ພະນັກງານກູ້ໄພຂອງ ອີຈິບ ໃນວັນອັງຄານວານນີ້ໄດ້ດຶງເອົາສົບຂອງຜູ້ຍົກຍ້າຍຖິ່ນຖານ ຫຼາຍກວ່າສິບຄົນ ອອກຈາກຫ້ອງບັນຈຸສິນຄ້າຂອງເຮືອຫາປາລຳໜຶ່ງໃກ້ຊາຍຝັ່ງທະເລ ເມດິເທີເຣນຽນ, ເຮັດໃຫ້ຈຳນວນຜູ້ເສຍຊີວິດຈາກໄພພິບັດເມື່ອວັນທີ 21 ກັນຍາເພີ່ມຂຶ້ນເປັນຫຼາຍກວ່າ 200 ຄົນ.
ພວກຜູ້ລອດຊີວິດໄດ້ກ່າວວ່າ ເຮືອຫາປາທີ່ບັນຈຸພວກຍົກຍ້າຍຖິ່ນຖານ ແໜ້ນເຕັມອັດຕາ ລະຫວ່າງ 450 ຫາ 600 ຄົນລວມທັງແມ່ຍິງ ແລະ ເດັກນ້ອຍຫຼາຍຄົນ ເວລາທີ່ເຮືອລຳດັ່ງ ກ່າວໄດ້ຫລົ້ມ ໃນຕອນເຊົ້າມືດກ່ອນຟ້າແຈ້ງຢູ່ນອກເມືອງທ່າ Rosetta ໃນຂະນະທີ່ເຮືອ ລຳນີ້ມຸ່ງໜ້າໄປທະວີບ ຢູໂຣບ.
ບັນດາເຈົ້າໜ້າທີ່ທະຫານກ່າວວ່າ ຜູ້ເຄາະຮ້າຍສ່ວນໃຫຍ່ ມາຮອດດຽວນີ້ ແມ່ນຖືກລະບຸ ວ່າເປັນຊາວ ອີຈິບ ຈາກບໍລິເວນສາມຫຼ່ຽມແມ່ນ້ຳ Nile, ຫຼາຍຄົນໃນນັ້ນແມ່ນພວກໄວລຸ້ນ ທີ່ຊອກຫາຊີວິດການເປັນຢູ່ທີ່ດີກວ່າໃນ ຢູໂຣບ. ແຕ່ລາຍງານຂ່າວໃນທ້ອງຖິ່ນຍັງກ່າວວ່າ ມີຊາວ ອາຟຣິກາ ຈາກຫຼາຍປະເທດ ແລະ ຊາວ ຊີເຣຍ ຈຳນວນໜຶ່ງກໍຮວມຢູ່ໃນພວກຜູ້ທີ່ເດີນທາງໄປນຳເຮືອລຳນີ້.
ຕຳຫຼວດທ້ອງຖິ່ນໃນວັນຈັນທີ່ຜ່ານມາ ໄດ້ຄວບຄຸມຕົວເຈົ້າຂອງເຮືອລຳດັ່ງກ່າວ, ອີງຕາມ ລາຍງານໃນທ້ອງຖິ່ນ ລາວອາດປະເຊີນໜ້າກັບຂໍ້ຫາ ຄ້າມະນຸດ ແລະ ຂ້າຄົນໂດຍບໍ່ເຈ ຕະນາ.
ອົງການສາກົນເພື່ອການຍົກຍ້າຍຖິ່ນຖານ ຫຼື IOM ກ່າວວ່າ ຜູ້ຍົກ ຍ້າຍຖິ່ນຖານ 3,500 ຄົນໄດ້ເສຍຊີວິດ ຫຼື ຫາຍສາບສູນໃນປີນີ້ ໃນຂະນະທີ່ພະຍາຍາມເດີນທາງຂ້າມທະເລ ເມດິເທີເຣນຽນ. ອົງການ IOM ໄດ້ກ່າວວ່າ ຕົວເລກດັ່ງກ່າວໄດ້ເພີ່ມຂຶ້ນເກືອບ 600 ຄົນ ຈາກໄລຍະເວລາດຽວກັນໃນປີທີ່ຜ່ານມາ.
