Facebook ຊຶ່ງເປັນເວັບໄຊທ໌ສື່ສັງຄົມທີ່ໃຫຍ່ທີ່ສຸດໃນໂລກ ໄດ້ເລີ່ມຂາຍຮຸ້ນຂອງຕົນໃຫ້
ແກ່ມະຫາຊົນແລ້ວ ໃນມື້ວັນສຸກວານນີ້ ໂດຍລາຄາຮຸ້ນໃນຂັ້ນຕົ້ນແມ່ນ 38 ໂດລາ.
ແຕ່ກົງກັນຂ້າມກັບຄວາມຄາດຫວັງຂອງພວກນັກລົງທຶນບາງຄົນ ຄືລາຄາຮຸ້ນຂອງ
Facebook ບໍ່ໄດ້ຖີບໂຕສູງຂຶ້ນໃນການຊື້ຂາຍມື້ທຳອິດ. ຫຼັງຈາກໄດ້ໂດດຂຶ້ນ 10 ກວ່າ
ເປີເຊັນ ໃນໄລຍະສອງສາມນາທີທຳອິດຂອງການຊື້ຂາຍແລ້ວ ຮຸ້ນຂອງ Facebook ກໍ
ມີລາຄາແຕ່ພຽງ 38 ໂດລາກັບ 23 ເຊັນທໍ່ນັ້ນ ໃນຕອນອັດຕະຫຼາດ.
ເຖິງແມ່ນວ່າການເລີ່ມຕົ້ນ ໄດ້ດຳເນີນໄປບໍ່ຄ່ອຍດີປານໃດ ແຕ່ພວກນັກວິເຄາະກ່າວວ່າ
ຈຳນວນຮຸ້ນທີ່ຊື້ຂາຍກັນແມ່ນຢູ່ໃນປະລິມານທີ່ສູງ. ຮຸ້ນຂອງ Facebook ໄດ້ຊື້ຂາຍກັນ
ພາຍໃຕ້ສັນຍາລັກ FB.
ທ່ານ Mark Zuckerberg ຫົວໜ້າບໍລິຫານຂອງບໍລິສັດ Facebook ໄດ້ໃຫ້ສັນຍານເລີ່ມ
ການຊື້ຂາຍຜ່ານຕະຫຼາດຮຸ້ນ Nasdaq ທີ່ນະຄອນນິວຢອກດ້ວຍການບີບກະດິງທີ່ຄວບຄຸມ
ຈາກສຳນັກງານໃຫຍ່ຂອງບໍລິສັດທີ່ຕັ້ງຂ້າມທະວີບຢູ່ ທີ່ລັດຄາລີຟໍເນຍ.
ເວັບໄຊທ໌ຕາໜ່າງສື່ສັງຄົມ ທີ່ໄດ້ຮັບຄວາມນິຍົມສູງ ຊຶ່ງມີຜູ້ຊົມໃຊ້ 900 ລ້ານຄົນ ຢູ່ໃນທົ່ວ
ໂລກນັ້ນ ໄດ້ຮັບເງິນຫຼາຍກວ່າ 16 ພັນລ້ານໂດລາຈາກການຂາຍຮຸ້ນ. ນີ້ແມ່ນນຶ່ງໃນການ
ເປີດຕົວກ່ຽວກັບຂາຍຮຸ້ນທີ່ໃຫຍ່ທີ່ສຸດໃນປະຫວັດສາດຂອງບໍລິສັດສະຫະລັດ ແລະມີແຕ່ບໍ
ລິສັດໃຫ້ບໍລິການດ້ານການເງິນ Visa ແລະ ບໍລິສັດຜະລິດລົດໂອໂຕ General Motors
ທໍ່ນັ້ນທີ່ເປັນຄູ່ແຂ່ງ. ການສະເໜີຂາຍຮຸ້ນ ເຮັດໃຫ້ມູນຄ່າຂອງບໍລິສັດ Facebook ມີຢ່າງ
ນ້ອຍ 104 ພັນລ້ານໂດລາ ຊຶ່ງເຮັດໃຫ້ບໍລິສັດນີ້ກາຍເປັນນຶ່ງ ໃນບັນດາບໍລິສັດທີ່ມີມູນຄ່າ
ສູງທີ່ສຸດຢູ່ໃນສະຫະລັດ.