ອະດີດຜູ້ບໍລິຫານລະດັບສູງ ຂອງ ຮົງກົງ ທ່ານ Donald Tsang ໄດ້ຖືກກ່າວໂທດດ້ວຍສອງຂໍ້ຫາກ່ຽວກັບພຶດຕິກຳທີ່ບໍ່ເໝາະສົມ ທາງລັດຖະການ, ເຊິ່ງທ່ານໄດ້ກາຍເປັນເຈົ້າໜ້າທີ່ລັດຖະບານທີ່ມີຕຳແໜ່ງສູງທີ່ສຸດຂອງດິນແດນດັ່ງກ່າວ ທີ່ປະເຊີນໜ້າກັບກະທູ້ການສໍ້ລາດບັງຫຼວງ.
ຄະນະກຳມາທິການອິດສະຫຼະ ຕໍ່ຕ້ານ ການສໍ້ລາດບັງຫຼວງ ໄດ້ເປີດເຜີຍຖະແຫຼງການໃນວັນຈັນມື້ນີ້ ລະບຸເຖິງຂໍ້ມູນກ່ຽວກັບຂໍ້ກ່າວໂທດຕໍ່ທ່ານ Tsang ທີ່ມີອາຍຸ 70 ປີ, ເຊິ່ງເຄີຍເປັນຜູ້ນຳຂອງ ຮົງກົງ ຈາກປີ 2005 ຫາ 2012. ທ່ານໄດ້ຖືກກ່າວຫາວ່າບໍ່ເປີດເຜີຍເຖິງການເຊົ່າຫ້ອງພັກທີ່ຫຼູຫຼາໃນເມືອງ Shenzhen ປະເທດ ຈີນ ຈາກນັກລົງທຶນຄົນໜຶ່ງ ທີ່ຢາກໄດ້ລາຍເຊັນຈາກລັດຖະບານ. ຄະນະກຳມະທິການກໍຍັງໄດ້ກ່າວໂທດທ່ານ Tsang ວ່າບໍ່ເປີດເຜີຍໃຫ້ຊາບ ວ່າທ່ານໄດ້ສະເໜີລາງວັນ ໃຫ້ລັດຖະບານ ສຳລັບນັກອອກແບບທີ່ທ່ານໄດ້ຈ້າງເພື່ອຕົກແຕ່ງໃໝ່ຫ້ອງເຊົ່າດັ່ງກ່າວ.
ທ່ານ Tsang ໄດ້ຖືກປະກັນໂຕຫຼັງຈາກໄດ້ປະກົດຕົວຕໍ່ຕຸລາການສານໃນຕອນເຊົ້າຂອງວັນຈັນມື້ນີ້ ເພື່ອປະເຊີນໜ້າກັບຂໍ້ກ່າວຫາດັ່ງກ່າວ. ທ່ານໄດ້ປະກາດຄວາມບໍລິສຸດໃນການລາຍງານຕໍ່ໜັງສືພິມ South China Morning Post, ໂດຍກ່າວວ່າຄວາມບໍລິສຸດຂອງ ທ່ານແມ່ນ ຊັດເຈນ. ທ່ານໄດ້ຂຽນວ່າ “ຂ້າພະເຈົ້າໝັ້ນໃຈຫຼາຍວ່າສານຈະໃຫ້ ອະໄພແດ່ຂ້າ ພະເຈົ້າຫຼັງຈາກການປະຕິບັດຕາມກົດໝາຍຂອງ ພວກເພິ່ນ.”
ຄະດີດັ່ງກ່າວແມ່ນໜຶ່ງໃນຫຼາຍຄະດີ ໃນສອງສາມປີຜ່ານມາ ເຊິ່ງໄດ້ເພີ່ມຄວາມເປັນຫ່ວງ ໃນດິນແດນກ່ຽວກັບສາຍພົວພັນອັນໃກ້ຊິດ ລະຫວ່າງເຈົ້າໜ້າທີ່ລັດຖະບານ ແລະ ນັກທຸ ລະກິດທີ່ລ້ຳລວຍ. ອະດີດ ເຈົ້າໜ້າທີ່ລັດຖະບານ ທ່ານ Rafael Hui ໄດ້ຖືກຕັດສິນຈຳຄຸກ ເຈັດປີເຄິ່ງ ເມື່ອເດືອນທັນວາທີ່ຜ່ານມາ ສຳລັບການຮັບເງິນສິນບົນ ຈາກນັກພັດທະນາ ຮົງກົງ ທີ່ມີອິດທິພົນສູງ.
