ຈີນໄດ້ສະແດງປະຕິກິລິຍາແບບລະມັດລະວັງຕໍ່ຂ່າວກ່ຽວ
ກັບການລາອອກຂອງປະທານາທິບໍດີອີຈິບທ່ານ Hosni
Mubarak ດ້ວຍການຮຽກຮ້ອງໃຫ້ມີສະຖຽນລະພາບໃນ
ອີຈິບ.
ພັກຄອມມູນິສຈີນ ຊຶ່ງເປັນພັກລັດຖະບານທີ່ປົກຄອງປະ
ເທດໃນປັດຈຸບັນ ໄດ້ອອກຖະແຫຼງການດັ່ງກ່າວ ໃນວັນ
ເສົາມື້ນີ້ ແລະກ່າວຕື່ມວ່າ ມະຫາອຳນາດຕ່າງປະເທດບໍ່
ຄວນເຂົ້າໄປຍຸ່ງກ່ຽວໃນການເມືອງຂອງອີຈິບ.
ສື່ມວນຊົນພາຍໃນປະເທດຂອງຈີນໄດ້ລາຍງານຂ່າວກ່ຽວກັບການລາອອກແຕ່ບໍ່ໄດ້ໃຫ້ຄວາມ
ສຳຄັນ ຕໍ່ການໂຮມຊຸມນຸມປະທ້ວງຂະໜາດໃຫຍ່ ທີ່ມີຂຶ້ນກ່ອນໜ້ານັ້ນ. ພວກນັກຊ່ຽວຊານ
ກ່າວວ່າ ຈີນອາດມີຄວາມລະມັດລະວັງຢ້ານວ່າເຫດການໃນອີຈິບສາມາດກໍ່ໃຫ້ເກີດການປະ
ທ້ວງທີ່ຄ້າຍຄືກັນ ເພື່ອຕໍ່ຕ້ານລັດຖະບານຈີນ. ເວັບໄຊຕ່າງໆຂອງຈີນໄດ້ຈຳກັດການສະແດງ
ຄວາມຄິດຄວາມເຫັນຂອງປະຊາຊົນກ່ຽວກັບຄວາມວຸ້ນວາຍໃນອີຈິບ.
ໃນວັນເສົາມື້ນີ້ ນາຍົກລັດຖະມົນຕີອອສເຕຣເລຍທ່ານນາງ Julia Gillard ໄດ້ຮຽກຮ້ອງໃຫ້
ອີຈິບ ກຳນົດວັນເວລາທີ່ແນ່ນອນ ກ່ຽວກັບການເລືອກຕັ້ງທີ່ເສລີແລະຍຸດຕິທຳ.
ສ່ວນນາຍົກລັດຖະມົນຕີຍີ່ປຸ່ນທ່ານ Naoto Kan ກ່າວວ່າ ຍີ່ປຸ່ນຫວັງວ່າອີຈິບຈະມີບົດບາດ
ໃນທາງສ້າງສັນຢູ່ໃນພາກຕາເວັນອອກກາງ ຫຼາຍກວ່າໃນອະດີດຜ່ານມາ.
ໂຄສົກຂອງກະຊວງການຕ່າງປະເທດເກົາຫຼີໃຕ້ກ່າວວ່າ ເກົາຫຼີໃຕ້ເຄົາລົບການຕັດສິນໃຈໃນ
ການລາອອກຂອງທ່ານ Mubarak ແລະໃຫ້ຄຳໝັ້ນສັນຍາວ່າ ລັດຖະບານເກົາຫຼີໃຕ້ຈະດຳ
ເນີນງານຢ່າງໃກ້ຊິດກັບລັດຖະບານຊຸດໃໝ່ຂອງອີຈິບ.
