ການຮັບຟັງຄະດີ ກ່ຽວກັບຄຳຮ້ອງຂອງສະຫະລັດ ເພື່ອໃຫ້ສົ່ງມອບຄົນຮ້າຍຂ້າມແດນ ຄື ຜູ້ກໍ່ຕັ້ງ ອົງການວີກີລີກ ທ່ານຈູລຽນ ອາຊານຈ໌ ໄດ້ເປີດຂຶ້ນຢູ່ໃນນະຄອນລອນດອນ ໃນວັນຈັນມື້ນີ້.
ຜູ້ພິພາກສາທ່ານນຶ່ງ ຢູ່ທີ່ສານ Woolwich Crown ຈະຮັບຟັງຂໍ້ໂຕ້ແຍ້ງຕ່າງໆ ຈາກບັນດາທະນາຍຄວາມທີ່ວ່າຄວາມ ຕາງໜ້າໃຫ້ແກ່ ສະຫະລັດ ທີ່ໄດ້ແຈ້ງໂທດ 17 ກະທົງ ຖານເປັນສາຍລັບ ແລະ ອີກຖານນຶ່ງ ຂອງການລັກເຈາະຂໍ້ມູນຄອມພິວເຕີ.
ຖ້າໄດ້ຖືກພົບເຫັນວ່າ ມີຄວາມຜິດ ທ່ານຈູລີອຽນ ອາຊານຈ໌ ອາຍຸ 48 ປີ ຊາວອອສເຕຣເລຍ ຜູ້ໄດ້ຖືກຄວບຄຸມຕົວ ຈະປະເຊີນກັບໂທດສູງສຸດ ເປັນການຖືກຂັງຄຸກ 175 ປີ.
ຂໍ້ກ່າວຫາດັ່ງກ່າວ ແມ່ນພົວພັນກັບ ອົງການວິກີລີກ ທີ່ໄດ້ເປີດເຜີຍຂໍ້ມູນລັບຕ່າງໆ ຈາກກະຊວງການຕ່າງປະເທດສະຫະລັດ ແລະທຳນຽບຫ້າແຈ ທີ່ໄດ້ໃຫ້ລາຍລະອຽດແຜນການສູ້ບົບຂອງກອງທັບສະຫະລັດ ຢູ່ໃນອັຟການິສຖານ ແລະອີຣັກ ພ້ອມດ້ວຍໂທລະເລກຕ່າງໆ ທີ່ໄດ້ສົ່ງໄປຫາບັນດາເຈົ້າໜ້າທີ່ຂອງກກະຊວງການຕ່າງປະເທດ ຈາກສະຖານທູດສະຫະລັດ ຢູ່ໃນປະເທດ ແຫ່ງຕ່າງໆທົ່ວໂລກ ແລະຂໍ້ມູນທີ່ສະໜອງຈາກບັນດາເຈົ້າໜ້າທີ່ລັດ ແລະສ່ວນບຸກຄົນ ຜູ້ທີ່ຮ່ວມໄມ້ຮ່ວມມືກັບສະຫະລັດ.
ພວກສະໜັບສະໜຸນຂອງທ່ານອາຊານຈ໌ ຊຶ່ງລວມໃນນັ້ນ ກໍແມ່ນດາຣາດັງຫຼາຍຄົນ ຈາກວົງການດົນຕີ ຕະຫຼອດເຖິງ ວົງການແຟຊັ້ນ ກໍໄດ້ໂຕ້ແຍ້ງວ່າ ການຟ້ອງຮ້ອງຕໍ່ທ່ານອາຊານຈ໌ ນັ້ນ ຈາກຕັ້ງແຕ່ຕົ້ນ ເປັນເລື້ອງການການເມືອງ ແລະເລື້ອງສ່ວນຕົວ ແລະໄດ້ຮຽກຮ້ອງໃຫ້ປ່ອຍຕົວທ່ານສະ.
ອົງການເພື່ອການຂ່າວທັງຫຼາຍ ໄດ້ປຸ້ມລຸມກັນໃຫ້ການສະໜັບສະໜຸນ ທ່ານອາຊານຈ໌ ໂດຍເອີ້ນຂໍ້ກ່າວຫາທັງຫຼາຍຕໍ່ທ່ານ ນັ້ນ ເປັນການໂຈມຕີຕໍ່ເສລີພາບຂອງການຂ່າວ.
