ທີມນັກຊ່ຽວຊານນາໆຊາດຄະນະນຶ່ງ ໄດ້ໄປຮອດບ່ອນ
ຖ້ຽວບິນ MH 17 ຂອງສາຍການບິນມາເລເຊຍ ຕົກ ໃນ
ພາກຕາເວັນອອກຂອງຢູເຄຣນ ເປັນເທື່ອທຳອິດ ໃນວັນ
ພະຫັດມື້ນີ້ ຫລັງຈາກໄດ້ພະຍາຍາມ ຢ່າງບໍ່ສຳເລັດຜົນ
ມາເປັນເວລາຫລາຍມື້ ຍ້ອນຄວາມຮຸນແຮງ ຢູ່ໃນເຂດ
ດັ່ງກ່າວທີ່ຄວບຄຸມໂດຍພວກຢາກແບ່ງແຍກດິນແດນນັ້ນ.
ອົງການຄວາມໝັ້ນຄົງແລະການຮ່ວມມືໃນຢູໂຣບ ໄດ້ປະກາດ
ໃຫ້ຊາບກ່ຽວກັບການເຄື່ອນໄຫວດັ່ງກ່າວໃນມື້ນີ້. ການເຂົ້າໄປ
ເຖິງບໍລິເວນດັ່ງກ່າວ ແມ່ນໝາຍຄວາມວ່າ ບັດນີ້ ຄະນະຊ່ຽວຊານ
ຈະສາມາດເລີ້ມຕົ້ນເກັບກຳເອົາຫລັກຖານທີ່ສຳຄັນໆຈາກບ່ອນ
ເຮືອບິນຕົກ ຕະຫລອດທັງຊາກສົບ ທີ່ຍັງບໍ່ໄດ້ຖືກຍົກຍ້າຍ ແລະຈັດສົ່ງໄປຍັງເນເທີແລນ
ເພື່ອພິສູດຊື່ສຽງເທື່ອນັ້ນ.
ສ່ວນທາງຢູເຄຣນ ກໍໄດ້ປະກາດ ຍຸດການຕໍ່ສູ້ກັບພວກແບ່ງແຍກດິນແດນນິຍົມຣັດເຊຍ
ໃນພາກຕາເວັນອອກຂອງຢູເຄຣນ ເປັນເວລານຶ່ງມື້ ເພື່ອປ່ອຍໃຫ້ບັນດານັກສືບສວນ
ສອບສວນສາກົນ ເຂົ້າໄປເຖິງບໍລິເວນ ຂອງເຮືອບິນຕົກນັ້ນ.
ທີມນັກຊ່ຽວຊານນາໆຊາດ ໄປຮອດບ່ອນຖ້ຽວບິນ MH 17 ຕົກແລ້ວ
ລັດຖະບານ Kyiv ກ່າວວ່າ ການເອົາບາດກ້າວດັ່ງກ່າວໃນວັນພະຫັດມື້ນີ້ ແມ່ນເປັນການ
ສະໜອງຕອບຄຳຮຽກຮ້ອງຂອງເລຂາທິການໃຫຍ່ສະຫະປະຊາຊາດ ທ່ານ Ban
Ki-moon ທີ່ຂໍໃຫ້ຍຸດຕິການຕໍ່ສູ້ກັນ ແລະປ່ອຍໃຫ້ທີມສືບສວນນໆຊາດເຂົ້າໄປ.
ບັນດາຄອບຄົວຂອງພວກໄດ້ຮັບເຄາະຮ້າຍຈາກເຮືອບິນຕົກນັ້ນ ຊຶ່ງໄດ້ເຮັດໃຫ້ ລູກເຮືອ
ພ້ອມດ້ວຍຜູ້ໂດຍສານທັງໝົດ 298 ຄົນເສຍຊີວິດ ໃນວັນທີ 17 ກໍລະກົດທີ່ຜ່ານມານັ້ນ
ຍັງລໍຖ້າດ້ວຍຄວາມກະຕືລືລົ້ນ ຢາກໃຫ້ບັນດານັກສືບສວນສອບສວນສາກົນ ເຂົ້າໄປເຖິງ
ຈຸດເກີດເຫດ. ໂດຍເຊື່ອກັນວ່າ ຍັງມີຊິ້ນສ່ວນສົບຢູ່ສະຖານທີ່ເກີດເຫດ ຫຼັງຈາກ ຊາກສົບ
ປະມານ 200 ຊຸດ ໄດ້ຖືກນຳສົ່ງໄປຍັງເນເທີແລນແລ້ວ ເພື່ອພິສູດຊື່ສຽງ ໃນອາທິດແລ້ວນີ້.
