ກອງທະຫານອິນເດຍ ທີ່ຖືກສົ່ງໄປປາບປາມຄວາມຮຸນແຮງລະຫວ່າງຊາວເຜົ່າ ທີ່ແຂວງ ອັສສໍາ ໄດ້ຮັບຄໍາສັ່ງໃຫ້ຍິງຜູ້ຕ້ອງສົງໄສກໍ່ຄວາມວຸ້ນວາຍຄາທີ່ ໃນທ່າມກາງການປະທະກັນ ທີ່ເຮັດໃຫ້ມີຄົນຕາຍຢ່າງໜ້ອຍ 22 ຄົນ.
ພວກເຈົ້າໜ້າທີ່ທ້ອງຖິ່ນ ໄດ້ຮ້ອງຂໍກໍາລັງໜຸນຫລັງຕື່ມອີກ ໃນວັນອັງຄານມື້ນີ້ ຫລັງຈາກເກີດການຕໍ່ສູ້ກັນໃໝ່ອີກໃນຕອນກາງຄືນ. ເຮືອນຫລາຍຫລັງຕື່ມໄດ້ຖືກຈູດເຜົາ ໂດຍກຸ່ມທີ່ຕໍ່ຕ້ານກັນ. ໃນເຫດຮຸນແຮງຫລ້າສຸດນັ້ນ ຝຸງຊົນກຸ່ມນຶ່ງ ທີ່ມີຈໍານວນຫລາຍຮ້ອຍຄົນ ໄດ້ພາກັນໂຈມຕີລົດດ່ວນຂະບວນນຶ່ງ ທີ່ແລ່ນຜ່ານຂົງເຂດ ໃນເຊົ້າມື້ນີ້.
ຫລາຍກວ່າ 40.000 ຄົນໄດ້ພາກັນຫລົບໜີຈາກບ້ານເຮືອນຂອງເຂົາເຈົ້າ ນັບຕັ້ງແຕ່ເກີດການປະທະກັນ ໃນວັນສຸກຜ່ານມາ ລະຫວ່າງ ຊາວເຜົ່າພື້ນເມືອງ Kodo ແລະຊາວມຸສລິມ ທີ່ເຂົ້າໄປຕັ້ງຖິ່ນຖານຢູ່ໃນເຂດນັ້ນ. ລັດຖະບານ New Delhi ໄດ້ເປີດທີ່ພັກພາອາໄສ ໃຫ້ແກ່ບັນດາຜູ້ທີ່ບໍ່ມີບ່ອນຢູ່.
ຄວາມຄຽດແຄ້ນ ແລະການກ່າວຫາຕ່າງໆນາໆ ກ່ຽວກັບການລັກຍາດເອົາດີິນ ໄດ້ເປັນບັນຫາທີ່ລໍຖ້າຈຸດລະເບີດມາເປັນເວລາດົນນານ ລະຫວ່າງປະຊາຄົມ ຊາວເຜົ່າ Bodo ແລະຊາວມຸສລິມຫລາຍພັນຄົນ ເຜົ່າ Bengal ເປັນສ່ວນໃຫຍ່ ທີ່ເຂົ້າໄປຕັ້ງຖິ່ນຖານໃນແຂວງອັສສໍາ ຊຶ່ງຈໍານວນຫລາຍເປັນຜູ້ທີ່ໜີມາຈາກເຂດທີ່ເຄີຍເປັນປາກິສຖານຕາເວັນອອກ ໃນສະໄໝກ່ອນ ກ່ອນຈະກາຍມາເປັນປະເທດ Bangladesh ໃນປີ 1971.