ພວກຜູ້ນໍາພັກໃນກຣີສ ໄດ້ຢຸດການອະພິປາຍກັນກ່ຽວກັບຈັດຕັ້ງລັດຖະບານປະສົມ
ໃນຕອນເຊົ້າຂອງວັນພຸດມື້ນີ້ ໂດຍທີ່ຍັງບໍ່ມີການຕົກລົງກັນໃດໆ ແຕ່ກໍໄດ້ຕົກລົງທີ່ຈະ
ອະພິປາຍກັນຄືນໃໝ່ອີກໃນຕອນແລງມື້ນີ້.
ທ່ານ George Papandreou ທີ່ກໍາລັງຈະລາອອກຈາກຕໍາແໜ່ງນາຍົກລັດຖະມົນຕີ
ແລະທ່ານ Antonis Samaras ຜູ້ນໍາພັກຝ່າຍຄ້ານຄົນສໍາຄັນ ໄດ້ທໍາການເຈລະຈາກັນ
ຕັ້ງແຕ່ວັນຈັນຜ່ານມານີ້ ກ່ຽວກັບວ່າຜູ້ໃດຄວນຈະເປັນຜູ້ນໍາລັດຖະບານແບ່ງປັນອໍານາດ
ຮັກສາການຊົ່ວຄາວ ໄປຈົນກວ່າຈະມີການຈັດການເລືອກຕັ້ງຂຶ້ນກ່ອນກໍານົດ ທີ່ກໍານົດ
ຈະຈັດຂື້ນໃນວັນທີ່ 19 ເດືອນກຸມພາປີໜ້ານີ້.
ທ່ານ Papandreou ຕົກລົງທີ່ຈະລາອອກຈາກຕໍາແໜ່ງນາຍົກລັດຖະມົນຕີ ຫລັງຈາກ
ໄດ້ຮັບການສະໜັບສະໜຸນຈາກພັກຝ່າຍຄ້ານ ກ່ຽວກັບຂໍ້ຕົກລົງກອບກູ້ໜີ້ສິນຂອງນາ
ນາຊາດ ສໍາລັບປະເທດຂອງທ່ານ.
ຂ່າວໂທລະພາບກຣີສທີ່ດໍາເນີນການໂດຍລັດ ໄດ້ລາຍງານເມື່ອວັນອັງ ຄານວານນີ້ວ່າ
ທ່ານ Lucas Papademos ນັກເສດຖະສາດ ອະດີດຮອງປະທານທະນາຄານກາງ
ຂອງສະຫະພາບຢູໂຣບ ຈະຖືກແຕ່ງຕັ້ງໃຫ້ເປັນນາຍົກລັດຖະມົນຕີຮັກສາການຊົ່ວຄາວ
ຂອງກຣີສ. ລາຍງານເວົ້າວ່າ ພວກອື່ນໆທີ່ອາດຖືກແຕ່ງຕັ້ງໃຫ້ຮັບຕໍາແໜ່ງນາຍົກນີ້
ກໍກໍາລັງຖືກພິດຈາລະນາກັນຢູ່.
ສະຫະພາບຢູໂຣບ ໄດ້ທວງໃຫ້ ທັງພັກສັງຄົມນິຍົມຂອງທ່ານ ປາປັນດຣິໂອ ແລະພັກ
ປະຊາທິປະໄຕໃໝ່ຊຶ່ງເປັນພັກຝ່າຍຄ້ານຂອງທ່ານ ຊາມາ ຣາສ ນັ້ນ ຈົ່ງເຊັນຮ່າງຄວາມ
ໝັ້ນໝາຍເພື່ອດໍາເນີນມາດຕະການຕ່າງໆ ຂອງແຜນການປະຢັດມັດທະຍັດທີ່ບໍ່ນິຍົມ
ກັນປານໃດນັ້ນ ອັນເປັນພາກສ່ວນຂອງແຜນການບັນເທົາໜີ້ສິນຂອງປະເທດ ສໍາລັບ
ການອະນຸມັດໃຫ້ ປະເທດກຣີສໄປແລ້ວເມື່ອເດືອນຜ່ານມານັ້ນ. ທ່ານ ຊາມາຣາສ ຄັດ
ຄ້ານຮ່າງຖະແຫລງການດັ່ງກ່າວ ໂດຍເອີ້ນວ່າ ມັນເປັນການນາບຂູ່ ສັກຂີ ແຫ່ງຊາດ
ແລະຢືນຢັດວ່າ ຄວາມຍິນຍອມຈາກຄໍາເວົ້າຂອງທ່ານນັ້ນກໍຄວນຈະເປັນການພຽງພໍ
ຢູ່ແລ້ວ.
