ມາເລເຊຍກ່າວວ່າ ຕົນໄດ້ບັນລຸຂໍ້ຕົກລົງກັບ ພວກຢາກແບ່ງ
ແຍກດິນແດນນິຍົມຣັດເຊຍຂອງຢູເຄຣນແລ້ວ ເພື່ອອຳນວຍ
ໃຫ້ຕຳຫລວດເຂົ້າໄປຍັງບໍລິເວນເຮືອບິນມາເລເຊຍ ທີ່ຖືກຍິງ
ຕົກນັ້ນໄດ້ ໃນພາກເໜືອຂອງຢູເຄຣນ.
ຫ້ອງວ່າການນາຍົກລັດຖະມົນຕີ Najib Razak ກ່າວວ່າ
ຕຳຫລວດມາເລເຊຍຈະໄດ້ຮັບອະນຸຍາດ ໃຫ້ເຂົ້າໄປໃນ
ບໍລິເວນນັ້ນ “ເພື່ອສະໜອງການຄຸ້ມຄອງໃຫ້ແກ່ພວກ
ນັກສືບສວນເຮືອບິນຕົກນາໆຊາດ.”
ໃນວັນອາທິດມື້ນີ້ເຊັ່ນກັນ ນາຍົກລັດຖະມົນຕີອອສເຕຣເລຍ
ທ່ານ Tony Abbott ກ່າວວ່າ ອອສເຕຣເລຍກໍຈະສົ່ງຕຳຫລວດ ທີ່ບໍ່ປະກອບອາວຸດ
ໄປຍັງບໍລິເວນເຮືອບິນຕົກ ໃນເຂດທີ່ພວກກະບົດຄວບຄຸມນັ້ນ ຊຶ່ງຈະເປັນສ່ວນນຶ່ງ ຂອງ
ກຳລັງຕຳຫລວດ ທີ່ນຳພາໂດຍໂຮລລັງ ເພື່ອ ຄຸ້ມກັນບໍລິເວນດັງກ່າວໃຫ້ປອດໄພ ແລະ
ຊ່ວຍກູ້ເອົາສິ່ງເສດເຫລືອ ຂອງພວກໄດ້ຮັບເຄາະ.
ຊາກສົບ 227 ສົບ ໄດ້ຖືກຈັດສົ່ງໄປຍັງເນເທີແລນດ໌ ຫລືໂຮລລັງແລ້ວ ມາຮອດປັດຈຸບັນ
ແຕ່ພວກສັງເກດການ ໃນຢູເຄຣນເວົ້າວ່າ ຍັງມີຊາກສົບ ຈຳນວນນຶ່ງ ຢາຍຢູ່ບໍລິເວນເຮືອ
ບິນຕົກ ທ່າມກາງຄວາມຮ້ອນເອົ້າ ຂອງລະດູຮ້ອນ. ເຂົາເຈົ້າກ່າວວ່າ ຄວາມເປັນຫ່ວງ
ດ້ານຄວາມປອດໄພ ເຮັດໃຫ້ບໍ່ກ້າເຂົ້າໄປກູ້ເອົາສົບ ທີ່ຍັງເຫລືອນັ້ນ.
ພວກຫົວແບ່ງແຍກດິນແດນທີ່ນິຍົມຣັດເຊັຍໄດ້ຖືກຖີ້ມໂທດໃສ່ ວ່າເປັນຜູ້ຍິງຖ້ຽວບິນ 17
ຂອງສາຍການບິນມາເລເຊຍຕົກ ໂດຍລູກສອນໄຟຕໍ່ຕ້ານອາກາດສະຍານ ເຮັດໃຫ້ທັງ
ໝົດ 298 ຄົນໃນເຮືອບິນເສຍຊີວິດ.
ຂະນະດຽວກັນ ການຕໍ່ສູ້ຍັງດຳເນີນໄປ ໃນເມືອງ Donetsk ຢູ່ພາກຕາເວັນອອກຂອງ
ຢູເຄຣນ ໃກ້ໆກັນນັ້ນ ໃນຂະນະທີ່ກຳລັງທະຫານ ຂອງຢູເຄຣນດິ້ນຮົນ ໃນການໂຈມຕີ
ໃສ່ບໍລິເວນຕ່າງໆ ທີ່ພວກກະບົດຄວບຄຸມຢູ່ນັ້ນ.
ໂຄສົກລັດຖະບານຢູເຄຣນ ກ່າວໃນວັນເສົາວານນີ້ວ່າ ກຳລັງທະຫານພວກມຸ້ງໜ້າເຂົ້າໄປ
ໃນເມືອງ ແລະຣັດເຊຍກໍຍັງສືບຕໍ່ເຕົ້າໂຮມກຳລັງທະຫານຂອງຕົນ ຢູ່ຕາມຊາຍແດນພາກ
ຕາເວັນອອກຂອງຢູເຄຣນ.