ຝຣັ່ງ ອິຕາລີ ສະເປນ ແລະເບລຢ້ຽມ ໄດ້ສັ່ງຫ້າມບໍ່ໃຫ້ຂາຍຫຸ້ນອອກເວລາຫຸ້ນຕົກລາຄາ
ນັ້ນ ໃນຄວາມພະຍາຍາມເພື່ອລະງັບຄວາມປັ່ນປ່ວນໃນຕະຫລາດ ທີ່ທະວີຮ້າຍແຮງຂຶ້ນ
ຫລັງຈາກມີຂ່າວລືກ່ຽວກັບບັນຫາໜີ້ສິນ ຈໍານວນມະຫາສານ ຂອງພາກພື້ນຢຸໂຣບນັ້ນ.
ອົງການຄວບຄຸມຕະຫລາດຮຸ້ນຂອງສະຫະພາບຢຸໂຣບ ໄດ້ອອກປະກາດໃນຕອນແລງ
ວັນພະຫັດວານນີ້ ຫລັງຈາກການຊື້ຂາຍທີ່ຂຶ້ນໆລົງໆເປັນເວລາສອງມື້ ໄດ້ພາໃຫ້ຮຸ້ນ
ຂອງທະນາຄານຝຣັ່ງ ຖີບຕົວສູງຂຶ້ນ ແລ້ວກໍຕົກຕໍ່າລົງ ຢ່າງຫລວງຫລາຍນັ້ນ.
ການສັ່ງຫ້າມການຂາຍຫຸ້ນອອກເວລາລາຄາຮຸ້ນຕົກ ໃນສີ່ປະເທດດັ່ງກ່າວແມ່ນມີຜົນ
ບັງຄັບໃຊ້ໃນວັນສຸກນີ້ເປັນຕົ້ນໄປ. ນອກນີ້ແລ້ວ ພວກເຈົ້າໜ້າທີ່ຍັງໄດ້ຕັກເຕືອນພວກ
ຄ້າຂາຍທັງຫລາຍ ບໍ່ໃຫ້ກະຈາຍຂ່າວລືທີ່ບໍ່ມີມູນຄວາມຈິງ ເພື່ອຫວັງໄດ້ກໍາໄລນັ້ນ.
ການຂາຍຮຸ້ນອອກເວລາຮຸ້ນຕົກລາຄານັ້ນ ແມ່ນຈະໄດ້ກໍາໄລຈາກການຄາດຄະເນວ່າ
ລາຄາຮຸ້ນຈະຕົກຕໍ່າລົງໄປອີກ.
ໃນລະຫວ່າງດຽວກັນ ຝຣັ່ງກ່າວໃນວັນສຸກມື້ນີ້ວ່າ ການເສດຖະກິດຂອງ ຕົນບໍ່ມີການ
ເຕີບໂຕເລີຍ ໃນໄຕຣມາດທີ່ສອງຂອງປີນີ້ ຫລັງຈາກມີການເຕີບໂຕຂຶ້ນ ເກືອບນຶ່ງເປີ
ເຊັນໃນໄຕຣມາດທີ່ນຶ່ງ.
ເຫດການຜັນປ່ຽນດັ່ງກ່າວເຫລົ່ານີ້ ມີຂຶ້ນໃນຂະນະທີ່ນາຍົກລັດຖະມົນຕີເຢຍລະມັນ
ທ່ານນາງ Angela Merkel ແລະປະທານາທິບໍດີຝຣັ່ງ ທ່ານ Nicolas Sarkozy ວາງແຜນການຈະພົບປະກັນໃນວັນອັງຄານໜ້ານີ້ ເພື່ອປຶກສາຫາລືຂໍ້ສະເໜີຕ່າງໆ ເພື່ອສ້າງຄວາມເຂັ້ມແຂງໃຫ້ແກ່ການຄຸ້ມຄອງເສດຖະກິດໃນກຸ່ມ 17 ປະເທດທີ່ໃຊ້
ເງິນຢູໂຣນັ້ນ ຜູ້ນໍາທັງສອງດັ່ງກ່າວນີ້ ຫວັງວ່າຈະສາມາດຈັດຂໍ້ສະເໜີກ່ຽວກັບວິທີ
ຍຸຕິຄວາມວຸ້ນວາຍທີ່ໄດ້ສັ່ນສະເທືອນຕະຫລາດຮຸ້ນທີ່ສໍາຄັນໆຂອງຢຸໂຣບໃນອາທິດນີ້ ລົງໄດ້.
