ທ່ານນາງ Angela Merkel ນາຍົກລັດຖະມົນຕີເຢຍຣະມັນກ່າວວ່າ ຢູໂຣບຈຳເປັນຕ້ອງ
ໄດ້ທຳການເຄື່ອນໄຫວຫຼາຍໄປກວ່າການໃຊ້ເງິນຢູໂຣຮ່ວມກັນເພື່ອສ້າງຕັ້ງການຮວມຕົວ
ກັນທາງດ້ານການເມືອງສຳຫຼັບແກ້ໄຂວິກິດການໜີ້ສິນຂອງລັດຖະບານໃນຢູໂຣບ.
ຜູ້ນຳຂອງເຢຍຣະມັນກ່າວວ່າ ລັດຖະບານ ຂອງແຕ່ລະປະເທດ ຢູ່ໃນເຂດ 17 ປະເທດທີ່
ໃຊ້ເງິນຢູໂຣ ຈຳເປັນຈະຕ້ອງໄດ້ຍອມໂອນອຳນາດເທື່ອລະເລັກລະນ້ອຍ ໃຫ້ຢູໂຣບເປັນຜູ້
ຄວບຄຸມ ອັນເປັນຂໍ້ສະເໜີທີ່ຍັງມີການຖົກຖຽງໂຕ້ແຍ້ງ ຢູ່ໃນທະວີບດັ່ງກ່າວ. ທ່ານນາງ
ກ່າວຕໍ່ໂທລະພາບສາທານະລະຂອງເຢຍຣະມັນວ່າ ການຮວມຕົວກັນທາງດ້ານການເງິນ
ພຽງຢາງດຽວແມ່ນບໍ່ພຽງພໍ ແລະບັນດາປະເທດທີ່ຢູ່ໃນເຂດໃຊ້ເງິນຢູໂຣ ຈຳເປັນຕ້ອງໄດ້
ລົງມະຕິຮັບເອົານະໂຍບາຍດ້ານງົບປະມານຮ່ວມກັນ ຕະຫຼອດທັງສ້າງຕັ້ງສົກງົບປະມານ
ຮ່ວມ ໂດຍສະເພາະແລ້ວແມ່ນການຮວມຕົວກັນທາງດ້ານການເມືອງ.
ທ່ານນາງ Merkel ຊຶ່ງເປັນຕົວຕັ້ງຕົວຕີ ເພື່ອໃຫ້ມີການນຳໃຊ້ມາດຕະການປະຢັດມັດ
ທະຍັດເພື່ອແກ້ໄຂວິກິດການໜີ້ສິນຂອງເຂດໃຊ້ເງິນຢູໂຣ ຊຶ່ງໃນເວລານີ້ ພວມກ້າວເຂົ້າ
ສູ່ປີທີສາມ ແລະພວມປະເຊີນກັບບັນຫາທ້າທາຍໃໝ່ ຈາກສະພາບຄວາມອ່ອນແອລົງ
ຂອງທະນາຄານໃນສະເປນ ແລະຄວາມບໍ່ແນ່ນອນ ທາງດ້ານການເມືອງໃນກຣີສທີ່ມີ
ໜີ້ສິນຖ້ວມຫົວນັ້ນ. ຜູ້ນຳຂອງເຢຍຣະມັນ ຊຶ່ງເປັນຜູ້ກຳກັບນຳເສດຖະກິດທີ່ເຂັ້ມແຂງ
ທີ່ສຸດໃນຢູໂຣບໄດ້ຮັບຄວາມກົດດັນຫຼາຍ ຂຶ້ນຈາກປະທານາທິບໍດີສະຫະລັດ ທ່ານບາ
ຣັກ ໂອບາມາ ນາຍົກລັດຖະມົນຕີອັງກິດ ທ່ານເດວິດ ຄາເມີຣອນ ແລະພວກຜູ້ນຳຄົນ
ອື່ນໆໃນສັບປະດານີ້ ເພື່ອຊ່ອຍເຮັດໃຫ້ເສດຖະກິດທີ່ຊົບເຊົາຂອງຢູໂຣບ ມີການຂະ
ຫຍາຍໂຕ.
ທ່ານນາງ Merkel ກ່າວໃນການໃຫ້ສຳພາດວ່າ ປາສະຈາກຄວາມແຂງແກ່ນທາງດ້ານ
ເສດຖະກິດແລ້ວ ຈະບໍ່ສາມາດ ມີການເຕີບໂຕໄດ້ ການຢັບຢັ້ງ ໃນການໃຊ້ຈ່າຍແມ່ນມີ
ຄວາມສຳພັນກັນຢ່າງໃກ້ຊິດ ກັບການເຕີບໂຕຂອງເສດຖະກິດ.