ເກີດການປະທະກັນຢ່າງຮຸນແຮງໃນອີຈິບເປັນມື້ທີ່ສາມ ຂະນະທີ່ຫລາຍພັນຄົນພາກັນ
ເດີນປະທ້ວງໃນການບໍ່ເອົາໃຈໃສ່ຂອງເຈົ້າໜ້າທີ່ ລະຫວ່າງທີ່ມີການຍົກພວກຕີກັນ
ໃນຂະນະທີ່ມີການແຂ່ງຂັນເຕະບານໃນຕົ້ນອາທິດນີ້.
ເຈົ້າໜ້າທີ່ຕໍາຫລວດໃນນະຄອນຫຼວງໄຄໂຣ ໄດ້ຍິງລະເບີດນໍ້າຕາແລະຍິງປືນລົມໃສ່
ພວກປະທ້ວງທີ່ພາກັນຮ້ອງໂຮ ແລະແກ່ວງກ້ອນຫີນຢູ່ໃກ້ກັບຕຶກກະຊວງພາຍໃນທີ່
ມີການຍາມຮັກສາການຢ່າງແໜ້ນໜາ. ຢູ່ກົງກັນຂ້າມໄປນັ້ນແມ່ນກະຊວງພາສີອາກອນ
ທີ່ຖືກໄປໄໝ້. ບັນດາລົດໂຮງໝໍ ແລະພວກອາສາສະມັກພາກັນຫາມຄົນບາດເຈັບແລ່ນ
ຜ່ານຖະນົນທີ່ເຕັມໄປດ້ວຍກ້ອນຫີນແລະຊາກຫັກພັງ.
ລາຍງານກ່າວວ່າຢ່າງໜ້ອຍຫົກຄົນໄດ້ເສຍຊີວິດຈາກຄວາມຮຸນແຮງ ນັບຕັ້ງແຕ່ມັນໄດ້
ເລີ້ມຂື້ນຢູ່ທີ່ນະຄອນໄຄໂຣ ຈາກການປະທະກັນໃນສະໜາມເຕະບານທີ່ເມືອງ
Port Said ທີ່ເຮັດໃຫ້ມີຜູ້ເສຍຊີວິດເຖິງ 74 ຄົນ. ພວກປະທ້ວງໄດ້ກ່າວຫາກໍາລັງຮັກ
ສາຄວາມສະຫງົບວ່າບໍ່ພາກັນປະຕິບັດໜ້າທີ່ເທົ່າທີ່ຄວນ ເພື່ອຢຸດຢັ້ງການປະທະກັນ
ແລະຮຽກຮ້ອງໃຫ້ສະພາທະຫານທີ່ປົກຄອງປະເທດຢູ່ໃນເວລານີ້ມອບອໍານາດການປົກ
ຄອງໃຫ້ແກ່ລັດຖະບານພົນລະເຮືອນ.
ໃນວັນສຸກວານນີ້ມີສຽງປືນ ລະເບີດນໍ້າຕາ ແລະສຽງການແກວ່ງກ້ອນຫີນເຂົ້າໃສ່ເຄື່ອງ
ກໍາບັງຂອງຕໍາຫລວດຢູ່ໃນແລະບໍລິເວນອ້ອມແອ້ມຈະ ຕຸລັດ Tahrir ຫລັງຈາກທີ່ໄດ້ມີ
ການສວດມົນພະວະນາໃນຕອນແລງ. ທ່ານໝໍຄົນນື່ງທີ່ປິ່ນປົວຜູ້ໄດ້ຮັບບາດເຈັບກ່າວຕໍ່
ອົງການຂ່າວເອພີີວ່າ ໂຮງໝໍສະໜາມຂອງລາວ ໄດ້ເຕັມໄປດ້ວຍຜູ້ທີ່ໄດ້ຮັບບາດເຈັບ.
ຊາວອີຈິບອີກຫຼາຍໆພັນຄົນຍັງໄດ້ພາກັນປະທ້ວງຢູ່ເຕັມຖະນົນຫົນທາງໃນເມືອງ
ອາເລັກຊານເດຣຍ.
ກະຊວງສາທາລະນະສຸກກ່າວວ່າເກືອບສີ່ຮ້ອຍຄົນໄດ້ຮັບບາດເຈັບໃນການປະທະກັນ
ກັບເຈົ້າໜ້າທີ່ຕໍາຫລວດໃນໄລຍະສອງສາມມື້ຜ່ານມານີ້ ສ່ວນໃຫຍ່ແມ່ນຫາຍໃຈເອົາ
ຄວັນລະເບີດນໍ້າຕາ.
ເຈົ້າໜ້າທີ່ຕໍາຫລວດໄດ້ຈັບກຸມຜູ້ຕ້ອງສົງໄສ 47 ຄົນ ຈາກການປະທະກັນທີ່ເດີ່ນເຕະ
ບານ. ຈອມພົນ Mohammed Tantawi ຈາກສະພາປົກຄອງທະຫານ ໄດ້ປະກາດໃຫ້
ມີການໄວ້ອາໄລເປັນເວລາສາມມື້ ໃນທົ່ວປະເທດ ແລະຈະຊອກຫາໂຕພວກທີ່ກະທໍາຜິດ.
