ສະມາຊິກສະຫະພັນກຳມະບານຂອງກຣີສ ໄດ້ເລີ້ມການນັດຢຸດງານເປັນເວລາ 2 ມື້ໃນ
ວັນສຸກມື້ນີ້ ຢູ່ທີ່ນະຄອນຫຼວງເອເທັນ ເພື່ອປະທ້ວງຕໍ່ມາດຕະການປະຢັດມັດທະຍັດ
ສະບັບໃໝ່ ທີ່ຈຳເປັນຕ້ອງໄດ້ຮັບການອະນຸມັດຈາກສະມາຊິກສະພາແຫ່ງຊາດ.
ລັດຖະມົນຕີການເງິນຂອງສະຫະພາບຢູໂຣບທີ່ປະຊຸມກັນຢູ່ນະຄອນ Brussels ໃນຄືນ
ວັນພະຫັດກ່າວວ່າ ເຖິງແມ່ນສະພາແຫ່ງຊາດຂອງກຣີສ ຮັບຜ່ານມາດຕະການດັ່ງກ່າວ
ນີ້ກໍຕາມແຕ່ ກຣີສ ຍັງຕ້ອງໄດ້ຮັບເອົາເງື່ອນໄຂໃໝ່ຈຳນວນນຶ່ງ ເພື່ອຈະໄດ້ຮັບເງິນຄໍ້າ
ປະກັນກ້ອນໃໝ່ 172 ພັນລ້ານໂດລາ.
ປະທານຂອງລັດຖະມົນຕີການເງິນ ຈາກ 17 ປະເທດທີ່ໃຊ້ເງິນຢູໂຣ ທ່ານ Jean-Claude
Juncker ກ່າວວ່າ ສະພາແຫ່ງຊາດກຣິສຕ້ອງ ໄດ້ໃຫ້ການອະນຸມັດຕໍ່ມາດຕະການປະຢັດ
ມັດທະຍັດສະບັບໃໝ່ພາຍໃນວັນອາທິດນີ້ ຊຶ່ງກຣິສ ຈຳເປັນຈະຕ້ອງຕັດການໃຊ້ຈ່າຍລົງໄປ
ອີກ 430 ລ້ານໂດລາ ພາຍໃນປີນີ້ ເພື່ອປະຕິບັດຕາມເປົ້າໝາຍໃນການຫຼຸດການຂາດດຸນ
ງົບປະມານ ແລະຂໍ້ທີ່ສາມ ບັນດາຜູ້ນຳການເມືອງຂອງກຣິສ ຈະຕ້ອງໄດ້ໃຫ້ການຄໍ້າປະກັນ
ວ່າການຈັດຕັ້ງປະຕິບັດມາດຕະການໃໝ່ນີ້ ຈະດຳເນີນຕໍ່ໄປຫລັງຈາກການເລືອກຕັ້ງໃນ
ເດືອນເມສາ.
ທ່ານ Juncker ກ່າວອີກວ່າ ແຕ່ລະຂໍ້ຜູກມັດຈະຕ້ອງໄດ້ມີການຮັບເອົາກ່ອນຄະນະລັດ
ຖະມົນຕີການເງິນຈະທໍາການຕັດສິນໃຈຄັ້ງສຸດທ້າຍ ຊຶ່ງອາດຈະມີໃນກອງປະຊຸມໃນວັນ
ພຸດທີ່ຈະມາເຖິງນີ້.
ໃນຂະນະດຽວກັນນັ້ນ ລຸນຫຼັງການເຈລະຈາທີ່ຍືດຍາວທີ່ໄດ້ສີ້ນສຸດລົງໃນຕອນເຊົ້າຂອງ
ວັນພະຫັດນີ້ ພວກຜູ້ນໍາຝ່າຍການເມືອງຂອງກຣິສ ຍັງບໍ່ລົງລອຍກັນກ່ຽວກັບການ
ຂະຫຍາຍການຕັດເງິນເບ້ຍບໍານານ ໃນຂະນະທີ່ມີການຕົກລົງຈະຕັດຄ່າຈ້າງເງິນເດືອນ
ລະດັບຕໍ່າສຸດຂອງປະເທດລົງ 22 ເປີເຊັນ ແລະລົບລ້າງໜ້າວຽກການຂອງລັດຖະບານ
ເຖິງ 15,000 ຕໍາແໜ່ງ.
ກຣິສກ່າວວ່າ ຕົນຈຳເປັນຕ້ອງໄດ້ຮັບການຊ່ວຍເຫລືອຈາກສະຫະພາບຢູໂຣບ ທະນາ
ຄານກາງຂອງຢູໂຣບແລະກອງເງິນທຶນສາກົນ IMF ເພື່ອຫຼີກເວັ້ນຈາກການບໍ່ສາມາດ
ຊຳລະໜີ້ສິນ 19 ຕື້ໂດລາໃນການຈ່າຍເງິນໃຫ້ແກ່ພັນທະບັດທີ່ຈະມາຮອດໃນເດືອນມີ
ນານີ້.
ນອກນັ້ນລັດຖະບານຂອງກູງເອເທນ ໄດ້ເສັດສິ້ນການເຈລະຈາກັບຜູ້ໃຫ້ເງິນກູ້ຢືມເອກ
ກະຊົນເພື່ອຕັດລົງເຄິ່ງໜຶ່ງ ໝີ້ສິນໃນຈໍານວນ 132 ພັນລ້ານໂດລາ ທີ່ກຣີສຕິດຄ້າງນັ້ນ.
