ອະດີດຈອມຜະເດັດການຟິລິບປີນ ທ່ານ Ferdinand Marcos ໄດ້ຖືກນຳໄປຝັງດ້ວຍກອງກຽດຕິຍົດທະຫານໃນວັນສຸກມື້ນີ້ 30 ປີ ຫລັງຈາກທີ່ທ່ານໄດ້ຖືກຂັບໄລ່ອອກຈາກອຳນາດ ໂດຍການປະຕິວັດຂອງປະຊາຊົນ.
ພິທີໄດ້ເລີ້ມຂຶ້ນດ້ວຍການຍິງປືນໃຫຍ່ສະດຸດີ 21 ນັດ ໃນຂະນະທີ່ພວກທະຫານ ໃສ່ເຄື່ອງແບບສວນສະໜາມ ແລະຢືນຈັບປືນ ຢູ່ທີ່ “ສຸສານວີລະບຸລຸດ” ໃນນະຄອນຫຼວງມະນີລາ.
ເຖິງແມ່ນວ່າໄດ້ມີການຄັດຄ້ານເພີ້ມຂຶ້ນຈາກຫຼາຍໆຝ່າຍ ທີ່ປະກອບດ້ວຍບັນດາ ຜູ້ເຄາະ ຮ້າຍ ໃນການລະເມີດສິດທິມະນຸດ ຊາວຟີລິບປີນ ຈາກລະບອບຜະເດັດການ ຂອງທ່ານ Marcos ສານສູງສຸດຂອງຟິລິບປີນໄດ້ຕັດສິນ ໃນອາທິດແລ້ວນີ້ວ່າ ທ່ານ Marcos ສາ ມາດນຳໄປຝັງໄວ້ ຢູ່ສຸສານແຫ່ງຊາດໄດ້.
ປະທານາທິບໍດີຟິລິບປີນ ທ່ານ Rodrigo Duterte ໄດ້ໃຫ້ການອະນຸມັດຕໍ່ການຝັງສົບ ຂອງອະດີດຈອມຜະເດັດການໂດຍບໍ່ເອົາຫົວຊາກັບການບໍ່ເຫັນພ້ອມຂອງ ພວກຝ່າຍຄ້ານ. ສົບຂອງທ່ານ Marcos ໄດ້ຖືກສົ່ງໄປນະຄອນ Manila ຢ່າງລັບໆໃນຄວາມພະ ຍາຍາມເພື່ອຫລີກລ່ຽງການປະທ້ວງ.
ຕຳຫລວດປາບຈະລາຈົນ ແລະທະຫານໄດ້ຢືນຍາມຢູ່ໃນບໍລິເວນອ້ອມແອ້ມສຸສານວີລະບຸລຸດ ແລະກໍບໍ່ໄດ້ມີພວກປະທ້ວງໃດໆເກີດຂຶ້ນ.
ຄອບຄົວທ່ານ Marcos ໄດ້ຫລົບໜີ ຈາກຟິລິບປີນ ໃນລະຫວ່າງທີ່ມີການປະຕິວັດຂອງປະຊາຊົນທີ່ໄດ້ຮັບການໜຸນຫລັງຈາກພວກທະຫານ ທີ່ໄດ້ກໍ່ໃຫ້ເກີດມີການເຄື່ອນໄຫວເພື່ອປະຊາທິປະໄຕອື່ນໆຢູ່ໃນເຂດເອເຊຍ.
ທ່ານ Marcos ໄດ້ເຖິງແກ່ມໍລະນະກຳ ຂະນະທີ່ລີ້ໄພ ຢູ່ລັດ Hawaii ໃນປີ 1989 ແລະສົບຂອງທ່ານໄດ້ຖືກສົ່ງໄປເມືອງ Batac ບ້ານເກີດຂອງທ່ານໃນ ພາກເໜືອຂອງຟິລິບປີນ ໃນປີ 1993. ນັບແຕ່ນັ້ນມາ ສົບຂອງທ່ານໄດ້ຖືກນຳໄປດອຍໄວ້ຢູ່ໃນໂລງແກ້ວແລະກາຍມາເປັນທີ່ດຶງດູດສຳລັບພວກນັກທ່ອງທ່ຽວ.
