ສະຫະພາບຢູໂຣບ ຖະແຫລງການໃນໂອກາດ ກອງປະຊຸມ
ໂຕະມົນປະຈຳປີ 2014 ໂດຍຮຽກຮ້ອງໃຫ້ທາງການລັດຖະບານ
ລາວ ປັບປຸງວຽກງານໃນ 6 ດ້ານ ຊຶ່ງລວມເຖິງດ້ານສິດທິມະນຸດ
ຊົນພາຍໃນປະເທດດ້ວຍ.
ສະຫະພາບຢູໂຣບ ໃນຖານະເປັນຫຸ້ນສ່ວນດ້ານການພັດທະນາ ໃນກອງປະຊຸມໂຕະມົນ
ປະຈຳປີ 2014 ທີ່ໄດ້ມີຂຶ້ນຢ່າງເປັນທາງການ ໃນຊ່ວງກາງເດືອນພະຈິກນີ້ ຢູ່ນະຄອນ
ຫລວງວຽງຈັນ ໄດ້ຖະແຫລງການຮຽກຮ້ອງໃຫ້ ລັດຖະບານລາວ ດຳເນີນການພັດທະນາ
ປັບປຸງເພື່ອຍົກລະດັບປະສິດທິພາບ ໃນການຈັດຕັ້ງປະຕິບັດວຽກງານ ສຳຫລັບສົກປີ
2014-2015 ນີ້ ໃນ 6 ດ້ານຈາກທັງໝົດ 9 ດ້ານທີ່ເປັນເປົ້າໝາຍ ສະຫັດສະວັດ ການ
ພັດທະນາ ທີ່ລັດຖະບານລາວ ໄດ້ຕົກລົງຮ່ວມກັບອົງການສະຫະປະຊາຊາດ.
ໂດຍໃນນີ້ມີຢູ່ 4 ດ້ານທີ່ກ່ຽວກັບການພັດທະນາເພື່ອຍົກລະດັບຄຸນນະພາບ ຊີວິດການ
ເປັນຢູ່ທີ່ດີຂຶ້ນຂອງແມ່ຍິງ ແລະ ເດັກນ້ອຍລາວ ກໍຄືການລົບລ້າງບັນຫາຂາດສານອາຫາ
ຂອງເດັກນ້ອຍ ການລົດອັດຕາການເສຍຊີວິດ ຂອງເດັກນ້ອຍອາຍຸຕ່ຳກວ່າ 5 ປີ ການ
ລົດອັດຕາການເສຍຊີວິດ ຂອງແມ່ຍິງໃນຂະນະຖືພາ ຫຼື ກຳເນີດລູກ ແລະ ການລົດອັດຕາ ການປະລະການຮຽນ ຂອງເດັກນ້ອຍ ເນື່ອງຈາກວ່າ ການຈັດຕັ້ງປະຕິບັດໃນລະຍະ
ທີ່ຜ່ານມາ ຍັງບໍ່ເປັນໄປຕາມເປົ້າໝາຍແຜນການທີ່ວາງໄວ້.
ສ່ວນອີກ 2 ດ້ານທີ່ເຫລືອ ກໍແມ່ນການນຳໃຊ້ປະໂຫຍດ ຈາກຊັບພະຍາກອນ ທຳມະຊາດ
ຢ່າງຍືນຍົງ ເພາະສະຫະພາບຢູໂຣບ ເຫັນວ່າ ການນຳໃຊ້ຊັບພະຍາກອນທຳມະຊາດຂອງລາວ ໃນລະຍະທີ່ຜ່ານມານັ້ນ ເຖິງແມ່ນວ່າ ຈະມີຜົນດີຕໍ່ການພັດທະນາເສດຖະກິດ ໃຫ້ຂະຫຍາຍຕົວເພີ້ມຂຶ້ນຢ່າງຕໍ່ເນື່ອງກໍຕາມ ຫາກແຕ່ວ່າ ກໍໄດ້ມີການທຳລາຍຊັບພະຍາກອນທຳມະຊາດໄປ ຢ່າງຫລວງຫຼາຍ ໃນຂະນະທີ່ ປະຊາຊົນລາວຫຼາຍກວ່າ 1 ລ້ານ 5 ແສນຄົນ ຍັງຢູ່ພາຍໃຕ້ສະພາບການ ທີ່ທຸກຍາກຢ່າງຍິ່ງຢູ່ເລື້ອຍມາ.
ສຳຫລັບດ້ານສຸດທ້າຍ ທີ່ສະຫະພາບຢູໂຣບຖະແຫລງການຮຽກຮ້ອງ ໃນຄັ້ງນີ້ ກໍຄືການປັບປຸງການຈັດຕັ້ງປະຕິບັດ ຂອງທາງການລາວ ທີ່ມີຕໍ່ຫລັກການສິດທິມະນຸດຊົນພາຍໃນລາວ ໃຫ້ມີຄວາມໂປ່ງໃສ ແລະ ໄດ້ມາດຕະຖານສາກົນ ຢ່າງແທ້ຈິງ ເນື່ອງຈາກຍັງປາກົດມີການລະເມີດສິດທິຂັ້ນພື້ນຖານຂອງພົນລະເມືອງລາວ ເກີດຂຶ້ນຢູ່ເລື້ອຍມາ ຊຶ່ງລວມເຖິງ ກໍລະນີການຫາຍຕົວໄປ ຂອງ ທ່ານສົມບັດ ສົມພອນ ດ້ວຍນັ້ນເອງ.
ທາງດ້ານ ທ່ານນາງ Ng Shui Meng ພັນລະຍາຂອງ ທ່ານ
ສົມບັດ ສົມພອນ ນັກພັດທະນາລາວຜູ້ດີເດັ່ນໃນອາຊ່ຽນ ທີ່ໄດ້
ຫາຍຕົວໄປນັບແຕ່ ວັນທີ 15 ທັນວາ ປີ 2012 ເປັນຕົ້ນມານັ້ນ
ກໍຍັງຄົງເຄື່ອນໄຫວຕິດຕາມຫາຜູ້ເປັນສາມີຂອງນາງຢູ່ເລື້ອຍມາ
ທັງຍັງໄດ້ເຊີນຊວນໃຫ້ຜູ້ທີ່ຮັກຄວາມເປັນທຳທັງໃນລາວ ແລະ
ຕ່າງປະເທດຮ່ວມກັນຂຽນຈົດໝາຍເຖິງທ່ານ ສົມບັດ ທີ່ມີເນື້ອຫາ
ກ່ຽວກັບຊີວິດ ແລະ ຜົນງານ ແນວຄວາມຄິດອຸດົມການ ແລະ ວິຖີ
ການປະຕິບັດງານຂອງ ທ່ານສົມບັດ ເພື່ອເຜີຍແຜ່ອອກສູ່ການ
ຮຽນຮູ້ໃນວົງກວ້າງ ນັບແຕ່ວັນທີ 15 ທັນວາ ປີ 2013 ເປັນຕົ້ນມາ
ຈົນເຖິງປັດຈຸບັນນີ້ກໍຕາມ.
ຫາກແຕ່ວ່າ ທ່ານນາງ Ng Shui Meng ກໍຍັງຄົງບໍ່ໄດ້ຮັບຂ່າວຄາວໃດໆເລີຍ ຈາກຜູ້ເປັນສາມີຂອງ ທ່ານນາງ ທັງກໍຍັງບໍ່ມີຄວາມຄືບໜ້າໃດໆ ຈາກການສືບສວນ ສອບສວນ ຂອງທາງການຕຳຫລວດລາວເລີຍ ດັ່ງທີ່ ທ່ານນາງໄດ້ກ່າວວ່າ:
"ມັນຍັງເປັນຄວາມຮັບຜິດຊອບຂອງ ລັດຖະບານ ແລະ ກອງກຳລັງຮັກສາ
ຄວາມສະຫງົບ ທີ່ຈະຕ້ອງຊອກຫາ ສົມບັດ ໃຫ້ພົບ ແລ້ວນຳເອົາ ສົມບັດ ມາສົ່ງ
ໃຫ້ແກ່ຂ້າພະເຈົ້າ ແລະ ຄອບຄົວ ໂດຍປອດໄພ. ເຂົາເຈົ້າໄດ້ແຕ່ງຕັ້ງ ຄະນະ
ສືບສວນສອບສວນຂຶ້ນ ແຕ່ບໍ່ເປັນຈັ່ງໂຊກ ມາເຖິງມື້ນີ້ ກໍຍັງບໍ່ມີ ຂໍ້ມູນກ່ຽວກັບ
ວ່າ ສົມບັດ ຢູ່ບ່ອນໃດເລີຍ."
ນອກຈາກການເຊີນຊວນໃຫ້ມີການຂຽນຈົດໝາຍເຖິງ ທ່ານສົບບັດ ດັ່ງກ່າວແລ້ວ ບັນດາອົງການຄຸ້ມຄອງສິດທິມະນຸດຊົນສາກົນ ເຊັ່ນເຄືອຂ່າຍສະໝານສັນພາກປະຊາຊົນອາຊ່ຽນ ຄະນະປະສານງານມະຫະກຳພາກປະຊາຊົນອາຊ່ຽນກັບຢູໂຣບ ຄະນະກຳມະການປະສານງານອົງກອນພັດທະນາເອກະຊົນໄທ ເຄືອຂ່າຍອົງກອນພັດທະນາເອກະຊົນຍີ່ປຸ່ນ ແລະ ເຄືອຂ່າຍເຍົາວະຊົນອາຊ່ຽນ ກໍໄດ້ພາກັນຈັດກິດຈະກຳເພື່ອຮຽກຮ້ອງ ຂໍໃຫ້ທາງການລາວຕາມຫາ ແລະ ໃຫ້ການຊ່ອຍເຫຼືອ ທ່ານສົມບັດ ຢ່າງຈິງຈັງອີກດ້ວຍ.
ກ່ອນໜ້ານີ້ ຄະນະຜູ້ແທນລັດຖະສະພາຢູໂຣບ ໄດ້ເດີນທາງໄປຢ້ຽມຢາມ ສປປ ລາວ ຢ່າງເປັນທາງການໃນຊ່ວງເດືອນຕຸລາ ປີ 2013 ຊຶ່ງນຳໂດຍ ທ່ານ Werner Langen ປະທານລັດຖະສະພາຢູໂຣບ ກໍໄດ້ພົບປະເຈລະຈາຮ່ວມກັນກັບ ຄະນະຜູ້ແທນຂອງສະພາແຫ່ງຊາດລາວ ທີ່ມີ ທ່ານໄຊສົມພອນ ພົມວິຫານ ຮອງປະທານສະພາແຫ່ງຊາດລາວ ເປັນຫົວໜ້າຄະນະ.
ຫາກແຕ່ວ່າ ນັບຈາກນັ້ນເປັນຕົ້ນມາ ຈົນເຖິງປັດຈຸບັນນີ້ ກໍຍັງບໍ່ມີຜົນຄືບໜ້າໃນກໍລະນີການຫາຍຕົວໄປ ຂອງທ່ານສົມບັດ ເກີດຂຶ້ນແຕ່ຢ່າງໃດ ຊຶ່ງກໍເຮັດໃຫ້ບັນດາອົງການສິດທິມະນຸດຊົນສາກົນມອງວ່າ ທາງການລາວບໍ່ຈິງຈັງກັບການຊອກຫາຄວາມຈິງ ໃນກໍລະນີດັ່ງກ່າວນີ້.
