດຄອງຢູເຄຣນແບບຜິດກົດໝາຍນັ້ນ ເຈົ້າໜ້າທີ່ອະວຸໂສຂອງອົງການສະຫະປະຊາຊາດກ່າວໃນວັນທີ 8 ກັນຍາຜ່ານມາວ່າ “ສິ່ງທີ່ເອີ້ນວ່າ ການເລືອກຕັ້ງ” ຄັ້ງຫຼ້າສຸດຂອງຣັດເຊຍ “ແມ່ນບໍ່ມີມູນຖານທາງກົດໝາຍ” ແລະບ່ອນທຳລາຍຂະບວນການສັນຕິພາບ.
ນອກຈາກ ການກ່າວອ້າງແບບບໍ່ສາມາດຢືນຢັນໄດ້ແລ້ວວ່າ ຕົນຈັດການເລືອກຕັ້ງຂຶ້ນ ຣັດເຊຍຍັງກ່າວອ້າງອີກວ່າ ຈຳນວນຜູ້ໄປປ່ອນບັດ ທີ່ເກີນຈຳນວນປະຊາກອນທັງໝົດ ຂອງບັນດາຫົວເມືອງນ້ອຍ ແລະເມືອງໃຫຍ່ຂອງຢູເຄຣນ ທີ່ຖືກຍຶດຄອງນັ້ນ.
ຫນ້ອຍກວ່າ 63 ເປີເຊັນຂອງປະຊາກອນຂົງເຂດເຄີຊອນ ແມ່ນອາໄສຢູ່ໃນເຂດທີ່ຖືກຍຶດຄອງ ໂດຍຣັດເຊຍໃນປັດຈຸບັນ ຊຶ່ງເຮັດໃຫ້ເປັນໄປບໍ່ໄດ້ຫລາຍທີ່ສຸດວ່າ ຈະມີ 65.14 ເປີເຊັນຂອງ ຜູ້ມີສິດລົງຄະແນນໃນຂົງເຂດນີ້ ໄປປ່ອນບັດ.
ອີງຕາມ ພະແນກສະຖິຕິໃຫຍ່ຂອງຂົງເຂດ (ເຄີຊອນ region's main department of statistics) ຮອດ ວັນທີ 1 ມັງກອນ 2022, ປະຊາກອນອາໄສຢ່າງຖາວອນ ໃນຂົງເຂດແມ່ນ 1,000,166 ຄົນ.
ໃນຕົ້ນເດືອນກັນຍາ 2023 ນີ້ ຢູເຄຣນໄດ້ຄວບຄຸມ ເມືອງເບຣິສລາຟສກີ (Berislavsky) ຂອງຂົງເຂດ ເຄີຊອນ ຢ່າງເຕັມສ່ວນ ໂດຍມີປະຊາກອນ 94,940 ຄົນ ເຊັ່ນດຽວກັນ ເມືອງເຄີຊອນ ມີປະຊາກອນ 275,529 ຄົນ -ສະນັ້ນຈໍານວນທັງຫມົດແມ່ນ 370,469 ຄົນ, ຫຼື 37 ເປີເຊັນຂອງປະຊາກອນໃນຂົງເຂດນັ້ນ.
ນອກຈາກນັ້ນ, ຢູເຄຣນຄວບຄຸມ ປະມານນຶ່ງສ່ວນສາມ ຂອງດິນແດນໃນເຂດຂອງເມືອງເຄີຊອນ ແມ່ນມີປະຊາກອນ 170,325 ຄົນໂດຍບໍ່ນັບຄົນຢູ່ໃນເມືອງເຄີຊັນ ຫລື Kherson city.
ສະນັ້ນ, ອີງຕາມການຄາດຄະເນແບບຕໍ່າໆໄວ້ ກໍຄືຫຼາຍກວ່າ 37 ເປີເຊັນ ຂອງຄົນຢູ່ໃນຂົງເຂດເຄີຊອນ ແມ່ນອາໄສຢູ່ໃນເຂດທີ່ຄວບຄຸມໂດຍຢູເຄຣນ ຂະນະທີ່ຫນ້ອຍກວ່າ 63 ເປີເຊັນ ແມ່ນອາໄສຢູ່ໃນອານາເຂດ ທີ່ຖືກຄວບຄຸມໂດຍຣັດເຊຍ.
ອົງການຂ່າວບີບີຊີ ລາຍງານວ່າ ຜົນການເລືອກຕັ້ງ ແລະຈໍານວນຄົນໄປລົງ ຄະແນນສຽງໃນ “ການເລືອກຕັ້ງ” ຂອງຣັດເຊຍໃນດິນແດນຢູເຄຣນທີ່ຖືກຍຶດຄອງນັ້ນ ບໍ່ສາມາດກວດສອບໄດ້ ເພາະບໍ່ມີນັກສັງເກດການອິດສະຫລະ ແລະຜູ້ລົງຄະແນນສຽງ ໄດ້ໄປ ປ່ອນບັດແບບຖືກປືນຈີ້ໃຫ້ເຮັດ:
“ຮູບພາບສະແດງໃຫ້ເຫັນວ່າຜູ້ລົງຄະແນນສຽງປ່ອນບັດລົງໃນຫີບທີ່ເບິ່ງແລ້ວ ຄືວ່າຢູ່ພາຍໃຕ້ສາຍຕາຈັບຈ້ອງເບິ່ງບໍ່ຂາດຂອງທະຫານທີ່ປະກອບອາວຸດຢ່າງແໜ້ນໜາ ໃສ່ຜ້າຄຸມໜ້າໄວ້. ບາງຮູບກໍສະແດງໃຫ້ເຫັນວ່າ ບັດລົງຄະແນນສຽງຖືກປ່ອນໃສ່ຫີບພລາສຕິກໃສໆ ໂດຍທີ່ບັດຄະແນນສຽງສາມາດເຫັນໄດ້ຢ່າງຊັດເຈນ.”
ທ່ານແອນດຣີ ແມັກເກຣາ (Andriy Magera), ອະດີດສະມາຊິກກຳມາທິການເລືອກຕັ້ງສູນ ກາງຂອງຢູເຄຣນ ໄດ້ພົສວິດີໂອລົງໃນ Facebook ທີ່ສະແດງໃຫ້ເຫັນວ່າມີ ຊາຍທະຫານຜູ້ນຶ່ງ ໃສ່ຜ້າຄຸມໜ້າ ແລະແມ່ຍິງນຸ່ງເຄື່ອງພົນລະເຮືອນຍ່າງໄປຕາມຖະໜົນໃນບ້ານແຫ່ງນຶ່ງ ທີ່ຖືກຍຶດຄອງໃນເຂດເຄີຊອນ, ກໍາລັງເຄາະປະຕູ ແລະຮຽກຮ້ອງໃຫ້ຊາວເມືອງໄປປ່ອນບັດ.
ຜູ້ອາໄສຢູ່ໃນເຂດເຄີຊັນຄົນນຶ່ງທີ່ຖືກຍຶດຄອງໂດຍຣັດເຊຍບອກກັບ ອົງການຂ່າວ BBC ພະແນກພາສາຢູເຄຣນ ໂດຍບໍ່ປະສົງອອກນາມວ່າ "ຜູ້ຮ່ວມມືກັບເຂົາໃນທ້ອງຖິ່ນ ແລະທະຫານຣັດເຊຍໄດ້ຍ່າງອ້ອມໂດຍຖືປືນກົນ ແລະຫີບປ່ອນບັດຢູ່ໃນມືຂອງພວກເຂົາ."
ຢູເຄຣນ ແລະ ປະເທດຕາເວັນຕົກ ໄດ້ປະນາມ ຄວາມພະຍາຍາມຂອງຣັດເຊຍ ທີ່ຈະເຮັດໃຫ້ ການຍຶດຄອງຢູເຄຣນຂອງຕົນວ່າຖືກຕ້ອງຊອບທໍາ, ລວມທັງເຮັດການເລືອກຕັ້ງແບບຫຼອກລວງ faking elections.
ໃນວັນທີ 8 ກັນຍານີ້, ລັດຖະມົນກະຊວງການຕ່າງປະເທດສະຫະລັດ ທ່ານແອນໂທນີ ບລິງເຄັນ ກ່າວວ່າ "ອັນທີ່ເອີ້ນວ່າ" ການເລືອກຕັ້ງ “ແບບຫຼອກລວງ” ຂອງຣັດເຊຍ "ສະແດງໃຫ້ເຫັນເຖິງຄວາມບໍ່ສົນໃຈຢ່າງແຮງຕໍ່ຫຼັກການຂອງກົດບັດສະຫະປະຊາຊາດ, ເຊັ່ນການເຄົາລົບອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດທີ່ຄໍ້າຊູຍູ້ໜູນຄວາມໝັ້ນຄົງ ແລະ ສະຖຽນລະພາບຂອງໂລກນັ້ນ.”
ສະຫະລັດ "ຈະບໍ່ມີວັນຮັບຮູ້ການກ່າວອ້າງຂອງສະຫະພັນຣັດເຊຍ ເພື່ອເອົາດິນແດນໃດໆ ຂອງຢູເຄຣນ," ນັ້ນ ຄືຄໍາເວົ້າຂອງທ່ານບລິງເຄັນ ໂດຍເຕືອນ "ຜູ້ສະຫນັບສະຫນູນສາກົນ" ທີ່ເປັນໄປໄດ້ຕໍ່ການກະທໍາຂອງຣັດເຊຍວ່າ ເຂົາເຈົ້າອາດຈະຖືກລົງໂທດ ແລະຈໍາກັດວີຊາ.
ລັດຖະມົນຕີການຕ່າງປະເທດຂອງກຸ່ມ ຈີ7 (G7) ໂດຍມີສະຫະລັດ, ຍີ່ປຸ່ນ, ເຢຍຣະມັນ, ອັງກິດ, ຝຣັ່ງ, ອີຕາລີ, ການາດາ, ແລະຜູ້ຕາງໜ້າຂັ້ນສູງຂອງສະຫະພາບຢູໂຣບ ເອີ້ນການເລືອກຕັ້ງນັ້ນວ່າ ເປັນການຫຼອກລວງ ແລະ ເປັນການລະເມີດເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຢູເຄຣນ ແລະກົດບັດສະຫະປະຊາຊາດ.”
ທີ່ມາ ພະແນກ Polygraph ຂອງວີໂອເອ