ພະນັກງານຫຼາຍກວ່າ 28,000 ຄົນຂອງບໍລິສັດ Samsung Electronics ຂອງ ເກົາຫຼີໃຕ້ ຈະຈັດການຍ່າງອອກຈາກວຽກນຶ່ງວັນໃນອາທິດໜ້າ ເພື່ອຮຽກຮ້ອງສຳລັບຄ່າຈ້າງ ແລະ ຜົນປະໂຫຍດທີ່ດີກວ່າເກົ່າ.
ກຳມະບານຂອງບໍລິສັດ Samsung Electronics ແຫ່ງຊາດໄດ້ປະກາດການນັດຢຸດງານໃນວັນພຸດ ທີ 7 ມິຖຸນາ ໃນລະຫວ່າງກອງປະຊຸມຖະແຫຼງຂ່າວສົດທາງອອນໄລນ໌. ການຍ່າງອອກຈາກວຽກຈະເປັນການນັດຢຸດງານຄັ້ງທຳອິດຂອງພະນັກງານຕໍ່ບໍລິສັດຍັກໃຫຍ່ດ້ານເທັກໂນໂລຈີນັ້ນ ຖ້າມັນດຳເນີນໄປຕໍ່ໜ້າ.
ກຳມະບານແມ່ນໄດ້ທຳການເຈລະຈາກັບຜູ້ບໍລິຫານຂອງບໍລິສັດ Samsung ກ່ຽວກັບ ສັນຍາໃໝ່ນັບຕັ້ງແຕ່ເດືອນມັງກອນເປັນຕົ້ນມາ. ໂຄສົກກຳມະບານໄດ້ກ່າວໃນລະຫວ່າງກອງປະຊຸມຖະແຫຼງຂ່າວສົດທາງອອນໄລນ໌ວ່າ ເຂົາເຈົ້າໄດ້ຮັບຂໍ້ສະເໜີຂຶ້ນເງິນເດືອນຂອງບໍລິສັດ, ແຕ່ໄດ້ກ່າວວ່າກຳມະບານກໍຢາກໄດ້ວັນພັກເພີ່ມຕື່ມອີກມື້ນຶ່ງ ພ້ອມກັບລະບົບທີ່ໂປ່ງໃສ ກ່ຽວກັບ ເງິນໂບນັສທີ່ອີງໃສ່ຜົນງານ.
ໂຄສົກຂອງບໍລິສັດ Samsung Electronics ໄດ້ອອກຖະແຫຼງການສະບັບນຶ່ງເວົ້າວ່າເຂົາເຈົ້າຈະສືບຕໍ່ການເຈລະຈາກັບກຳມະບານ.
Samsung Electronics ແມ່ນບໍລິສັດຫຼັກໃນເຄືອຂອງກຸ່ມ Samsung, ເຊິ່ງແມ່ນກຸ່ມບໍລິສັດຄອບຄົວທີ່ໃຫຍ່ທີ່ສຸດ ທີ່ໄດ້ຄອບງຳເສດຖະກິດຂອງ ເກົາຫຼີໃຕ້. ເຂົາເຈົ້າແມ່ນຜູ້ຜະລິດໄມໂຄຣຊິບຄວາມຈຳທີ່ນຳໜ້າໝູ່ຂອງໂລກ ແລະ ເປັນນຶ່ງໃນຜູ້ຜະລິດໂທລະສັບສະຫຼາດທີ່ໃຫຍ່ທີ່ສຸດໃນໂລກ. ບັນດານັກສັງເກດການເຊື່ອວ່າການນັດຢຸດງານນຶ່ງວັນອາດນຳໄປສູ່ການນັດຢຸດງານທົ່ວໄປໃນຈຸດນຶ່ງ, ເຊິ່ງອາດສົ່ງຜົນກະທົບທາງລົບຕໍ່ຕ່ອງໂສ້ການສະໜອງສິນຄ້າໂລກ ໃນເຄື່ອງໄຟຟ້າທີ່ມີລາຄາສູງທັງຫຼາຍ.
Samsung Electronics ໄດ້ປ້ອງກັນພະນັກງານຂອງເຂົາເຈົ້າຈາກການເຂົ້າກຳມະບານເປັນເວລາຫຼາຍທົດສະວັດຈົນຮອດປີ 2020, ເວລາທີ່ຮອງປະທານ ທ່ານ ລີ ແຈ-ຢອງ ຖືກດຳເນີນຄະດີສຳລັບການໃຫ້ສິນບົນ.
ຟໍຣັມສະແດງຄວາມຄິດເຫັນ