ບັນດາລັດຖະມົນຕີການຕ່າງປະເທດ ຂອງສະຫະພາບ ຢູໂຣບ
ໄດ້ຕົກລົງກັນຢ່າງເປັນທາງການ ໃນວັນຈັນມື້ນີ້ ທີ່ຈະຕໍ່ເວລາ
ການລົງໂທດຕໍ່ ຣັດເຊຍ ອອກໄປຕື່ມອີກ 6 ເດືອນ ໃນການຕອບ
ໂຕ້ຕໍ່ບົດບາດຂອງ ຣັດເຊຍ ຢູ່ໃນປະເທດເພື່ອນບ້ານ ຢູເຄຼນ.
ການເຄື່ອນໄຫວດັ່ງກ່າວ ມີຂື້ນໃນກອງປະຊຸມຂອງບັນດາ ລັດຖະມົນຕີຕ່າງປະເທດ ຂອງ EU ທີ່ປະກອບດ້ວຍ 28 ປະເທດສະມາຊິກ ຢູ່ປະເທດ ລັກຊັມເບີກ. ບັນດານັກການທູດ EU ໄດ້ໃຫ້ການເຫັນດີໃນເບື້ອງຕົ້ນ ແກ່ມາດຕະການດັ່ງກ່າວ ໃນສັບປະດາທີ່ຜ່ານມາ.
ການລົງໂທດແມ່ນແນໃສ່ ພາກສ່ວນພະລັງງານ, ປ້ອງກັນປະເທດ ແລະ ການເງິນຂອງ ຣັດເຊຍ ແລະ ໄດ້ດຳເນີນມາແລ້ວຕັ້ງແຕ່ເດືອນ ກໍລະກົດ 2014, ສີ່ເດືອນຫຼັງຈາກ ຣັດເຊຍ ໄດ້ເຂົ້າຍຶດຄອງແຫຼມ Crimea ຂອງ ຢູເຄຼນ. ບັດນີ້ ການລົງໂທດດັ່ງກ່າວແມ່ນຈະມີໄປຮອດ ວັນທີ 31 ມັງກອນ 2016.
ໂຄສົກວັງ Kremlin ທ່ານ Dmitri Peskov ກ່າວວ່າ ຣັດເຊຍ ຖືວ່າມາດຕະການລົງໂທດ ເຫຼົ່ານັ້ນ ບໍ່ມີເຫດມີຜົນ ແລະ ວ່າການໂຕ້ຕອບຂອງ ມອສໂກ ແມ່ນຈະມີຂຶ້ນບົນພື້ນຖານຂອງການ “ຕອບໂຕ້ໃນທຳນອງດຽວກັນ.” ພວກນັກວິເຄາະໄດ້ກ່າວວ່າ ນັ້ນອາດຈະໝາຍເຖິງການສັ່ງຫ້າມເພີ່ມເຕີມ ຕໍ່ການນຳເຂົ້າອາຫານຂອງ ຢູໂຣບ.
ຄາດວ່າ ຣັດເຊຍຈະຕໍ່ ຂໍ້ຫ້າມນຳເຂົ້າອາຫານ ຈາກອີຢູ:
