ພວກອາສາສະໜັກໃນລັດຄາລີຟໍເນຍແລະລັດອື່ນໆໃນພາກ
ຕາເວັນຕົກຂອງສະຫະລັດ ໄດ້ພາກັນອອກໄປຈົດທະບຽນ
ພວກຜູ້ມີສິດປ່ອນບັດເລືອກຕັ້ງເຊື້ອສາຍ Hispanic ທີ່
ປາກພາສາສະເປນຫລື Portugal ກ່ອນມື້ປ່ອນບັດ
ເລືອກຕັ້ງ.
ກຸ່ມອາສາສະໝັກກຸ່ມນີ້ ຊື່ວ່າ Voto Latino ຊຶ່ງບໍ່ສັງກັດ
ພັກການເມືອງໃດ, ແຕ່ພວກພັກການເມືອງຕ່າງໆກໍາລັງ
ພະຍາຍາມຢ່າງໜັກເພື່ອດຶງດູດເອົາພວກຈົດທະບຽນເລືອກ
ຕັ້ງໃໝ່ນີ້.
ໃນເຂດ Orange County ລັດຄາລີຟໍເນຍ ສະມາຊິກ
ສະພາຕໍ່າສັງກັດພັກ Democrat ໃນປັດຈຸບັນ ກໍຄືທ່ານ
ນາງ Loretta Sanchez ຢາກລະດົມເອົາພວກປ່ອນ
ບັດເຊື້ອສາຍ Hispanic ເຫລົ່ານີ້ ໃນເວລາດຽວກັນ
ກໍເຂົ້າຫາພວກຜູ້ເລືອກຕັ້ງຊົນຊາດອື່ນໆ. ພວກຊາວ
Hispanic ສ່ວນຫລາຍໃນລັດຄາລີຟໍເນຍ ພາກັນລົງ
ທະບຽນສັງກັດພັກ Democrat ແລະທ່ານນາງ Sanchez ກໍເປັນລູກສາວຂອງອົບ
ພະຍົບມາຈາກປະເທດເມັກຊິໂກ. ພວກHispanic ແມ່ນເປັນພົນລະເມືອງກຸ່ມໃຫຍ່
ໃນເຂດເລືອກຕັ້ງຂອງທ່ານນາງ. ແຕ່ການສໍາຫລວດຫາງສຽງປະຊາຊົນ ແນະໃຫ້ຮູ້
ວ່າ ພວກHispanic ເຫລົ່ານີ້ຫລາຍຄົນ ຈະບໍ່ພາກັນອອກໄປປ່ອນບັດໃນວັນເລືອກ
ຕັ້ງ ຍ້ອນບໍ່ມີກໍາລັງໃຈນໍາສະພາວະເສດຖະກິດບໍ່ດີ ແລະ ຄວາມລົ້ມແຫລວຂອງລັດ
ຖະບານກຸງວໍຊິງຕັນ ໃນການແກ້ໄຂເລື້ອງການປະຕິຮູບກົດໝາຍຄົນເຂົ້າເມືອງນັ້ນ.
ທ່ານນາງ Sanchez ໄດ້ຮັບການສະນັບສະໜູນຊຸກຍູ້ໃນການໂຮມຊຸມນຸມຫວ່າງໄວໆມາ
ນີ້ ຈາກອະດີດປະທານາທິບໍດີບິລ ຄລິນຕັນ ທີ່ໄດ້ຕັ້ງຄໍາຖາມຂຶ້ນມາວ່າ ຜູ້ສະໝັກແຂ່ງຂັນ
ຄົນໃດດີທີ່ສຸດ ສໍາລັບເຂດເລືອກຕັ້ງລັດຖະສະພາເຂດທີ 47 ຂອງລັດຄາລີຟໍເນຍ ຊຶ່ງທ່ານ
ຄລິນຕັນກ່າວວ່າ ບໍ່ວ່າທ່ານຈະຖາມຜູ້ໃດ ກໍໄດ້ຮັບຄໍາຕອບອັນດຽວກັນໝົດ:
"ຄໍາຕອບທີ່ອອກມາ ກໍແມ່ນຄືກັນໝົດ ຄື Loretta Sanchez ໃນທຸກໆເທື່ອ.
ພວກທ່ານຈົ່ງໄປບອກທຸກໆຄົນໂລດ ແລ້ວລາວຈະມີຄືນ ການເລືອກຕັ້ງທີ່ຍິ່ງ
ໃຫຍ່. ຂໍຂອບໃຈ ແລະຂໍໃຫ້ພະເຈົ້າຈົ່ງໃຫ້ພອນແກ່ທຸກໆຄົນ."
ທ່ານນາງ Sanchez ເປັນສະມາຊິກສະພາຕໍ່າມາໄດ້ 7 ສະໄໝແລ້ວ ແຕ່ເວລານີ້ກໍາລັງ
ຕົກຢູ່ໃນສະພາບການແຂ່ງຂັນທີ່ສູສີກັນຫລາຍທີ່ສຸດກັບ ທ່ານ Van Tran ອົບພະຍົບ
ຫວຽດນາມ ຊຶ່ງໄດ້ຮັບຄວາມຊ່ອຍເຫລືອຈາກພວກສະມາຊິກພັກ Republican ທີ່ມີຊື່ສຽງ
ຮວມທັງອະດີດຜູ້ວ່າການລັດອາລາສກາ ແລະ ເຄີຍສະໝັກເປັນຮອງ ປະທານາທິບໍດີຄື
ທ່ານນາງ Sarah Palin ນັ້ນນໍາ.
ທ່ານ Tran ເກີດຢູ່ຫວຽດນາມແລະໄດ້ຮັບການສະໜັບສະໜຸນຢ່າງກວ້າງຂວາງ ຈາກປະຊາ
ຄົມຊາວອາເມຣິກັນເຊື້ອສາຍຫວຽດນາມແລະຈາກພວກສະມາຊິກພັກ Republican ອື່ນໆ.
ນາງ Vivian Le ນັກຮຽນມັດທະຍົມປາຍ ຫລືໄຮສະກູລ ໄດ້ອາສາສະໝັກໂຄສະນາຫາ
ສຽງໃຫ້ທ່ານ Tran. ນາງເວົ້າວ່າ:
"ເພາະຂ້ອຍຄິດວ່າລາວດີ. ລາວເປັນຄົນດີຫລາຍ. ແລະ ຂ້ອຍກໍຄິດວ່າ ທ່ານນາງ
Loretta Sanchez ທີ່ເປັນຜູ້ແທນມາໄດ້ 14 ປີແລ້ວນັ້ນ ຕ້ອງອອກໄປ. ອອກ
ໄປໄດ້ແລ້ວ ແລະທ່ານ Van Tran ຕ້ອງເຂົ້າມາແທນ. ພວກເຮົາຕ້ອງການໃຫ້
ມີການປ່ຽນແປງ."
ເຂດ Orange County ໄດ້ປະສົບກັບການປ່ຽນແປງໃນດ້ານປະຊາກອນ ໃນຫວ່າງບໍ່ເທົ່າ
ໃດທົດສະວັດຜ່ານມານີ້. ແຕ່ກ່ອນນັ້ນ ເຂດດັ່ງກ່າວແມ່ນເປັນຖິ່ນ ຂອງພວກຫົວນິຍົມແນວ
ທາງເດີມທີ່ສັງກັດພັກ Republican ແລະເປັນຄົນຜິວຂາວ ແຕ່ດຽວນີ້ ເຕັມໄປດ້ວຍພວກ
ອົບພະຍົບ ໂດຍສະເພາະຊາວຫວຽດນາມທີ່ຫລັ່ງໄຫລເຂົ້າໄປຢູ່ເປັນຈໍານວນຫລວງຫລາຍ
ແລະພາກັນຈັດຕັ້ງທຸລະກິດຮ້ານຄ້າຮ້ານຂາຍຂຶ້ນ ຈົນກາຍເປັນຄຸ້ມຫວຽດນາມ ທີ່ເອີ້ນກັນ
ວ່າ Little Saigon ຫລືເມືອງໄຊງ່ອນນ້ອຍນັ້ນ ແລະສູ່ມື້ນີ້ ໃນບາງຫົວເມືອງ ຮວມທັງຫົວ
ເມືອງໃຫຍ່ທີ່ສຸດ ຄື Santa Ana ນັ້ນ ປະຊາຊົນສ່ວນໃຫຍ່ແມ່ນເປັນຄົນມາຈາກເຂດອະ
ເມຣິກາລາຕິນ. ທ່ານ Tran ກ່າວວ່າ ທ່ານເຂົ້າໃຈທັງສອງກຸ່ມນີ້ດີ:
ໃນຖານະຄົນຕ່າງດ້າວລຸ່ນທໍາອິດທີ່ເຂົ້າມາຢູ່ປະເທດນີ້ ຂ້າພະເຈົ້າມີ ຫລາຍສິ່ງ
ຫລາຍຢ່າງ ຄືກັນກັບປະຊາຄົມລາຕິໂນ ຫລາຍກວ່າຄູ່ແຂ່ງ ຂອງຂ້າພະເຈົ້າ.
ຂ້າພະເຈົ້າເຂົ້າໃຈດີເຖິງຄວາມຫຍຸ້ງຍາກແລະສິ່ງທ້າທາຍຕ່າງໆ ຂອງການປັບ
ຕົວເຂົ້າກັບສັງຄົມ ຂອງຊ່ອງວ່າງທາງດ້ານວັດທະນະທໍາ ແລະພາສາ ແລະ ສິ່ງ
ທ້າທາຍທັງໝົດສໍາລັບພວກຄອບຄົວທີ່ແນ່ນອນວ່າ ຕ້ອງການຈະປັບຕົວ
ແລະ ປະກອບສ່ວນຕອບແທນຄືນ ແກ່ປະເທດໃໝ່ຂອງພວກເຂົາເຈົ້ານັ້ນ.
ສ່ວນທ່ານນາງ Sanchez ສັງກັດພັກ Democrat ນັ້ນກ່າວວ່າ ທ່ານນາງດຶງດູດເອົາຜູ້
ປ່ອນບັດເລືອກຕັ້ງ ກໍຍ້ອນປະວັດແລະຜົນງານຂອງທ່ານນາງຢູ່ໃນສະພາຕໍ່າ ຊຶ່ງທ່ານ
ນາງ Sanchez ກ່າວຕໍ່ໄປວ່າ:
"ພວກຄົນ ຫວຽດນາມ-ອາເມຣິກັນ ຢູ່ທີ່ນີ້ ກໍມີບັນຫາອັນດຽວກັນກັບປະຊາຄົມ
ອື່ນໆ. ພວກເຂົາເຈົ້າມີທຸລະກິດຂະໜາດນ້ອຍ, ແຕ່ບໍ່ມີປະກັນໄພສຸຂະພາບໃຫ້
ແກ່ພະນັກງານຂອງພວກເຂົາເຈົ້າ, ຄົນບໍ່ຄ່ອຍຈະຈັບຈ່າຍເງິນຫລາຍ ຫລາຍໆ
ກິດຈະການຕ້ອງໄດ້ປິດລົງ; ສະນັ້ນ ຂ້າພະເຈົ້າຈຶ່ງໄດ້ໄປໂອ້ລົມກັບພວກເຂົາເຈົ້າ
ກ່ຽວກັບຮ່າງກົດໝາຍ 16 ສະບັບ ທີ່ພວກເຮົາໄດ້ຮັບຜ່ານໄປແລ້ວ ທີ່ກ່ຽວຂ້ອງ
ກັບທຸລະກິດຂະໜາດນ້ອຍນັ້ນ"
ຊາຍຫວຽດນາມ 2 ຄົນທີ່ໄປຮ່ວມການໂຮມຊຸມນຸມສະໜັບສະໜູນທ່ານນາງ Sanchez
ກ່າວວ່າ ເຂົາເຈົ້າບໍ່ປ່ອນບັດໄປຕາມເຊື້ອສາຍຂອງເຂົາເຈົ້າ. ນາຍ Thiet Nguyen ຊຶ່ງ
ເປັນອົບພະຍົບຫວຽດນາມກ່າວວ່າ ລາວແລະເພື່ອນຂອງລາວ ພາກັນເບິ່ງທ່າທີແລະແນວ
ຄິດຂອງຜູ້ສະມັກ ກ່ຽວກັບບັນຫາຕ່າງໆ ຫລາຍກ່ວາເລື້ອງເຊື້ອຊາດ ຜິວພັນ ເພາະວ່າ
ພວກລາວເປັນຄົນອາເມຣິກັນແລ້ວ.
ນາຍ Thiet Nguyen ຍັງກ່າວຕື່ມວ່າ ລາວມີຄວາມປະທັບໃຈກັບວຽກງານທີ່ທ່ານ ນາງ
Sanchez ໄດ້ເຮັດມາສໍາລັບເຂດເລືອກຕັ້ງ ຂອງທ່ານນາງ ແລະການສະໜັບສະໜຸນສິດທິ
ມະນຸດໃນຫວຽດນາມນັ້ນ. ທັງສອງພັກຕ່າງເວົ້າວ່າ ໃນເວລາທີ່ຄວາມເປັນຫ່ວງຂອງຜູ້
ປ່ອນບັດເລືອກຕັ້ງ ມີຢູ່ໃນລະດັບສູງກ່ຽວກັບຫລາຍໆບັນຫານັ້ນ ເຂົາເຈົ້າຕ້ອງໄດ້ລະດົມ
ເອົາຜູ້ປ່ອນບັດເພື່ອໃຫ້ໄດ້ຮັບໄຊຊະນະ ແລະກໍ່ໃຫ້ເກີດ ຄວາມກະຕືລືລົ້ນຢ່າງເຕັມທີ່ ໃນ
ຊ່ວງເວລາທີ່ຍັງເຫລືອບໍ່ເທົ່າໃດມື້ ກ່ອນວັນເລືອກຕັ້ງ ໃນວັນທີ 2 ພະຈິກ ເດືອນໜ້ານີ້.
