ບັນດາລັດຖະມົນຕີໃນຄະນະລັດຖະບານຂອງກຣິສໄດ້ໃຫ້ການສະໜັບ ສະໜຸນຕໍ່ແຜນການ
ຂອງນາຍົກລັດຖະມົນຕີ George Papandreou ທີ່ຈະຈັດການລົງປະຊາມະຕິກ່ຽວກັບຂໍ້
ຕົກລົງຊ່ອຍບັນເທົາໜີ້ສິນຂອງສະຫະພາບຢູໂຣບນັ້ນ.
ໂຄສົກລັດຖະບານກຣິສ ກ່າວຫລັງຈາກການພົບປະກັນຢ່າງຂຸ້ນຂ້ຽວຂອງຄະນະລັດຖະບານ
ໃນເຊົ້າວັນພຸດມື້ນີ້ວ່າ ການລົງປະຊາມະຕິຈະມີຂຶ້ນໂດຍໄວເທົ່າທີ່ຈະເປັນໄປໄດ້ຫລັງຈາກ
ລາຍລະອຽດຕ່າງໆຂອງຂໍ້ຕົກລົງບັນເທົາໜີ້ສິນສະບັບຫລ້າສຸດໄດ້ບັນລຸກັນນັ້ນ.
ຄໍາປະກາດກ່ຽວກັບການລົງປະຊາມະຕິຂອງທ່ານ Papandreou ໄດ້ເຮັດໃຫ້ໂລກງົງງັນ
ກັນໃນວັນອັງຄານວານນີ້ ແລະໄດ້ເຮັດໃຫ້ລາຄາຕະຫຼາດຮຸ້ນຂອງໂລກລົດລົງຢ່າງຫລວງ
ຫລາຍຂະນະທີ່ພວກນັກລົງ ທຶນສະແດງປະຕິກິລາຕໍ່ຄວາມບໍ່ແນ່ໃຈຂຶ້ນມາຢ່າງສໍາຄັນໃນ
ເສດຖະກິດຂອງຢູໂຣບນັ້ນ. ພວກຕະຫຼາດຮຸ້ນບາງແຫ່ງໃນຢູໂຣບໄດ້ຟື້ນໂຕຄືນໃນວັນພຸດ
ມື້ນີ້.
ນາຍົກລັດຖະມົນຕີກຣິສກ່າວຕໍ່ຄະນະລັດຖະບານຂອງທ່ານວ່າ ພວກປະຊາຊົນຈະຖືກຊັກ
ຖາມວ່າ ເຂົາເຈົ້າຢາກໃຊ້ເງິນຢູໂຣຕໍ່ໄປອີກຫລືບໍ? ຊຶ່ງທ່ານກ່າວຕໍ່ໄປວ່າ ຂໍ້ຕົກລົງກັນໃດໆ
ກໍຕາມຈະໄດ້ຮັບການຈັດຕັ້ງປະຕິບັດຕາມກໍຕໍ່ເມືອໃດໄດ້ຮັບຄວາມຍິນຍອມເຫັນດີຈາກປະ
ຊາຊົນກຣິສເທົ່ານັ້ນ ແລະວ່າ ທ່ານຫວັງວ່າ ຄວາມປັ່ນປ່ວນວຸ້ນວາຍໃດໆເກີດຂຶ້ນຈາກຄໍາ
ປະກາດທີ່ບໍ່ຄາດໄວ້ລ່ວງໜ້ານີ້ ກໍຈະດໍາເນີນໄປເປັນການຊົ່ວຄາວເທົ່ານັ້ນ.
ນາຍົກລັດຖະມົນຕີກຣີສໄດ້ຖືກຊັກຖາມມາເພື່ອໃຫ້ຄໍາຊີ້ແຈງກ່ຽວກັບພຶດຕິກໍາຂອງທ່ານຕໍ່
ພວກຜູ້ນໍາຝຣັ່ງແລະເຢຍຣະມັນກ່ອນກອງປະຊຸມສຸດຍອດຂອງກຸ່ມ G20 ທີ່ຈະມີຂຶ້ນທີ່ປະ
ເທດຝຣັ່ງນັ້ນ.
ພວກສະມາຊິກສະພາຈໍານວນນຶ່ງໃນພັກສັງຄົມນິຍົມຂອງນາຍົກລັດຖະມົນຕີ ຄັດຄ້ານຕໍ່
ການລົງປະຊາມະຕິກ່ຽວກັບການຮັບເອົາແຜນການ ດັ່ງກ່າວຂອງປະຊາຊົນ. ພວກສະມາຊິກ
ຂອງພັກບາງຄົນຮຽກຮ້ອງໃຫ້ທ່ານ Papandreou ລາອອກຈາກຕໍາແໜ່ງແລະລັດຖະບານ
ຂອງທ່ານຈະປະເຊີນກັບການລົງມະຕິບໍ່ໄວ້ວາງໃຈຢູ່ໃນສະພາແຫ່ງຊາດໃນວັນສຸກສັບປະ
ດານີ້.
ພັກ Pasok ຂອງນາຍົກລັດຖະມົນຕີມີສຽງຂ້າງຫລາຍພຽງແຕ່ 2 ສຽງເທົ່ານັ້ນໃນສະພາ
ຫລັງຈາກສະມາຊິກຄົນນຶ່ງລາອອກຈາກພັກ.
