ລິ້ງ ສຳຫລັບເຂົ້າຫາ

ວັນເສົາ, ໒໐ ກໍລະກົດ ໒໐໒໔

ກຸ່ມປະຊາຊົນ ​ເພື່ອ​ຄວາມ​ຮັບຜິດຊອບ​ ແລະ​ຈັນ​ຍາ​ບັນ ຫຼື CREW ຍື່ນຟ້ອງ ທ່ານ Trump


ໂຮງແຮມນາໆຊາດ Trump ທີ່ 1100 ຖະໜົນ Pennsylvania ນະຄອນ ວໍຊີງຕັນ ວັນທີ 21 ທັນວາ, 2016,
ໂຮງແຮມນາໆຊາດ Trump ທີ່ 1100 ຖະໜົນ Pennsylvania ນະຄອນ ວໍຊີງຕັນ ວັນທີ 21 ທັນວາ, 2016,

ພຽງ​ແຕ່​ເຂົ້າຮັບ​ຕຳ​ແໜ່​ງ​ໄດ້ 3 ມື້​ເທົ່າ​ນັ້ນ ປະທານາທິບໍດີ​ສະຫະລັດ ທ່ານ Donald
Trump ກໍ​ປະ​ເຊີນໜ້າ​ກັບ​ການ​ທ້າ​ທາຍ​ທາງດ້ານ​ກົດໝາຍ​ເປັນ​ເທື່ອ​ທຳ​ອິດ ຕໍ່​ລັດຖະບານ​ຂອງ​ທ່ານ.

ກຸ່ມປະຊາຊົນ​ເພື່ອ​ຄວາມ​ຮັບຜິດຊອບ​ແລະ​ຈັນ​ຍາ​ບັນ ຫຼື CREW ທີ່​ນະຄອນ​ວໍ​ຊິງ​ຕັນໄດ້​ຍື່ນ​ຟ້ອງ​ ໃນ​ວັນ​ຈັນ​ວານ​ນີ້ ທີ່​ນະຄອນ New York ​ໂດຍ​ກ່າວ​ຫາ​ວ່າ ການ​ເປັນເຈົ້າຂອງ​ຢ່າງ​ກວ້າງຂວາງ​ໃນ​ທຸລະ​ກິດ​ ຂອງປະທານາທິບໍດີຄົນ​ໃໝ່ ​ເຮັ​ດໃຫ້​ທ່ານ​ລະ​ເມີດ​ຕໍ່​ກົດ​ລະບຽບ ​ທີ່​ລີ້ຊ່ອນ ​ຢູ່​ໃນ​ລັດຖະທຳ​ມະນູນສະຫະລັດ.

ທ່ານ Trump ບໍ່​ໄດ້​ໃຫ້​ຄວາມ​ສຳຄັນຢ່າງ​ໄວວາຕໍ່​ການ​ເຄື່ອນ​ໄຫວ​ດັ່ງກ່າວ ​ແລະ​ກ່າວ​ເຖິງ​ການຟ້ອງຮ້ອງ​ນີ້​ວ່າ​ ​“ບໍ່​ມີ​ຫຍັງ​ດີ​ເລີຍ.”

ການ​ຟ້ອງ​ຮ້ອງ​ທີ່​ວ່າ​ນີ້ ​ແມ່ນອີງ​ຕາມ ອັນ​ທີ່​ເອີ້ນວ່າ “​ວັກ​ທີ່​ເວົ້າ​ເຖິງ​ເງິນ​ຄ່າ​ຕອບ​ແທນ”
ຂອງ​ລັດຖະທຳ​ມະນູນ ທີ່​ກ່າວ​ວ່າ ອຳນາດ ​ແລະ​ລັດຖະບານ​ຕ່າງປະ​ເທດ ຈະ​ຕ້ອງ​ບໍ່​ຈ່າຍ​ເງິນ​ເປັນ​ງວດ ຫຼືຂອງ​ຂວັນ​ ໃຫ້​ແກ່ປະທາ​ນາ​ທິບໍດີ ​ໂດຍ​ບໍ່​ໄດ້​ຮັບ​ອະນຸມັດ​ຈາກ​ລັດຖະ
ສະພາ.

ອີງ​ຕາມ​ໜັງສືພິມ New York Times ທີ່​ໄດ້​ລາຍ​ງານເທື່ອ​ທຳ​ອິດ ກ່ຽວ​ກັບ​ເລື່ອງ​ນີ້​ໃນ​
ວັນ​ອາທິດ​ຜ່ານ​ມາ​ນີ້ ​ແຈ້ງວ່າ ການ​ຟ້ອງ​ຮ້ອງ​ນີ້ ບໍ່​ໄດ້​ຕ້ອງການ​ຄ່າ​ເສຍ​ຫາຍ​ເປັນເງິນ
ແຕ່​ຮ້ອງ​ຂໍ​ໃຫ້ທາງ​ສານ ​ຍຸຕິ​ປະທານາທິບໍດີ ບໍ່​ໃຫ້​ຮັບ​ເອົາ​ເງິນ​ຈາກອົງ​ກອນຕ່າງປະ​ເທດ.​

ກຸ່ມ CREW ກ່າວ​ວ່າ ຍ້ອນ​ທ່ານ Trump ບໍ່​ຍອມ​ຖອນ​ຕົວອອກ​ຈາກ​ການ​ທຸລະ​ກິດ
ໂດຍ​ທັງ​ໝົດຂອງ​ທ່ານ “ທ່ານ​ຈຶ່ງ​ຍັງ​ຮັບ​ເງິນ​ແລະເປັນ​ທີ່​ນິຍົມ​ຊົມ​ຊອບຈາກ​ລັດຖະບານ​ຕ່າງປະ​ເທດ​ ​ໂດຍ​ຜ່ານ​ການ​ເຊື້ອ​ເຊີນ​ໃຫ້​ໄປ​ເປັນ​ແຂກ ​ແລະປາກົດ​ຕົວ​ໃນ​ງານ​ຕ່າງໆ ​ທີ່ໂຮງ​ແຮມ​ຂອງ​ທ່ານ, ​ໃຫ້​ເຊົ່າຕຶກອາຄານ​ຕ່າງໆຂອງ​ທ່ານ ​ແລະການ​ຕົກລົງ​ທາງ
​ທຸລະ​ກິດອະສັງຫາລິມມະ​ຊັບ​ໃນ​ຕ່າງປະ​ເທດ.”

ຜູ້ອຳນວຍການ​ຂອງ​ກຸ່ມ ທ່ານ Noah Bookbinder ​ໄດ້ກ່າວຢູ່​ໃນ​ຖະ​ແຫຼງການສະບັບນຶ່ງ​ວ່າ “ພວກ​ເຮົາບໍ່​ຕ້ອງການ​ຈະ​ໃຫ້ມາ​ຮອດ​ຂັ້ນ​ນີ້. ມັນ​ເປັນ​ຄວາມ​ຫວັງ​ຂອງ​ພວກເຮົາ
ທີ່​ວ່າ ປະທານາທິບໍດີຈະ​ເອົາ​ບາດກ້າວ​ທີ່​ຈຳ​ເປັນ​ເພື່ອ​ຫຼີກ​ເວັ້ນການລະ​ເມີດ​ລັດຖະທຳ​ມະນູນ.”

ແຕ່​ແນວ​ໃດກໍ​ຕາມ ທ່ານ​ນາງ Sherri Dillon ນຶ່ງ​ໃນທະນາຍຄວາມ​ ຂອງທ່ານ Trump ຢືນຢັດວ່າ ປະທານາທິບໍດີ​ໄດ້​ປະຕິບັດ​ຕາມ​ພັນທະ​ທາງ​ດ້ານ​ຈັນ​ຍາ​ບັນ​ຕ່າງໆ ຂອງ​ທ່ານ
ຕາມ​ໜ້າ​ທີ່​ກຳໜົດ​ໄວ້ ໃນ​ກອງ​ປະຊຸມ​ຖະ​ແຫຼ​ງຂ່າວເມື່ອ​ຕົ້ນ​ເດືອນ​ນີ້. “ບໍ່​ມີ​ຜູ້​ໃດ ​ເຄີຍໄດ້
​ຄິດ​ໄວ້ ​ໃນຕອນ​ທີ່​ມີ​ການ​ຂຽນລັດຖະທຳ​ມະນູນ​ຂຶ້ນ​ມ​ານັ້ນ ​ໂດຍ​ກ່າວ​ວ່າ ການ​ຈ່າຍຄ່າ​ໂຮງ​ແຮມ​ຂອງ​ທ່ານ​ນັ້ນ ຈະ​ຖືກ​ເອີ້ນ​ວ່າ ເປັນເງິນ​ຄ່າ​ຕອບ​ແທນ.”

ອ່ານ​ຂ່າວ​ນີ້​ເພີ້​ມຕື່ມ​ເປັນ​ພາສາ​ອັງກິດ

XS
SM
MD
LG