ຍີ່ປຸ່ນເຕືອນປະຊາຊົນຂອງຕົນ ກ່ຽວກັບການໂຈມຕີຂອງພວກກໍ່ການຮ້າຍທີ່ອາດເປັນໄປໄດ້ໃນຢູໂຣບ ໂດຍໄດ້ຮ່ວມກັບອັງກິດແລະສະຫະລັດໃນການອອກຄໍາແນະນໍາໃຫ້ພວກທີ່ເດີນທາງໄປຍັງຂົງເຂດດັ່ງກ່າວ ລະວັງໄພຂົ່ມຂູ່ການໂຈມຕີທີ່ອາດຈະມີຂຶ້ນໄດ້ນັ້ນ.
ກະຊວງການຕ່າງປະເທດຍີ່ປຸ່ນກ່າວໃນວັນຈັນມື້ນີ້ວ່າ ພວກຄົນເດີນທາງຄວນຈະລະມັດລະວັງເວລາໃຊ້ລະບົບຂົນສົ່ງຂອງຫລວງ ແລະເວລາໄປເບິ່ງສະຖານທີ່ທ່ອງທ່ຽວແຫ່ງຕ່າງໆນັ້ນ.
ໃນວັນອາທິດວານນີ້ ອັງກິດໄດ້ເຕືອນປະຊາຊົນຂອງຕົນກ່ຽວກັບໄພຂົ່ມຂູ່ໃນລະດັບສູງຈາກພວກກໍ່ການຮ້າຍໃນ ປະເທດຝຣັ່ງ ແລະເຢຍຣະມັນ.
ກະຊວງການຕ່າງປະເທດຂອງສະຫະລັດກໍໄດ້ອອກຄໍາແນະນໍາເຊ່ນກັນໃຫ້ພວກຊາວອະເມຣິກັນລະມັດລະວັງ ກ່ຽວກັບການໂຈມຕີຂອງພວກກໍ່ການຮ້າຍທີ່ອາດມີຂຶ້ນໄດ້ໃນຢູໂຣບ ໂດຍເຄືອຂ່າຍ al-Qaida ແລະສະມາຊິກຂອງພວກເຂົາ.
ບັນດາເຈົ້າໜ້າທີ່ສືບລັບຝ່າຍຕາເວັນຕົກກ່າວໃນສັບປະດາຜ່ານມາວ່າ ເຂົາເຈົ້າໄດ້ພົບເຫັນແຜນການຂອງພວກນັກຕໍ່ສູ້ຫົວຮຸນແຮງ ທີ່ມີສ່ວນພົວພັນກັບເຄືອຂ່າຍal-Qaida ໃນປາກິສ ຖານ ສໍາລັບການໂຈມຕີກໍ່ການຮ້າຍໃນຫົວເມືອງໃຫຍ່ໆຂອງອັງກິດ ຝຣັ່ງ ແລະເຢຍຣະມັນ.
