ສະຫະພາບຢູໂຣບ ຫຼື ອີຢູ ກ່າວວ່າ ການເຈລະຈາເລື່ອງ
ນິວເຄລຍ ລະຫວ່າງ 6 ປະເທດມະຫາອຳນາດ ກັບ ອີຣ່ານ
ນັ້ນ ຈະເລີ່ມຄືນອີກ ໃນອາທິດໜ້ານີ້ ຢູ່ທີ່ນະຄອນຫຼວງ ວຽນນາ
ຂອງປະເທດອອສເຕຣຍ.
ບັນດາເຈົ້າໜ້າທີ່ ກ່າວໃນວັນອັງຄານວານນີ້ ວ່າ ບັນດານັກ
ເຈລະຈາ ຈາກ ອີຢູ ແລະ ອີຣ່ານ ຈະພົບປະກັນ ໃນວັນທີ 12
ພຶດສະພາຈະມາເຖິງນີ້. ສ່ວນບັນດາເຈົ້າໜ້າທີ່ ຈາກອັງກິດ ຈີນ
ຝຣັ່ງ ເຢຍຣະມັນ ຣັດເຊຍ ແລະ ສະຫະລັດ ທີ່ເອີ້ນວ່າ ກຸ່ມ P5
ບວກ 1 ນັ້ນ ຈະເຂົ້າ ຮ່ວມການເຈລະຈາ ສາມມື້ຕໍ່ໄປ ຄືໃນວັນທີ
15 ພຶດສະພາ.
ເມື່ອເດືອນແລ້ວນີ້ ທັງສອງຝ່າຍໄດ້ບັນລຸ ຂໍ້ຕົກລົງກັນກ່ຽວກັບໂຄງຮ່າງຂອງສັນຍາ ທີ່ຈະ
ເຮັດກັນ ແລະ ບັດນີ້ ກຳລັງພະຍາຍາມ ທີ່ຈະເຮັດລາຍລະອຽດຕ່າງໆ ຂອງສັນຍາ ສະບັບ
ສຸດທ້າຍນັ້ນ ໃຫ້ແລ້ວເສັດ ພາຍໃນວັນເສັ້ນຕາຍ ຄືວັນທີ 30 ມີຖຸນາ.
ອີຣ່ານຈະຕັດ ໂຄງການເສີມສະມັດຖະພາບທາດຢູເຣນຽມ ຂອງຕົນລົງ ເພື່ອບໍ່ໃຫ້ສາມາດ
ນຳມາສ້າງ ເປັນລະເບີດນິວເຄລຍໄດ້. ແລະເພື່ອເປັນການແລກປ່ຽນ ອົງການສະຫະປະ
ຊາຊາດ ແລະ ພວກປະເທດຕາເວັນຕົກ ຈະຜ່ອນຜັນມາດຕາການລົງໂທດຕ່າງໆ ທີ່ໄດ້
ທັບມ້າງເສດຖະກິດຂອງອີຣ່ານນັ້ນ ລົງ.
ພວກລາຍລະອຽດທີ່ຍັງຈະຕ້ອງໄດ້ເຮັດກັນນັ້ນ ມີລວມທັງການຕົກລົງ ກັນວ່າ ຈະຍົກເລີກ
ການລົງໂທດຕ່າງໆນັ້ນ ໄວສ່ຳໃດ.
ອີຣ່ານ ແມ່ນຢືນຢັດວ່າ ການລົງໂທດນັ້ນ ຕ້ອງຍຸດຕິໃນທັນທີ ເມື່ອໃດ ທີ່ບັນລຸຂໍ້ຕົກລົງຂັ້ນ
ສຸດທ້າຍກັນແລ້ວ.
ແຕ່ສະຫະລັດກ່າວວ່າ ຕົນຈະຕ້ອງໄດ້ຮັບການພິສູດ ແລະ ຢືນຢັນເສຍກ່ອນວ່າ ອີຣ່ານໄດ້ປະຕິບັດຕາມ ຂໍ້ຕົກລົງນັ້ນ ຫລືບໍ່.
