ເບິ່ງວີດີໂອ ລາຍງານພາສາລາວ:
ຟັງລາຍງານພາສາລາວ:
ພວກປະເທດພວມພັດທະນາຫລາຍໆປະເທດ ແມ່ນຈະຢູ່ລອດຫລືພັງທະລາຍລົງໃນດ້ານ
ເສດຖະກິດ ກໍຍ້ອນຄວາມເຂັ້ມແຂງຂອງການສົ່ງອອກຂອງພວກເຂົາເຈົ້າ.
ບໍ່ວ່າຈະເປັນພວກຄົນງານເຫລົ່ານີ້ໃນອິນເດຍ ທີ່ຜະລິດເຄຶ່ອງອາໄຫລ່ລົດ ຫລືພວກທີ່ກໍາລັງປະດິດເຄຶ່ອງຊອບແວຄອມພິວເຕີ.
ຫລືພວກຄົນງານປູກກາເຟໃນປະເທດລາວ ຫລືພວກສານຜ້າພົມໃນອີຈິບ.
ພວກເຂົາເຈົ້າທັງໝົດ ແມ່ນມີສິ່ງນຶ່ງຮ່ວມກັນ ຄືພວກລູກຄ້າລາຍສໍາຄັນທີ່ສຸດຂອງເຂົາ
ເຈົ້າ ແມ່ນປະຊາຊົນຢູ່ໃນພາກພື້ນຢູໂຣບ ແລະຂົງເຂດອື່ນໆທີ່ຈະເຣີນແລ້ວ.
ທ່ານ Philippe de Buck ຜູ້ອໍານວຍການໃຫຍ່ຂອງອົງການ BUSINESSEUROPE
ຊຶ່ງເປັນອົງການຈັດຕັ້ງຂອງບັນດາສະພາການຄ້າຂອງພວກປະເທດໃນສະຫະພາບຢູໂຣບ
ກ່າວວ່າ:
“ສໍາລັບປະເທດເຫລົ່ານັ້ນສ່ວນຫລາຍ ສະຫະພາບຢູໂຣບຖືວ່າເປັນພາຄີດ້ານ
ທຸລະກິດທີ່ ຖ້າວ່າບໍ່ສໍາຄັນທີ່ສຸດແລ້ວ ກໍແມ່ນນຶ່ງໃນພວກພາຄີທີ່ສໍາຄັນທີ່ສຸດ
ຂອງເຂົາເຈົ້າ ສໍາລັບການຄ້າ ການລົງທືນ ການນໍາເຂົ້າ ແລະການສົ່ງອອກ.”
ແຕ່ວ່າໃນຂະນະທີ່ວິກິດການການເງິນຂອງຢູໂຣບ ໄດ້ບີບບັງຄັບໃຫ້ພວກ ລັດຖະບານ
ທັງຫລາຍຕ້ອງໄດ້ຕັດງົບປະມານຂອງເຂົາເຈົ້າລົງ ແລະເຮັດໃຫ້ເສດຖະກິດຊັກຊ້າລົງນັ້ນ ຜູ້ອຸບປະໂພກບໍລິໂພກຈໍານວນຫລາຍກໍມີເງິນໃຊ້ຈ່າຍໜ້ອຍລົງ ແລະນັ້ນກໍກໍາລັງສົ່ງຜົນ
ກະທົບ ຄືກັນກັບກະແສຄື້ນ ຊັດອອກໄປທົ່ວໂລກ.
ແມ່ນແຕ່ປະເທດເສດຖະກິດຍັກໃຫຍ່ຄືຈີນນັ້ນ ກໍບໍ່ລອດພົ້ນຈາກບັນຫາຂອງຢູໂຣບໄດ້.
ທ່າເຮືອນະຄອນຊຽງໄຮ້ຂອງຈີນນັ້ນ ຖືວ່າເປັນທ່າເຮືອ ທີ່ສໍາຄັນແຫ່ງນຶ່ງສໍາລັບຜະລິດ
ຕະພັນສົ່ງອອກຂອງປະເທດ ແຕ່ລັດຖະບານຈີນໄດ້ປະກາດວ່າ ການເຕີບໂຕຢ່າງໄວດ້ານ
ການສົ່ງອອກຂອງຕົນ ໄດ້ຊັກຊ້າລົງໃນເດືອນກັນຍາຜ່ານມາ ຍ້ອນຄວາມຮຽກຮ້ອງຕ້ອງ
ການ ລຸດນ້ອຍລົງ ຢູ່ໃນຢູໂຣບແລະສະຫະລັດ.
ນັກຄົ້ນຄ້ວາດ້ານເສດຖະກິດ Zolt Darvas ທີ່ອົງການຄົ້ນຄ້ວາ Bruegel ຢູ່ນະຄອນ
ຫລວງ Brussels ກ່າວວ່າ ຄວາມຮຽກຮ້ອງຕ້ອງການສິນຄ້າທີ່ລຸດຕໍ່າລົງນັ້ນ ມີທ່າທາງ
ວ່າຈະແກ່ຍາວຕໍ່ໄປອີກຫລາຍປີໃນບາງປະເທດຢູໂຣບ ຫລືອາດຈະດົນກ່ວານັ້ນອີກຊໍ້າ.
ທ່ານ Darvas ກ່າວວ່າ:
“ໂດຍສ່ວນໃຫຍ່ແລ້ວ ຜົນກະທົບແມ່ນຈະຂຶ້ນຢູ່ກັບວ່າ ວິກິດການການເງິນຂອງ
ຢູໂຣບຈະຖືກຄວບຄຸມໄດ້ຫລືບໍ່ ຫລືວ່າຈະຮ້າຍແຮງໜັກຂຶ້ນອີກ. ຖ້າຫາກວ່າມັນ
ຮ້າຍແຮງໜັກຂຶ້ນ ແລະຢູໂຣບຕົກຢູ່ໃນສະພາວະຖອຍຫລັງຢ່າງໜັກແລ້ວ ກໍແນ່
ນອນວ່າຈະເກີດຜົນກະທົບໄປທົ່ວໂລກ ບໍ່ແມ່ນແຕ່ໃນພວກເສດຖະກິດທີ່ກໍາລັງ
ໂຜ່ໂຕຂຶ້ນມາ ແຕ່ຍັງຈະກະທົບໄປເຖິງສະຫະລັດ ແລະພວກປະເທດອື່ນໆທີ່ຈະ
ເລີນແລ້ວນັ້ນນໍາ ແລະບາງທີ ກໍອາດຈະຮ້າຍແຮງໜັກຫລາຍ ຫລາຍທີ່ສຸດ.”
ແຕ່ທ່ານ Mario Monti ອະດີດເຈົ້າໜ້າທີ່ຝ່າຍເສດຖະກິດຂອງສະຫະພາບຢູໂຣບ ໃຫ້
ຂໍ້ສັງເກດວ່າ ທະວີບຢູໂຣບກໍຍັງມີຫລາຍປະເທດທີ່ເຂັ້ມແຂງທາງເສດຖະກິດຢູ່ ແຕ່ທ່ານ
ກ່າວວ່າ ບັນຫາໂດຍລວມນັ້ນ ອາດຈະບໍ່ຮ້າຍແຮງກັບເທົ່າ ທີ່ປາກົດເຫັນກັນ ຊື່ງທ່ານ
ກ່າວຕໍ່ໄປວ່າ:
“ແນ່ນອນວ່າ ມັນມີວິກິດການອັນໃຫຍ່ໂຕ ດ້ານການທະນາຄານບວກກັບວິກິດ
ການດ້ານງົບປະມານຂອງຫລວງ ຮວມເຂົ້າກັນຢູ່ໃນຫລາຍໆປະເທດ ທີ່ໃຊ້ເງິນ
ຢູໂຣ. ແຕ່ວ່າ ຖ້າເຮົາພິຈາລະນາເບິ່ງເຂດຢູໂຣທັງໝົດໂດຍລວມແລ້ວ ກໍຈະເຫັນ
ວ່າບັນຫາແມ່ນນ້ອຍກວ່າ ຢູ່ໃນສະຫະລັດ ໃນອັງກິດ ຫລືໃນຍີ່ປຸ່ນ.”
ທ່ານມອນຕີ ເຊື່ອວ່າ ຄວາມເຂັ້ມແຂງທາງເສດຖະກິດໃນບາງເຂດທີ່ສູງກ່ວາເຂດອື່ນໆ
ນັ້ນ ຈະຊ່ວຍໃຫ້ຢູໂຣບລອດພົ້ນຈາກວິກິດການ ທີ່ເປັນຢູ່ໃນປັດຈຸບັນນີ້ ໃນໄລຍະຍາວ.
ແຕ່ນັ້ນອາດເປັນຄໍາເວົ້າປອບໃຈທີ່ມີນໍ້າໜັກນ້ອຍຫລາຍ ສໍາລັບພວກທີ່ອາໄສກາງຕໍ່ທະວີບ
ຢູໂຣບ ໃຫ້ເປັນຕະຫລາດທີ່ເຂັ້ມແຂງສໍາລັບຜະລິດຕະພັນ ແລະການບໍລິການຕ່າງໆຂອງ
ພວກເຂົາເຈົ້າ.
ເບິ່ງວີດີໂອ ລາຍງານພາສາອັງກິດ ທີ່ກົງກັບພາສາລາວ: