ການໂອ້ລົມສົນທະນາກັນ ຂອງຄະນະນໍາພາດ້ານການເມືອງຂອງກຣີສ ກ່ຽວກັບວ່າຈະຮັບ
ເອົາຄໍາຮຽກຮ້ອງຂອງສະຫະພາບຢູໂຣບຫລືບໍ່ ທີ່ຮຽກຮ້ອງໃຫ້ກຣີສຕັດລາຍຈ່າຍຂອງຕົນ
ລົງອີກນັ້ນ ໄດ້ຢຸດສະງັກລົງໃນຕອນເຊົ້າວັນພະຫັດມື້ນີ້ ຊຶ່ງຍັງເຫຼືອພຽງແຕ່ເລື້ອງດຽວເທົ່າ
ນັ້ນທີຍັງຕົກລົງກັນບໍ່ໄດ້.ພວກຜູ້ນໍາຂອງ 3 ພັກການເມືອງທີ່ປະກອບສ່ວນຢູ່ໃນຄະນະລັດ
ຖະບານປະສົມຈະຕ້ອງເຫັນພ້ອມນໍາກັນກ່ຽວກັບການຕັດລາຍຈ່າຍລົງນີ້ ກ່ອນທາງສະ
ຫະພາບຢູໂຣບແລະກອງທຶນສາກົນ ຫລື IMF ຈະອະນຸມັດໃຫ້ເງິນຊ່ອຍກູ້ໜີ້ສິນອີກງວດ
ໃໝ່ທີ່ກຣີສຕ້ອງການເປັນທີສຸດ ນັ້ນ.
ລາຍງານເວົ້າວ່າ ພວກຫົວໜ້າພັກຕ່າງໆແລະນາຍົກລັດຖະມົນຕີ Lucas Papademos
ໄດ້ເຫັນດີນໍາຂໍ້ສະເໜີທຸກໆຂໍ້ ນອກຈາກ ການຕັດຄ່າໃຊ້ຈ່າຍເບ້ຍບໍານານເທົ່ານັ້ນ. ພວກ
ເຂົາເຈົ້າວາງແຜນຈະທໍາການພົບປະຫາລືກັນອີກໃນຕອນບ່າຍວັນພະຫັດມື້ນີ້.
ໃນຂະນະດຽວກັນ ລັດຖະມົນຕີການເງິນ ທ່ານ Evangelos Venizelos ກໍາລັງເດີນ
ທາງມຸ້ງໜ້າໄປຍັງກຸງ Brussels ເພື່ອເຂົ້າຮ່ວມໃນກອງປະຊຸມບັນດາລັດຖະມົນຕີການ
ເງິນຂອງພາກພື້ນທີ່ໃຊ້ເງິນຢູໂຣໃນຕອນແລງວັນພະຫັດມື້ນີ້ຕາມເວລາໃນທ້ອງຖິ່ນ. ພວກ
ລັດຖະມົນຕີການເງິນເຫລົ່ານີ້ຈະຕ້ອງໄດ້ລົງນາມໃນຂໍ້ຕົກລົງໃດໆກໍຕາມທີ່ກຣີສຮັບເອົາ
ຫລັງຈາກໄດ້ມີການນຳໃຊ້ມາດຕະການປະຢັດມັດທະຍັດແລ້ວ.
ຄໍາຮຽກຮ້ອງຂອງພວກເຈົ້າໜີ້ລະຫວ່າງຊາດຕໍ່ກຣີສນີ້ ແມ່ນຮວມທັງໃຫ້ກຣີສຕັດຄ່າຈ້າງ
ເງິນເດືອນໃນອັດຕາຕໍ່າສຸດລົງ 20 ເປີເຊັນ, ຕັດໂຄງການເບ້ຍບໍານານບາງຢ່າງລົງ 15
ເປີເຊັນ ແລະໃຫ້ລົບລ້າງໜ້າວຽກຂອງພວກຂ້າລັດຖະກອນພົນລະເຮືອນ 15 ພັນໜ້າ
ວຽກ. ຖ້າບໍ່ມີການຮັບຜ່ານຈາກບັນດາຜູ້ນໍາພັກການເມືອງຂອງກຣີສແລ້ວທາງບັນດາຜູ້
ໃຫ້ເງິນກູ້ຢືມ ກໍຈະບໍ່ອະນຸມັດເງິນກູ້ຢືມງວດໃໝ່ໃນຈໍານວນ 170 ຕື້ໂດລາ ອັນເປັນເງິນ
ງວດທີສອງ ໃນຮອບ 2 ປີ.
ກຣີສຕ້ອງການເງິນກ້ອນນີ້ ເພື່ອຫລີກລ້ຽງການຜິດສັນຍາຊໍາລະໜີ້ສິນເວລາຄ່າໃຊ້ຈ່າຍ
ສໍາລັບພັນທະບັດມູນຄ່າ 19 ຕື້ໂດລາກໍານົດຈະມີຂຶ້ນໃນເດືອນມີນາຕໍ່ໜ້ານີ້. ກຣີສກໍາ
ລັງທໍາການເຈລະຈາເພື່ອແລກປ່ຽນພັນ ທະບັດກັບບັນດາຜູ້ໃຫ້ກູ້ຢືມເງິນ ໂດຍຂໍຮ້ອງ
ໃຫ້ພວກເຈົ້າໜີ້ເຫລົ່ານີ້ຍອມຮັບເອົາເງິນຈໍານວນໜ້ອຍກວ່າທີ່ກຣີສເປັນໜີ້ນັ້ນ.
ພວກແຮງງານກຣີສໄດ້ທໍາການນັດຢຸດງານທົ່ວໄປມາແລ້ວຫລາຍຄັ້ງແລະທໍາການເດີນ
ຂະບວນປະທ້ວງຄັ້ງໃຫຍ່ຕາມຖະໜົນຫົນທາງ ໂດຍກ່າວວ່າ ພວກຕົນບໍ່ສາມາດເສຍ
ສະລະຕື່ມອີກໄດ້.
