ອີນເດຍ ຊອກຫາຊ່ອງທາງຢາກໃຫ້ນາໆຊາດອອກໝາຍຈັບຜູ້ຕ້ອງສົງ ໄສຊາວອີຣ່ານ 3 ຄົນຊຶ່ງເປັນສ່ວນນຶ່ງຂອງການວາງແຜນໂຈມຕີພວກ ນັກການທູດອິສຣາແອລນັ້ນ.
ຜູ້ບັນຊາການຕໍາຫລວດ ທີ່ກຸງນີວແດລີ ທ່ານ Brijesh Gupta ກ່າວໃນວັນສຸກນີ້ວ່າ ອີນເດຍໄດ້ຕິດຕໍ່ໄປຫາອົງການຕໍາຫລວດສາກົນ ກ່ຽວກັບການອອກໝາຍຈັບຜູ້ຊາຍທັງສາມ ຊຶ່ງຄິດວ່າ ຢູ່ເບື້ອງຫລັງການ ວາງລະເບີດໃສ່ລົດຂອງສະຖານທູດອິສຣາແອລ. ທ່ານກ່າວອີກວ່າ ໜ່ວຍສືບສວນຍັງພົບເຫັນວ່າບຸກຄົນທັງສາມພົວພັນກັບການວາງລະເບີດທີ່ບໍ່ສໍາເລັດຢູ່ໃນປະເທດໄທ.
ການໂຈມຕີໃນວັນທີ 14 ເດືອນກຸມພາຜ່ານມາ ຢູ່ທີ່ກຸງນີວແດລີນັ້ນໄດ້ເຮັດໃຫ້ພັນລະຍາຂອງເຈົ້າໜ້າທີ່ສະຖານທູດໄດ້ຮັບບາດເຈບໃນຂະນະທີ່ນາງກໍາລັງໄປຮັບເອົາລູກຢູ່ໂຮງຮຽນ. ເຈົ້າໜ້າທີ່ຕໍາຫລວດກ່າວວ່າ ພວກໂຈມຕີໄດ້ເອົາລູກລະເບີດໄປຕິດໃສ່ລົດໂດຍໃຊ້ເຫລັກກ້າ. ເຈົ້າໜ້າທີ່ຕໍາຫລວດໄທກ່າວວ່າ ເຫັລກກ້າຊະນິດດຽວກັນນີ້ ໄດ້ຖືກໄຊ້ກັບລະເບີດທີ່ແຕກກ່ອນກໍາໜົດມື້ນຶ່ງຢູ່ໃນບາງກອກ.
ເຈົ້າໜ້າທີ່ຕໍາຫລວດໄທ ໄດ້ຈັບກຸມຊາວອີຣ່ານສອງຄົນ ທີ່ພົວພັນກັບລະເບີດທີ່ແຕກຢູ່ບາງກອກ ຜູ້ຊາຍຄົນທີ່ສາມນາຍ Sedaghatzadeh Masoud ໄດ້ຖືກກັກຂັງໄວ້ຢູ່ທີ່ມາເລເຊຍ.
ໃນວັນສຸກມື້ນີ້ ຫົວໜ້າຕໍາຫລວດກຸງນີວແດນລີ ກ່າວວ່າ ໜ່ວຍສືບ ສວນໄດ້ພິຈາລະນາວ່າຜູ້ຕ້ອງສົງໄສທີ່ກຸງນີວແດລີໄດ້ຕິດຕໍ່ກັບນາຍ Masoud.
ອິສຣາແອນ ກ່າວຫາຢ່າງເປີດເຜີຍວ່າ ອີຣ່ານ ພະຍາຍາມນໍາພາການໂຈມຕີຫຼາຍໆຄັ້ງ ຮ່ວມທັງການວາງລະເບີດທີ່ນະຄອນຫຼວງ Tbili ປະ ເທດ Georgia ແຕ່ອີຣ້ານ ໄດ້ປະຕິເສດຕໍ່ຂໍ້ກ່າວຫາດັ່ງກ່າວ.