ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ນັກຊ່ຽວຊານກ່າວວ່າ ການສະເໜີເຂົ້າຮ່ວມກຸ່ມ BRICS, ໂດຍສ່ວນໃຫຍ່ແລ້ວ ແມ່ນເປັນສັນຍາລັກ


ແຟ້ມຮູບ-ຜ້າແພທີ່ສະໜັບສະໜູນກອງປະຊຸມສຸດຍອດ BRICS, ຫ້ອຍຢູ່ເສົາ ດ້ານນອກສູນປະຊຸມໃຫຍ່ແຊນຕັນ (Sandton) ໃນນະຄອນໂຈຮັນເນສເບີກ, ອາຟຣິກາໃຕ້, ວັນທີ 19 ສິງຫາ 2023.
ແຟ້ມຮູບ-ຜ້າແພທີ່ສະໜັບສະໜູນກອງປະຊຸມສຸດຍອດ BRICS, ຫ້ອຍຢູ່ເສົາ ດ້ານນອກສູນປະຊຸມໃຫຍ່ແຊນຕັນ (Sandton) ໃນນະຄອນໂຈຮັນເນສເບີກ, ອາຟຣິກາໃຕ້, ວັນທີ 19 ສິງຫາ 2023.

ໄທ ມີຄວາມ​ປາດ​ຖະໜາ​ຢາກ​ເຂົ້າ​ເປັນ​ສະມາຊິກ ຂອງ​ກຸ່ມ BRICS ປະເທດທໍາອິດຈາກຂົງເຂດເອເຊຍ​ຕາ​ເວັນ​ອອກ​ສ່ຽງ​ໃຕ້, ເຊິ່ງ​ເປັນ​ກຸ່ມທາງດ້ານ​ພູມ​ສາດ​ການ​ເມືອງ​ຂອງ​ບັນດາ​ປະ​ເທດ​ກໍາລັງ​ພັດທະນາ​ ລວມມີ ​ບຣາຊີລ, ຣັດ​ເຊຍ, ອິນ​ເດຍ, ຈີນ ​ແລະ ​ອາ​ຟຣິກາ​ໃຕ້.

ຄະນະ​ລັດຖະບານຂອງ​ໄທ​ ໄດ້​ອະນຸມັດຮ່າງ​ເອກະສານ​ຂໍສະ​ໝັກເຂົ້າ​ເປັນສະມາຊິກ ໃນ​ວັນ​ທີ 28 ພຶດສະພາ ​ທີ່ຜ່ານນີ້, ​ໂດຍ​ສະ​ແດງ​ໃຫ້​ເຫັນ​ຄວາມ​ຕັ້ງ​ໃຈ​ຂອງ​ປະ​ເທດ ​ທີ່​ຈະ​ເຂົ້າ​ຮ່ວມນໍາ​ກຸ່ມດັ່ງກ່າວ.

ແຕ່​ບັນດາ​ນັກ​ຊ່ຽວຊານ​ສະ​ເໜີໃຫ້ເຫັນ​ວ່າ ການ​ເຂົ້າ​ເປັນ​ສະມາຊິກ​ ອາດ​ຈະສະໜອງ​ໃຫ້​ປະ​ເທດ​ໄທ, ເຊິ່ງເປັນປະເທດທີ່ມີ​ເສດຖະກິດ​ໃຫຍ່​ອັນ​ດັບ​ສອງ​ຂອງ​ເອເຊຍຕາ​ເວັນ​ອອກ​ສ່ຽງ​ໃຕ້, ​ໂດຍ​ສ່ວນ​ໃຫຍ່​ແມ່ນເປັນ​ສັນຍະລັກ ​ແທນ​ທີ່​ຈະ​ໄດ້​ຮັບ​ຜົນ​ປະ​ໂຫຍ​ດຢ່າງ​ຈິງ​ຈັງ ລວມມີ ​ສັນຍາ​ການ​ຄ້າ​ເສລີ​ທີ່​ມີ​ຢູ່​ແລ້ວ ​ກັບ​ບັນດາ​ປະ​ເທດຕ່າງໆ ​ເຊັ່ນ: ​ຈີນ.

ແນວໃດ​ກໍ​ຕາມ, ລັດຖະບານຂອງນາຍົກລັດຖະມົນຕີ ທ່ານເສດຖາ ທະວີສິນ ມີ​ແຜນ​ຈະ​ດໍາເນີນການຍື່ນ​ຄຳ​ຮ້ອງຂໍ​ສະ​ຫມັກ​ຕໍ່ໄປ ​ໃນລະຫວ່າງ​ກອງ​ປະຊຸມ​ສຸດ​ຍອດຂອງກຸ່ມ BRICS ທີ່​ຈະ​ຈັດ​ຂຶ້ນ​ໃນ​ເດືອນຕຸລາ ຢູ່ເມືອງຄາຊານ (Kazan), ປະ​ເທດ ​ຣັດ​ເຊຍ.

ໄທ​ຄາດ​ວ່າ ​ການ​ເຂົ້າ​ເປັນ​ສະມາຊິກ​ໃນກຸ່ມ BRICS ຂອງຕົນ ຈະ​ເພີ້ມ​ທະວີ​ການ​ມີສ່ວນ​ຮ່ວມ​ໃນ​ນະ​ໂຍບາຍ​ເສດຖະກິດ​ສາກົນ ​ແລະ “ສ້າງ​ຄວາມ​ເປັນ​ລະບຽບ​ຮຽບຮ້ອຍ​ຂອງ​ໂລກໃໝ່,” ອີງ​ຕາມ​ຖະ​ແຫຼງການ​ໂດຍໂຄສົກ​ລັດຖະບານ ທ່ານຊາຍ ວາຊາຣົງ (Chai Wacharonke).

ທ່ານມິເຫຣາ ປາປາ (Mihaela Papa), ສະມາຊິກອາວຸໂສຂອງໂຮງຮຽນ Fletcher ຢູ່ທີ່ມະຫາວິທະຍາໄລ Tufts ກ່າວຕໍ່ VOA ຜ່ານທາງອີເມລວ່າ “ແນ່ນອນ, ການເຂົ້າຮ່ວມກຸ່ມ BRICS ຂອງໄທ ໝາຍເຖິງການເປີດວາລະ ແລະອິດທິພົນຂອງຈີນ ພ້ອມທັງ ຣັດເຊຍ ໃຫ້ຫຼາຍຂຶ້ນກວ່າເກົ່າ.”

ຄວາມກະຕືລືລົ້ນໃນການເຂົ້າຮ່ວມກຸ່ມ BRICS ຂອງໄທ ທີ່ສະຫນັບສະຫນູນຄວາມພະຍາຍາມໂດຍຜູ້ຮ່ວມກໍ່ຕັ້ງ ຈີນ ແລະ ຣັດເຊຍ ເພື່ອຂະຫຍາຍອິດທິພົນທາງດ້ານເສດຖະກິດຂອງພວກເຂົາ ຢູ່ໃນຂົງເຂດເອເຊຍຕາເວັນອອກສຽງໃຕ້, ອີງຕາມການກ່າວຕໍ່ VOA ຂອງ ທ່ານຊຸມຢາ ບາວມິກ (Soumya Bhowmick), ສະມາຊິກສະມາຄົມຂອງອົງການ Observer Research Foundation ໃນເມືອງໂກລກາຕ້າ (Kolkata), ປະເທດອິນເດຍ.

ທ່ານ​ກ່າວ​ວ່າ “​ໂດຍ​ການ​ເຂົ້າ​ຮ່ວມ​ໃນກຸ່ມ BRICS, ​ໄທ ຈະ​ສາມາດ​ປະກອບສ່ວນໃນການ​ສ້າງ​ອິດ​ທິພົນ​ດ້ານ​ນະ​ໂຍບາຍ​ເສດຖະກິດ​ທົ່ວ​ໂລກຂອງກຸ່ມ, ​ໂດຍ​ສະ​ເພາະ ແມ່ນການ​ສະໜັບສະໜູນ​ເປົ້າ​ໝາຍ​ຍຸດ​ທະ​ສາດຢູ່ໃນພາກພື້ນ​ ຂອງ ​ຈີນ ​ແລະ ຣັດ​ເຊຍ​.”

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG