ສະຫະພາບຢູໂຣບໄດ້ຜ່ອນຄາຍການລົງໂທດທາງດ້ານເສດຖະກິດແລະການເມືອງຂອງຕົນ
ຕໍ່ພວກສະມາຊິກພົນລະເຮືອນບາງທ່ານໃນຄະນະລັດຖະບານໃໝ່ຂອງມຽນມານັ້ນ.
ສະພາສະຫະພາບຢູໂຣບ ທີ່ໄດ້ພົບປະກັນຢູ່ໃນປະເທດ Luxembourgໃນວັນອັງຄານວານນີ້ ກ່າວວ່າ ທາງສະພາຫວັງວ່າ ລັດຖະບານທີ່ມີລັກສະນະພົນລະເຮືອນຫລາຍຂຶ້ນຈະນໍາພາໃຫ້ມີນະໂຍບາຍໃໝ່ໆທີ່ມີຄວາມຈຳເປັນຫລາຍຂຶ້ນນັ້ນ.
ສະຫະພາບຢູໂຣບຈະຍົກເລີກການຫ້າມອອກວີຊາເປັນເວລາ 1 ປີຕໍ່ພວກສະມາຊິກພົນລະເຮືອນບາງຄົນໃນວົງການລັດຖະບານນັ້ນ ທີ່ຮວມທັງລັດຖະມົນຕີການຕ່າງປະເທດນໍາ ນອກ
ນັ້ນສະພາດັ່ງກ່າວຍັງເວົ້າຕື່ມວ່າ ຂໍ້ຫ້າມສໍາລັບການຢ້ຽມຢາມມຽນມາໃນລະດັບສູງກໍຈະຖືກ ຍົກເລີກເຊ່ນກັນ ໂດຍຄາດຫວັງໄວ້ວ່າຈະມີການເຂົ້າຫາພວກເຈົ້າໜ້າທີ່ໃນລະດັບອາວຸໂສຂອງລັດຖະບານແລະເຂົ້າຫາບຸກຄົນສໍາຄັນໆຂອງຝ່າຍຄ້ານນັ້ນໄດ້. ສະຫະພາບຢູໂຣບກ່າວວ່າ ຕົນຈະຊັ່ງຊາຕີລາຄາລັດຖະບານໃໝ່ໂດຍການກະທໍາແລະທົບທວນເບິ່ງການລົງໂທດຂອງຕົນໃຫ້ສອດຄ່ອງກັນໄປ.
ການເຄື່ອນໄຫວຂອງສະຫະພາບຢູໂຣບໄດ້ມີຂຶ້ນ ສ່ວນນຶ່ງແລ້ວແມ່ນ ເປັນຍ້ອນລາຍງານ ຂອງກຸ່ມແກ້ໄຂວິກິດການລະຫວ່າງຊາດ ຫລື International Crisis Group ໃນເດືອນແລ້ວນີ້ ທີ່ເວົ້າວ່າ ການລົງໂທດຕ່າງໆຕໍ່ລັດຖະບານມຽນມາ ທີ່ໄດ້ມີການຕໍ່ອາຍຸໃນທຸກໆປີນັ້ນບໍ່ໄດ້ຜົນ.
ລາຍງານຂອງກຸ່ມດັ່ງກ່າວເວົ້າຕື່ມວ່າ ການລົງໂທດທີ່ວ່ານີ້ມີຜົນກະທົບໃນທາງລົບຕໍ່ປະຊາ
ຊົນແທນທີ່ການກະທໍາດັ່ງກ່າວແມ່ນມີວັດຖຸປະສົງເພື່ອປົກປ້ອງພວກປະຊາຊົນນັ້ນ.
