ສະຫະພາບຢູໂຣບ ໄດ້ຈັດສັນ ງົບປະມານເຖິງ 60 ລ້ານຢູໂຣ ຫຼື 75 ລ້ານດອນລາ ສຳຫລັບໃຫ້ການຊ່ວຍເຫຼືອແກ່ໂຄງການພັດທະນາຕ່າງໆ ຂອງລັດຖະບານລາວ ໃນລະຍະແຜນການປະຈຳສົກປີ 2014-2015 ນີ້.
ທ່ານ Michel Goffin ຜູ້ຕ່າງໜ້າຂອງສະຫະພາບຢູໂຣບປະຈຳ ສປປ ລາວ ຖະແຫລງ
ຢືນຢັນວ່າ ສະຫະພາບຢູໂຣບໄດ້ຈັດສັນງົບປະມານ ໃນມູນຄ່າລວມເຖິງ 60 ລ້ານຢູໂຣ
ຫຼື 75 ລ້ານດອນລາ ເພື່ອໃຫ້ການຊ່ວຍເຫຼືອແກ່ໂຄງການພັດທະນາຕ່າງໆ ຂອງລັດຖະ
ບານລາວ ໃນຕະຫລອດລະຍະແຜນການປະຈຳສົກປີ 2014-2015 ດ້ວຍເປົ້າໝາຍ
ທີ່ຈະຊ່ວຍລຸດຜ່ອນບັນຫາຄວາມຍາກຈົນຂອງປະຊາຊົນລາວໃຫ້ໄດ້ຢ່າງມີປະສິດທິຜົນ.
ໂດຍສຳຫລັບໂຄງການພັດທະນາ ທີ່ສະຫະພາບຢູໂຣບ ໄດ້ໃຫ້ຄວາມສຳຄັນເປັນພິເສດ
ໃນການໃຫ້ການຊ່ວຍເຫຼືອ ແກ່ລັດຖະບານລາວ ໃນລະຍະດັ່ງກ່າວນີ້ ກໍຄືການພັດທະນາ
ການຜະລິດ ດ້ານການກະເສດຢ່າງຍືນຍົງ ເພື່ອຮັບປະກັນ ໃຫ້ແກ່ຄວາມໝັ້ນຄົງ ດ້ານສະບຽງ
ອາຫານສຳຫລັບ ປະຊາຊົນລາວທີ່ທຸກຍາກ ໃນເຂດຊົນນະບົດ ຊຶ່ງຈະນຳໃຊ້ງົບປະມານ
ເພື່ອດຳເນີນໂຄງການພັດທະນາ ໃນດ້ານດັ່ງກ່າວນີ້ ເຖິງ 27 ລ້ານຢູໂຣບ.
ສ່ວນການເກັບກູ້ລະເບີດບໍ່ທັນແຕກ (UXO) ທີ່ຕົກຄ້າງຢູ່ໃນລາວ ແລະການພັດທະນາ ໃນ
ດ້ານການສຶກສາ ສຳຫລັບເດັກນ້ອຍທຸກຄົນ ໃນເຂດຊົນນະບົດນັ້ນ ກໍຈະໄດ້ຮັບການຈັດສັນ
ງົບປະມານໃນມູນຄ່າເຖິງ 27 ລ້ານຢູໂຣ ເຊັ່ນດຽວກັນ ແລະງົບປະມານທີ່ເຫຼືອອີກ 6 ລ້ານ
ຢູໂຣນັ້ນ ຈະນຳໃຊ້ເຂົ້າໃນການພັດທະນາ ປັບປຸງການບໍລິຫານງານ ຂອງລັດຖະບານລາວ
ແລະການບັງຄັບໃຊ້ກົດໝາຍ ທີ່ມີປະສິດທິພາບ ໂດຍມີເປົ້າໝາຍ ຈະພັດທະນາໃຫ້ລາວ
ເປັນລັດແຫ່ງກົດໝາຍ ແລະເຄົາລົບຕໍ່ຫຼັກສິດທິມະນຸດຢ່າງແທ້ຈິງ.
ກ່ອນໜ້ານີ້ ສະຫະພາບຢູໂຣບ ໃນຖານະທີ່ເປັນຫຸ້ນສ່ວນດ້ານ
ການພັດທະນາ ທີ່ເຂົ້າຮ່ວມກອງປະຊຸມໂຕະມົນປະຈຳປີ 2014
ທີ່ໄດ້ຈັດຂຶ້ນທີ່ນະຄອນຫລວງວຽງຈັນ ເມື່ອກາງເດືອນພະຈິກ
ທີ່ຜ່ານມາ ໄດ້ຖະແຫລງການຮຽກຮ້ອງ ໃຫ້ລັດຖະບານລາວດຳ
ເນີນການພັດທະນາປັບປຸງ ເພື່ອຍົກລະດັບປະສິດທິພາບ ການ
ຈັດຕັ້ງປະຕິບັດວຽກງານປະຈຳສົກປີ 2014-2015 ໃນ 6 ດ້ານ
ຈາກທັງໝົດ 9 ດ້ານ ທີ່ເປັນເປົ້າໝາຍສະຫັດສະຫວັດການພັດ
ທະນາ ທີ່ລັດຖະບານລາວ ໄດ້ຕົກລົງຮ່ວມກັບ ອົງການສະຫະ
ປະຊາຊາດໄວ້ແລ້ວນັ້ນ.
ໂດຍໃນນີ້ມີຢູ່ 4 ດ້ານທີ່ກ່ຽວກັບການພັດທະນາ ເພື່ອຍົກລະດັບ
ຄຸນນະພາບ ຊີວິດຄວາມເປັນຢູ່ທີ່ດີຂຶ້ນຂອງແມ່ຍິງ ແລະເດັກ
ນ້ອຍລາວ ກໍຄືການລົບລ້າງບັນຫາຂາດສານອາຫານຂອງເດັກ
ນ້ອຍ ການລົດອັດຕາການເສຍຊີວິດ ຂອງເດັກນ້ອຍອາຍຸຕ່ຳກວ່າ 5 ປີ ການລົດອັດຕາ
ການເສຍຊີວິດຂອງແມ່ຍິງໃນຂະນະຖືພາ ຫຼືຄອດລູກ ແລະການລົດອັດຕາການປະລະ
ການຮຽນຂອງເດັກນ້ອຍ ເນື່ອງຈາກວ່າການຈັດຕັ້ງປະຕິບັດ ໃນລະຍະທີ່ຜ່ານມາ ຍັງບໍ່
ເປັນໄປຕາມເປົ້າໝາຍ ແຜນການທີ່ວາງໄວ້.
ສ່ວນອີກ 2 ດ້ານທີ່ເຫຼືອກໍແມ່ນການນຳໃຊ້ປະໂຫຍດຈາກຊັບພະຍາກອນທຳມະຊາດ ຢ່າງ
ຍືນຍົງ ເພາະສະຫະພາບຢູໂຣບເຫັນວ່າ ການນຳໃຊ້ຊັບພະຍາກອນທຳມະຊາດຂອງລາວ ໃນລະຍະທີ່ຜ່ານມານັ້ນ ເຖິງແມ່ນວ່າຈະມີຜົນດີຕໍ່ການພັດທະນາເສດຖະກິດໃຫ້ຂະຫຍາຍ ຕົວເພີ້ມຂຶ້ນຢ່າງຕໍ່ເນື່ອງກໍຕາມ ຫາກແຕ່ວ່າ ກໍໄດ້ມີການທຳລາຍ ຊັບພະຍາກອນ ທຳມະຊາດ ໄປຢ່າງຫລວງຫຼາຍ ໃນຂະນະທີ່ປະຊາຊົນລາວຫຼາຍກວ່າ 1 ລ້ານ 5 ແສນຄົນຍັງຢູ່ພາຍໃຕ້ສະພາບການທີ່ຍາກຈົນຢ່າງຍິ່ງຢູ່ເລື້ອຍມາ.
ສຳຫລັບດ້ານສຸດທ້າຍທີ່ສະຫະພາບຢູໂຣບ ໄດ້ຖະແຫລງການຮຽກຮ້ອງນັ້ນ ກໍຄືການປັບປຸງການຈັດຕັ້ງ ປະຕິບັດຂອງທາງການລາວ ຕໍ່ຫລັກສິດທິມະນຸດຊົນ ໃຫ້ມີຄວາມໂປ່ງໃສ ແລະໄດ້ມາດຕະຖານສາກົນຢ່າງແທ້ຈິງ ເນື່ອງຈາກຍັງປາກົດມີການລະເມີດສິດທິຂັ້ນພື້ນຖານ ຂອງພົນລະເມືອງລາວເກີດຂຶ້ນຢູ່ເລື້ອຍມາ ຊຶ່ງລວມເຖິງກໍລະນີການຫາຍຕົວໄປຂອງ ທ່ານສົມບັດ ສົມພອນ ດ້ວຍ.
ໂດຍໃນປັດຈຸບັນ ບັນດາອົງການສິດທິມະນຸດຊົນໃນອາຊ່ຽນຍັງຄົງຮ່ວມກັນລົນນະລົງເພື່ອຮຽກຮ້ອງໃຫ້ລັດຖະບານຂອງທຸກປະເທດໃນອາຊ່ຽນ ໄດ້ໃຫ້ຄວາມສຳຄັນໃນການຕາມຫາ ທ່ານສົມບັດ ຢ່າງຈິງຈັງ ເນື່ອງຈາກຖືເປັນບັນຫາຂອງອາຊ່ຽນທັງກຸ່ມ ດັ່ງທີ່ຜູ້ປະສານງານອົງການພາກປະຊາສັງຄົມໃນໄທ ໄດ້ຢືນຢັນວ່າ:
“ເລື້ອງນີ້ບໍ່ແມ່ນເລື້ອງຂອງປະເທດລາວປະເທດດຽວ ເພາະສະນັ້ນ ຄວາມຮັບຜິດ
ຊອບຮ່ວມກັນ ຈຳເປັນທີ່ຈະຕ້ອງເກີດຂຶ້ນ ລັດຖະບານໄທ ແລະລັດຖະບານປະຊາ
ຄົມອາຊ່ຽນໜ້າຈະສະແດງອອກຈຸດຢືນເຫຼົ່ານີ້ຮ່ວມກັນ.”
ທາງດ້ານທ່ານນາງ Ng Shui Meng ພັນລະຍາຂອງ ທ່ານສົມບັດ ສົມພອນ ໄດ້ໃຫ້ການຢືນຢັນວ່າ ທ່ານນາງຍັງບໍ່ໄດ້ຮັບຂ່າວຄາວໃດເລີຍຈາກຜູ້ເປັນສາມີຂອງທ່ານນາງ ທັງຍັງບໍ່ມີຄວາມຄືບໜ້າຈາກການສືບສວນຂອງທາງການຕຳຫລວດລາວອີກດ້ວຍ.
