ສານຂອງອີທິໂອເປຍ ໄດ້ຕັດສິນໂທດນັກຂ່າວຊາວສະວີເດັນ 2 ຄົນ ຊຶ່ງຕ່າງກໍໄດ້ຮັບ
ໂທດຈຳຄຸກຄົນລະ 11 ປີ ໃນຂໍ້ຫາວ່າໃຫ້ການສະໜັບໜູນການກໍ່ການ ຮ້າຍຢູ່ໃນອີທິ
ໂອເປຍ ແລະໄດ້ເຂົ້າໄປໃນປະເທດດັ່ງກ່າວຢ່າງຜິດກົດໝາຍ.
ສານຢູ່ນະຄອນ Addis Ababa ໄດ້ທໍາການຕັດສິນໂທດດັ່ງກ່າວໃນວັນອັງຄານມື້ນີ້
ຊຶ່ງເປັນເວລາເກືອບ 1 ອາທິດ ລຸນຫລັງທີ່ໄດ້ພົບເຫັນວ່ານາຍ Martin Schibbye
ນັກຂ່າວສືບສວນແລະນາຍ Johan Persson ຊຶ່ງເປັນນັກຂ່າວຖ່າຍພາບມີຄວາມຜິດ.
ແຕ່ລະຄົນປະເຊີນກັບໂທດຈໍາຄຸກດົນເຖິງ 18 ປີ.
ຜູ້ພິພາກສາທ່ານນຶ່ງກ່າວໃນອາທິດແລ້ວນີ້ວ່າ ພວກນັກຂ່າວທັງສອງ ບໍ່ມີທ່າທີວ່າ ໄດ້ພະຍາຍາມໄປເກັບກໍາເອົາຂ່າວເລີຍ ໃນຂະນະທີ່ພວກເຂົາເຈົ້າໄດ້ເຂົ້າໄປໃນອີທິ
ໂອເປຍໃນເດືອນກໍລະກົດ ກັບກຸ່ມກະບົດ ແນວໂຮມປົດປ່ອຍຊາດ Ogeden ຫລື
ONFL ນັ້ນ ຊຶ່ງຖືກອີທິໂອເປຍລະບຸວ່າ ເປັນກຸ່ມກໍ່ການຮ້າຍກຸ່ມນຶ່ງ.
ພວກນັກຂ່າວທັງສອງໄດ້ຮັບສາລະພາບຜິດວ່າ ໄດ້ເຂົ້າໄປໃນປະເທດດັ່ງກ່າວຢ່າງຜິດ
ກົດໝາຍ ແຕ່ວ່າລັດຖະບານສະວີເດັນ ແລະພວກກຸ່ມປົກປ້ອງສິດທິມະນຸດໄດ້ຕໍາໜິ
ອີທີໂອເປຍວ່າ ຜູ້ຊາຍທັງສອງໄດ້ປະຕິບັດວຽກງານທີ່ຖືກຕ້ອງເໝາະຕາມກົດໝາຍ.
