ລິ້ງ ສຳຫລັບເຂົ້າຫາ

ພວກຜູ້ເຖົ້າ ເດັກນ້ອຍ ຖືກຍ້າຍ ອອກຈາກເມືອງ Homs (ສະໄລດ໌/ວີດີໂອ)


ພົນລະເຮືອນ ຖືເຄື່ອງຂອງໆພວກເຂົາເຈົ້າ ຂະນະທີ່ພາກັນ ຍ່າງໄປຫາຈຸດນັດພົບ ເພື່ອຍົກຍ້າຍອອກຈາກເມືອງ Homs ທີ່ຖືກທະຫານລັດຖະບານປິດລ້ອມ (7 ກຸມພາ 2014)
ອົງການສະຫະປະຊາຊາດ ກ່າວວ່າ ພົນລະເຮືອນຊີເຣຍ 83 ຄົນ
ຮວມທັງ ພວກຜູ້ເຖົ້າ ແລະເດັກນ້ອຍ ໄດ້ຖືກຍົກຍ້າຍ ອອກຈາກ ເຂດຄວບຄຸມຂອງພວກຕໍ່ຕ້ານລັດຖະບານ ໃນເມືອງ Homs ໃນ
ວັນສຸກວານນີ້.

ພວກເຈົ້າໜ້າທີ່ໃຫ້ຄວາມຊ່ອຍເຫຼືອ ໄດ້ຍົກຍ້າຍ ພວກຜູ້ເຖົ້າທັງ
ຊາຍແລະຍິງທີ່ມີຮ່າງກາຍຈອມຜອມໂດຍເອົາຜ້າຫົ່ມຕຸ້ມໃຫ້ເຂົາ
ເຈົ້າ ຊຶ່ງເປັນພາກສ່ວນນຶ່ງໃນການຢຸດຍິງທາງດ້ານມະນຸດສະທຳ ເພື່ອອຳນວຍໃຫ້ມີການຍົກຍ້າຍພົນລະເຮືອນອອກແລະສົ່ງການ
ຊ່ອຍເຫຼືອເຂົ້າໄປໃຫ້.

ການປິດລ້ອມເມືອງ Homs ເປັນເວລານຶ່ງປີໂດຍທະຫານລັດຖະບານຊີເຣຍ ໄດ້ເຮັດໃຫ້ມີ ການຂາດແຄນອາຫານການກິນຢ່າງຮ້າຍແຮງ. ຜູ້ປະສານງານບັນເທົາທຸກຂອງສະຫະປະ ຊາຊາດ ທ່ານນາງ Valerie Amos ກ່າວວ່າ ມີພົນລະເຮືອນທີ່ລົ້ມປ່ວຍແລະບາດເຈັບຈຳ ນວນຫຼວງຫຼາຍ ຍັງຕົກຄ້າງຢູ່ໃນເມືອງດັ່ງກ່າວນີ້. ທ່ານນາງໄດ້ຮຽກຮ້ອງໃຫ້ທຸກຝ່າຍ ອະນຸ ຍາດໃຫ້ເຈົ້າໜ້າທີ່ມະນຸດສະທຳເຂົ້າອອກເມືອງ Homs ແລະຫົວເມືອງທີ່ຖືກປິດລ້ອມອື່ນໆ ແບບບໍ່ມີການຈຳກັດ.



ຣັດເຊຍກ່າວວ່າ ລັດຖະບານຂອງປະທານາທິບໍດີ Bashar al-Assad ໄດ້ຕົກລົງ ກັບອົງ ການສະຫະປະຊາຊາດ ໃນມື້ວັນພະຫັດຜ່ານມາ ໃຫ້ມີການຢຸດຍິງເປັນເວລາ 3 ມື້ ເພື່ອອະ ນຸຍາດໃຫ້ສົ່ງການຊ່ອຍເຫຼືອເຂົ້າໄປໃນເມືອງ Homs.

ນອກນັ້ນແລ້ວໃນວັນສຸກວານນີ້ທ່ານ Faisal Makdad ຮອງລັດຖະມົນຕີການຕ່າງປະເທດ ຊີເຣຍກ່າວວ່າ ກຸງດາມັສກັສຈະເຂົ້າຮ່ວມການເຈລະຈາສັນຕິພາບຮອບໜ້າກັບພວກຕໍ່ຕ້ານ ຊຶ່ງກຳນົດຈະເລີ້ມຂຶ້ນໃນວັນຈັນທີ 10 ກຸມພານີ້.

ການເຈລະຈາສັນຕິພາບຊຶ່ງຈັດແຈງໂດຍສະຫະລັດແລະຣັດເຊຍ ມາຮອດປັດຈຸບັນນີ້ຍັງບໍ່ ມີຄວາມກ້າວໜ້າຫຍັງຫລາຍ ເພື່ອຍຸດຕິສົງຄາມກາງເມືອງ ຢູ່ໃນຊີເຣຍ. ມີຫຼາຍກວ່າ 130 ພັນຄົນໄດ້ຖືກຂ້າຕາຍ ແລະ 9 ລ້ານຄົນ ໄດ້ຖືກບັງຄັບໃຫ້ຫລົບໜີໄປຈາກເຮືອນຊານບ້ານ ຊ່ອງຂອງພວກເຂົາເຈົ້ານັບ ແຕ່ບັນຫາຂັດແຍ້ງເລີ້ມຂຶ້ນ ໃນປີ 2011.

XS
SM
MD
LG