ບັນດາຜູ້ນໍາປະເທດສະເປນ ອິຕາລີ ແລະຝຣັ່ງ ກໍາລັງເດີນທາງໄປເຖິງ ກອງປະຊຸມສຸດຍອດຂອງສະຫະພາບຢູໂຣບທີ່ນະຄອນຫຼວງ Brussels ປະເທດເບລຢ້ຽມ ພ້ອມກັບຄວາມເປັນຫ່ວງທີ່ມີຮ່ວມກັນ ໂດຍຮຽກຮ້ອງ
ໃຫ້ເຢຍຣະມັນດຳເນີນການເພີ່ມຂຶ້ນເພື່ອຜ່ອນເບົາຄວາມລໍາບາກດ້ານການເງິນຂອງບັນດາລັດຖະບານທີ່ມີຄວາມອ່ອນແອໃນກຸ່ມປະເທດໃຊ້ເງິນຢູໂຣນັ້ນ.
ທ່ານນາງ Angela Merkel ນາຍົກລັດຖະມົນຕີເຢຍຣະມັນ ໄດ້ພົບປະ ກັບທ່ານ Francois Hollande ປະທານາທິບໍດີຝຣັ່ງ ທີ່ກຸງປາຣີ ເມື່ອວັນພຸດວານນີ້ ກ່ອນກອງປະຊຸມສຸດຍອດດັ່ງກ່າວ. ມີລາຍງານວ່າທ່ານນາງ Merkel ໄດ້ເຫັນດີທີ່ຈະໂຮມເອົາແຜນການເພື່ອເຮັດໃຫ້ເສດຖະກິດເຕີບໂຕ ທີ່ສະເໜີໂດຍທ່ານ Hollande ນັ້ນ ເຂົ້າໃນຫົວຂໍ້ປະຊຸມນໍາ.
ສ່ວນ ທ່ານ Mariano Rajoy ນາຍົດລັດຖະມົນຕີສະເປນ ກ່າວເຕຶອນ ວ່າ ລັດຖະບານຂອງທ່ານບໍ່ອາດສາມາດປະຄັບປະຄອງຄ່າໃຊ້ຈ່າຍເງິນກູ້ຢືມທີ່ດອກເບ້ຍສູງໄດ້ຕໍ່ໄປອີກ.
ທ່ານ Rajoy ໄດ້ບອກສະພາແຫ່ງຊາດສະເປນເມື່ອວັນພຸດວານນີ້ວ່າ ບັນດາຜູ້ນໍາສະຫະພາບຢູໂຣບ ຈະຕ້ອງຮັບເອົາຂໍ້ຜູກດ້ານມັດງົບປະມານປະຈໍາປີແລະການທະນາຄານທີ່ເຂັ້ມແຂງ ໃນລະຫວ່າງກອງປະຊຸມສຸດຍອດສອງມື້ນັ້ນ.
ທ່ານນາງ Merkel ກໍໄດ້ບອກສະພາເຢຍຣະມັນວ່າ ເຢຍຣະມັນສາມາດ ເຮັດໃນສິ່ງທີ່ພໍເຮັດໄດ້ເທົ່ານັ້ນ ແລະວ່າມາດຕະການປະຢັດມັດທະຍັດນັ້ນ ຍັງເປັນຫຼັກການສໍາຄັນຢູ່ ເພື່ອປັບປຸງການເງິນຂອງລັດຖະບານໃຫ້ດີຂຶ້ນ.
ເປັນທີ່ຄາດກັນວ່າ ບັນດາຜູ້ນໍາຂອງສະຫະພາບຢູໂຣບ ຈະກຳນົດແຜນທີ່ເສັ້ນທາງ ເພື່ອແກ້ໄຂຄວາມເປັນຫ່ວງຕ່າງໆກ່ຽວກັບປະເທດທີ່ເສດຖະກິດກໍາລັງລົ້ມລຸກຄຸນຄານທັງຫຼາຍເວລາສະລຸບກອງປະຊຸມສຸດຍອດທີ່ນະຄອນ Brussels ໃນວັນສຸກມື້ອື່ນນີ້.