ປະທານາທິບໍດີ ເທີກີ ທ່ານ ຣີເຊັບ ໄຕຢິບ ເອີດູອານ ກ່າວໃນວັນອັງຄານມື້ນີ້ ວ່າ ການ
ສັງຫານນັກຂ່າວຊາອຸດີ ອາຣາເບຍ ທີ່ພຳນັກ ຢູ່ໃນສະຫະລັດ ທ່ານ ຈາມາລ ຄາຊອກກີ
ແມ່ນການກະທຳທີ່ມີການວາງແຜນລ່ວງໜ້າ ແລະພວກທີ່ຮັບຜິດຊອບທັງໝົດ ຮວມທັງ
ຜູ້ໃດກໍຕາມ ທີ່ເປັນຜູ້ອອກຄຳສັ່ງ ໃນການປະຕິບັດງານຄັ້ງນີ້ ຄວນຈະຖືກລົງໂທດ.
ໃນຄຳປາໄສຕໍ່ສະພາແຫ່ງຊາດນັ້ນ ທ່ານເອີດູອານ ໄດ້ໃຫ້ລາຍລະອຽດ ກ່ຽວກັບສິ່ງທີ່
ເກີດຂຶ້ນ ໃນມື້ ກ່ອນທີ່ທ່ານ ຄາຊອກກີ ຈະເຂົ້າໄປໃນສະຖານກົງສຸນ ຊາອຸດີ ທີ່ນະຄອນ
ອິສຕັນບູລ. ທ່ານ ກ່າວວ່າ ມີຄະນະທີມຫຼາຍໆຈຸ ໄດ້ບິນໄປຍັງ ນະຄອນ ອິສຕັນບູລ
ເພື່ອພົບກັບ ທ່ານ ຄາຊອກກີ ທີ່ສະຖານກົງສຸນດັ່ງກ່າວ ແລະເອົາເຄື່ອງເກັບກຳຂໍ້ມູນ
ຂອງລະບົບໂທລະທັດວົງຈອນປິດ ອອກ.
ທ່ານ ເອີດູອານ ກ່າວວ່າ ຄູ່ໝັ້ນຂອງ ທ່ານ ຄາຊອກກີ ທ່ານນາງ ຮາຕິສ ເຊັນກິສ ໄດ້ຖ້າ
ຢູ່ຂ້າງນອກກົງສຸນ ເປັນເວລາຫຼາຍໆຊົ່ວໂມງ ກ່ອນຈະຕິດຕໍ່ຫາເຈົ້າໜ້າທີ່ເທີກີ ແລະ
ແຈ້ງໃຫ້ຊາບວ່າ ທ່ານ ຄາຊອກກີ ໄດ້ຖືກກັກຕົວໄວ້ຢູ່ຂ້າງໃນ ແລະທ່ານ ກຳລັງຕົກຢູ່ໃນ
ອັນຕະລາຍ.
ຈາກຈຸດນັ້ນ ການສືບສວນເລີ້ມດຳເນີນຂຶ້ນແບບຊ້າໆ ໂດຍ ທ່ານ ເອີດູອານ ອ້າງເຫດ
ຜົນ ໃນການຄຸ້ມຄອງທາງດ້ານການທູດ ຂອງສະຖານກົງສຸນ ແຕ່ ທ່ານ ກ່າວວ່າ
ຕຳຫຼວດເທີກີ ແມ່ນແນ່ໃຈວ່າ ທ່ານຄາຊອກກີ ບໍ່ໄດ້ອອກຈາກກົງສົນໄປ ດ້ວຍຕົວຂອງ
ທ່ານເອງ ດັ່ງທີ່ ຊາອຸດີ ໄດ້ກ່າວອ້າງໄປໃນຂັ້ນຕົ້ນນັ້ນ.
ຊາອຸດີໄດ້ຍອມຮັບໃນເວລາຕໍ່ມາວ່າ ທີ່ຈິງແລ້ວທ່ານ ຄາຊອກກີ ໄດ້ເສຍຊີວິດ ໃນສະ
ຖານກົງສຸນ ໂດຍໃນຂັ້ນຕົ້ນເວົ້າວ່າ ມັນເກີດຂຶ້ນຍ້ອນມີການຕໍ່ສູ້ກັນ ແຕ່ໃນເວລາຕໍ່ມາ
ກ່າວວ່າ ທ່ານ ຄາຊອກກີ ໄດ້ເສຍຊີວິດ ຍ້ອນຖືກຫັດຄໍເພື່ອສະກັດ ກັ້ນບໍ່ໃຫ້ຜູ້ກ່ຽວ
ອອກໄປຈາກສະຖານກົງສຸນ ເພື່ອໂທຫາຄວາມຊ່ວຍເຫຼືອ.
ທ່ານ ເອີດູອານ ກ່າວໃນວັນອັງຄານມື້ນີ້ວ່າ ຊາອຸດີ ອາຣາເບຍ ໄດ້ເອົາບາດກ້າວ ທີ່
ສຳຄັນ ໂດຍຍອມຮັບ ກ່ຽວກັບການສັງຫານທີ່ເກີດຂຶ້ນ ແຕ່ທ່ານ ກໍຄາດວ່າ ພວກຜູ້ນຳ
ຂອງປະເທດດັ່ງກ່າວ ຈະໃຫ້ພວກທີ່ຮັບຜິດຊອບທັງໝົດ ຖືກນຳໂຕມາລົງໂທດ ບໍ່ສຳ
ຄັນວ່າ ພວກເຂົາເຈົ້າ ຈະຢູ່ໃນລະດັບໃດ. ທ່ານ ກ່າວວ່າ ບໍ່ຄວນຈະມີການຖິ້ມໂທດໃສ່
ແຕ່ພວກເຈົ້າໜ້າທີ່ສືບລັບ ແລະທ່ານ ສະເໜີແນະວ່າ ການດຳເນີນຄະດີ ຈະເລີ້ມຂຶ້ນ
ທີ່ນະຄອນ ອິສຕັນບູລ ຍ້ອນວ່າ ທ່ານຄາຊອກກີ ເສຍຊີວິດ ຢູ່ທີ່ນັ້ນ.
