ປະຊາຊົນຫຼາຍລ້ານຄົນແມ່ນກຳລັງໃຊ້ພະລັງງານຫຼາຍຊະນິດແຕກຕ່າງກັນໃນແຕ່ລະວັນ ແລະ ປີ 2023 ເປັນປີທີ່ທຳລາຍສະຖິຕິສຳລັບແຫຼ່ງພະລັງງານໝຸນວຽນ, ເຊິ່ງເປັນຊະນິດທີ່ບໍ່ປ່ອຍມົນລະພິດ ທີ່ສ້າງຄວາມອຸ່ນຂອງໂລກຄືອາຍ ຄາບອນ ໄດອົກໄຊ ແລະ ເມເຕນ, ອີງຕາມລາຍງານທີ່ຖືກເປີດເຜີຍໃນວັນພຸດວານນີ້ໂດຍອົງການ Ember, ເຊິ່ງແມ່ນອົງການນັກວິໄຈທີ່ມີຫ້ອງການຕັ້ງຢູ່ໃນນະຄອນຫຼວງ ລອນດອນ ຂອງ ອັງກິດ.
ເປັນຄັ້ງທຳອິດ, ທີ່ພະລັງງານ 30 ເປີເຊັນຖືກຜະລິດໃນທົ່ວໂລກ ແມ່ນມາຈາກແຫຼ່ງພະລັງງານສະອາດ ໃນຂະນະທີ່ຟາມແສງຕາເວັນ ແລະ ລົມ ໄດ້ສືບຕໍ່ເຕີບໂຕຢ່າງວ່ອງໄວ.
ຈາກຊະນິດຂອງພະລັງງານສະອາດທີ່ຖືກຜະລິດໃນປີກາຍນີ້, ເຂື່ອນໄຟຟ້າໄດ້ຜະລິດຫຼາຍທີ່ສຸດ. ນັ້ນແມ່ນຄືກັບໃນຫຼາຍປີທີ່ຜ່ານມາ. ແຕ່ໄພແຫ້ງແລ້ງໃນ ອິນເດຍ, ຈີນ, ທະວີບອາເມຣິກາເໜືອ ແລະ ເມັກຊິໂກ ໄດ້ເຮັດໃຫ້ພະລັງງານໄຟຟ້ານ້ຳຕົກຫຼຸດລົງຕ່ຳທີ່ສຸດໃນຮອບຫ້າປີ. ການຄົ້ນຄວ້າສະແດງໃຫ້ເຫັນວ່າ ສະພາບອາກາດປ່ຽນແປງ ແມ່ນກຳລັງເຮັດໃຫ້ໄພແຫ້ງແລ້ງຕ່າງໆພັດທະນາຂຶ້ນໄວກວ່າເກົ່າ ແລະ ຮ້າຍແຮງກວ່າເກົ່າ.
ປະຊາຊົນໄດ້ໃຊ້ໄຟຟ້າຫຼາຍກວ່າແຕ່ກ່ອນໃນປີກາຍນີ້, ເພີ້ມຂຶ້ນປະມານ 2 ເປີເຊັນ, ເຊິ່ງເປັນການເພີ້ມຂຶ້ນຫຼາຍເທົ່າກັບປະມານທີ່ປະເທດ ການາດາ ໄດ້ໃຊ້ໃນນຶ່ງປີ. ຄວາມຮຽກຮ້ອງຕ້ອງການໃໝ່ບາງອັນນີ້ ແມ່ນສຳລັບເຄື່ອງປ້ຳອາຍຮ້ອນ, ເຊິ່ງເປັນວິທີທີ່ມີປະສິດທິຜົນຕໍ່ການໃຫ້ອາຍອຸ່ນ ແລະ ອາຍເຢັນຕໍ່ຕຶກອາຄານຕ່າງໆ, ແລະ ສຳລັບລົດໄຟຟ້າ. ມັນຍັງຖືກໃຊ້ສຳລັບເຄື່ອງແຍກໄຟຟ້າ, ເຊິ່ງແມ່ນເຄື່ອງຈັກພິເສດທີ່ຖືກໃຊ້ເພື່ອນຳເອົາທາດແກັສອອກຈາກນ້ຳ, ສຳລັບພະລັງງານ. ທັງໝົດນີ້ແມ່ນເທັກໂນໂລຈີທີ່ສະໜອງຂໍ້ແກ້ໄຂຕໍ່ສະພາບອາກາດປ່ຽນແປງ.
ຄວາມຮຽກຮ້ອງຕ້ອງການອື່ນທີ່ເພີ້ມຂຶ້ນ ແມ່ນສຳລັບໄຟຟ້າເພື່ອສະໜອງໃຫ້ສູນກາງຂໍ້ມູນ ແລະ ສຳລັບເຄື່ອງປັບອາກາດ, ໃນຂະນະທີ່ສະຖານທີ່ຕ່າງໆໃນທົ່ວໂລກ ມີຄວາມຮ້ອນຂຶ້ນ.
ຟໍຣັມສະແດງຄວາມຄິດເຫັນ