ລິ້ງ ສຳຫລັບເຂົ້າຫາ

ວັນອັງຄານ, ໒໑ ພຶດສະພາ ໒໐໒໔

ຕະຫຼາດຮຸ້ນ ຢູໂຣບ ແລະ ເອເຊຍ ໄດ້ຕົກ ລາຄາ ຍ້ອນຄວາມກັງວົນ ດ້ານການເມືອງ


ຊາຍຄົນນຶ່ງ ແນມເບິ່ງ ແຜ່ນຈໍອີເລັກໂທຣນິກ ຂອງລາຄາຮຸ້ນຕ່າງໆ ຢູ່ທີ່ຕະຫຼາດຮຸ້ນ Nikkei ຂອງຍີ່ປຸ່ນ ທີ່ສະແດງໃຫ້ເຫັນດັດຊະນີຂອງ 225 ບໍລິສັດຊື້ຂາຍຮຸ້ນ, ວັນທີ 18 ພຶດສະພາ 2017, ໃນນະຄອນຫຼວງໂຕກຽວ.
ຊາຍຄົນນຶ່ງ ແນມເບິ່ງ ແຜ່ນຈໍອີເລັກໂທຣນິກ ຂອງລາຄາຮຸ້ນຕ່າງໆ ຢູ່ທີ່ຕະຫຼາດຮຸ້ນ Nikkei ຂອງຍີ່ປຸ່ນ ທີ່ສະແດງໃຫ້ເຫັນດັດຊະນີຂອງ 225 ບໍລິສັດຊື້ຂາຍຮຸ້ນ, ວັນທີ 18 ພຶດສະພາ 2017, ໃນນະຄອນຫຼວງໂຕກຽວ.

ຕະຫລາດ​ຮຸ້ນ​ຢູ່​ເອ​ເຊຍ ​ແລະ​ຢູ​ໂຣບ ​ໄດ້​ຫລຸດ​ຕ່ຳລົງ​ໃນ​ວັນ​ພະຫັດ​ມື້ນີ້ ນຶ່ງ​ມື້ຫລັງ​ຈາກ
​ຕະຫລາດ​ຮຸ້ນຂອງສະຫະລັດ ເງິນໂດລາ ແລະ ພັນທະບັດຂອງລັດຖະບານໄດ້ຕົກ
ລາຄາລົງ ຖ່າມກາງຄວາມກັງວົນຂອງພວກນັກລົງທຶນກ່ຽວກັບການກະທຳ ແລະການ
​ໃຫ້ຄຳເຫັນຕ່າງໆ ຂອງປະທານາທິບໍດີ ດໍໂນລ ທຣຳ.

ດັດຊະນີຮຸ້ນທີ່ສຳຄັນໆ ຂອງສະຫະລັດ ໄດ້ຫລຸດລາຄາລົງ 1.8 ເປີເຊັນ ​ໃນ​ວັນພຸດ
​ວານ​ນີ້ ແລະ ຮຸ້ນ Dow Jones Average ​ໄດ້ຕົກລາຄາ 372 ​ໂດ​ລາ.

ການ​ຕົກ​ລາຄາ​ຂອງຕະຫລາດຮຸ້ນຕ່າງໆ ​ໄດ້​ມີ​ຂຶ້ນຫຼັງຈາກທ່ານທຣຳ ໄດ້ປົດຫົວໜ້າ
ອົງການສັນຕິບານກາງ ຫຼື FBI ອອກຈາກຕຳແໜ່ງ ຊຶ່ງມີລາຍງານວ່າ ທ່ານໄດ້ເປີດ
ເຜີຍຂໍ້ມູນລັບ ໃຫ້ແກ່ບັນດາເຈົ້າໜ້າທີ່ຂອງຣັດເຊຍ ແລະ ການກ່າວຫາວ່າ ທ່ານ
ປະທານາທິບໍດີ ອາດພະຍາຍາມທີ່ຈະກີດກັ້ນ ການສືບສວນສອບສວນ ການກະທຳ
ຕ່າງໆຂອງເຈົ້າໜ້າທີ່ຂັ້ນສູງ ທີ່ໄດ້ຖືກປົດອອກຈາກຕຳແໜ່ງໄປແລ້ວນັ້ນ.

ເງິນໂດລາ ໄດ້ມີລາຄາສູງຂຶ້ນ ແລະ ຮຸ້ນຕ່າງໆ ກໍໄດ້ຖີບໂຕສູງຂຶ້ນ ຈົນກາຍ​ເປັນ
​ປະຫວັດ​ການ ເປັນລຳດັບມາ ຫຼັງຈາກທີ່ທ່ານທຣຳໄດ້ຖືກເລືອກ ເປັນປະທານາທິບໍດີ
ໃນຂະນະທີ່ພວກນັກລົງທຶນ ເດີມພັນ ກ່ຽວ​ກັບ​ການ​ໃຫ້ຄຳໝັ້ນສັນຍາຂອງທ່ານທຣຳ
ທີ່ຈະຕັດພາສີ ແລະ ກົດລະບຽບຕ່າງໆລົງນັ້ນ ຈະກະຕຸ້ນໃຫ້ເສດຖະກິດ ຂະຫຍາຍ
ໂຕຂຶ້ນ ແລະ ສ້າງຜົນກຳໄລໃຫ້ແກ່ບໍລິສັດ.

​ແຕ່​ແນວ​ໃດ​ກໍ​ຕາມ ບັນດານັກລົງທຶນ ອາດຈະປ່ຽນແນວຄິດຂອງຕົນ ຫຼັງຈາກມີ
ຄວາມພະຍາຍາມໃນດ້ານນິຕິບັນຍັດ ທີ່ຈະຍົກເລີກ ແລະ ນຳ​ໃຊ້ແທນກົດໝາຍ
ປະກັນສຸຂະພາບ ແລະ ວາລະການຕັດພາສີລົງ ແມ່ນໄດ້ຖືກຖົກຖຽງກັນ ໃນ
ວົງການໆເມືອງ.

ແມ່ນ​ແຕ່ພັກຣີພັບບລີກັນ ທີ່ເປັນພັນທະມິດຂອງທ່ານທຣຳ ກ່າວວ່າ ການຮຽກຮ້ອງ
ຕໍ່ສະພາ ແລະການສືບສວນການກະທຳ ຂອງຄະນະລັດຖະບາທ່ານທຣຳ ແມ່ນເປັນ
ການລົບກວນ ແລະ ສ້າງຄວາມເປັນຫ່ວງ ໃຫ້ແກ່ບັນດາສະມາຊິກ ທີ່ພະຍາຍາມຈະ ຊຸກຍູ້ແຜນການຂອງທ່ານທຣຳ ໄປໜ້າ ຖ່າມກາງການຄັດຄ້ານຢ່າງໜັກຈາກພັກ
ເດໂມແຄຣັດ.

ອ່ານຂ່າວນີ້ຕື່ມ ເປັນພາສາອັງກິດ

XS
SM
MD
LG