ສຽງປືນໄດ້ດັງຂຶ້ນໃນວັນຈັນວານນີ້ ທີ່ເມືອງ ພອດ-ໂອ-ພຣິນສ໌ (Port-au-Prince) ໃກ້ກັບທຳນຽບປະທານາທິບໍດີແຫ່ງຊາດ ຖືເປັນເຫດການທີ່ຮຸນແຮງຄັ້ງຫຼ້າສຸດ ທີ່ເຮັດໃຫ້ເກີດຄວາມຮຸນແຮງໃນເຮຕີ.
ໃນຊ່ວງທ້າຍເດືອນກຸມພາທີ່ຜ່ານມາ, ກຸ່ມປະກອບອາວຸດໄດ້ທຳການໂຈມຕີແບບປະສານງານເພື່ອຮຽກຮ້ອງໃຫ້ນາຍົກລັດຖະມົນຕີ ແອຣຽລ ເຮັນຣີ (Ariel Henry) ລາອອກຈາກຕຳແໜ່ງ. ມາຮອດປະຈຸບັນນີ້, ແມ່ນສາມອາທິດແລ້ວຫລັງຈາກ ທ່ານ ເຮັນຣີ ກ່າວວ່າ ທ່ານຈະລາອອກ ເມື່ອມີການຈັດຕັ້ງສະພາປະທານາທິບໍດີ ໃນຊ່ວງໄລຍະຂ້າມຜ່ານ, ແຕ່ຍັງບໍ່ທັນມີຜູ້ສືບທອດຕໍ່າແໜ່ງເທື່ອ, ເຊິ່ງໄດ້ກະຕຸ້ນໃຫ້ກຸ່ມແກັ່ງອັນຕະພານ ຄູ່ແຂ່ງຕໍ່ສູ້ຍາດແຍ່ງເອົາການຄວບຄຸມພາກສ່ວນຕ່າງໆ ຂອງນະຄອນຫຼວງ ແລະເຂດອ້ອມຂ້າງ.
ໃນວັນຈັນວານນີ້ ພວກມືປືນໄດ້ເຂົ້າຄວບຄຸມລົດຫຸ້ມເກາະຄັນນຶ່ງ ຈາກເຈົ້າໜ້າທີ່ຮັກສາທຳນຽມ. ໃນເຂດອື່ນຂອງເມືອງ, ໄດ້ມີການພົບເຫັນຜູ້ເສຍຊີວິດ 4 ຄົນຢູ່ເຂດຊານເມືອງ Petion-Ville ຂອງເມືອງຫຼວງ. ຄວາມຮຸນແຮງທີ່ຮ້າຍແຮງຂຶ້ນ ຍັງໄດ້ພາໃຫ້ມີການໂຈມຕີສະໜາມບິນ ແລະທ່າກຳປັ່ນຫຼັກ ເຊິ່ງໄດ້ກີດຂວາງການເຂົ້າເຖິງສິນຄ້າທີ່ສຳຄັນ.
ໃນປັດຈຸບັນ, ມີການຮຽກຮ້ອງໃຫ້ມີການປ່ຽນລັດຖະບານຂ້າມຜ່ານ ທີ່ເປັນທາງເລືອກອື່ນ ທີ່ສາມາດຫຼຸດຜ່ອນເຫດການຄວາມບໍ່ສະຫງົບໄດ້.
ທ່ານ ເດັນນິສ ແຮນກິນສ໌ (Dennis Hankins) ເອກອັກຄະລັດຖະທູດສະຫະລັດ ປະຈຳເຮຕີ ທີ່ໄດ້ຮັບການແຕ່ງຕັ້ງເມື່ອບໍ່ດົນມານີ້ ໄດ້ເດີນທາງໄປເຖິງປະເທດດັ່ງກ່າວ ໃນວັນຈັນວານນີ້. ສະຫະລັດ ແລະບັນດາປະເທດອື່ນໆ ກຳລັງພະຍາຍາມ ອົບພະຍົບພົນລະເມືອງຂອງຕົນ ແລະເສີມຂະຫຍາຍແນວເຂດຊາຍແດນຂອງຕົນ ເພື່ອຕ້ານການຫລັ່ງໄຫລເຂົ້າໄປຂອງພວກອົບພະຍົບ ທີ່ພະຍາຍາມຫລົບໜີຈາກຄວາມຮຸນແຮງ.
ລັດຖະບານເມັກຊິໂກ ປະກາດໃນວັນຈັນວານນີ້ ກ່ຽວກັບ ການຍົກຍ້າຍພົນລະເມືອງ 34 ຄົນຂອງຕົນ ອອກຈາກເຮຕີ ດ້ວຍກຳປັ່ນທະຫານ ໂດຍກ່າວເຖິງສະພາບຄວາມໝັ້ນຄົງທີ່ຊຸດໂຊມລົງໃນປະເທດ ແຄຣີບຽນ (Caribbean).
ຟໍຣັມສະແດງຄວາມຄິດເຫັນ