ລິ້ງ ສຳຫລັບເຂົ້າຫາ

ຕໍາຫຼວດ​ອີ​ຈິບ ປະ​ທະ​ກັບ​ ກຸ່ມຜູ້​ຊາຍ​ ທີ່​ປະກອບ​ອາວຸດ​​ ໃນ​ແຫຼມ Sinai

  • ວັນນະສອນ​ ແກ້ວດາຣາ

ທະຫານອີຈິບ ໃກ້ໆກັບຊາຍແດນ ລະຫວ່າງ ອີຈິບ ແລະເຂດ ກາຊາ

ຕໍາຫຼວດ​ຂອງອີ​ຈິບ ​ໄດ້​ປະ​ທະ​ກັບ​ພວກ​ຜູ້​ຊາຍ​ທີ່​ປະກອບ​ອາວຸດ​ກຸ່ມ​ນຶ່ງ ​ໃນ​ແຫຼມ Sinai ນຶ່ງ​ມື້ຫຼັງຈາກ​ໄດ້​ມີ​ການໂຈມ​ຕີທາງ​ອາກາດ ທີ່ເປັນ​ເຫດໃຫ້​ພວກ​ທີ່​ສົງ​ໄສ​ເປັນ​ກຸ່ມຫົວ​ຮຸນແຮງ 20 ຄົນເສັຍ​ຊີວິດ ​ໃນເຂດ​ດັ່ງກ່າວ.

​ໂທລະພາບ​ຂອງທາງ​ການ​ອີ​ຈິບ​ແຈ້ງ​ວ່າ ການ​ສູ້​ລົບ​ກັນໄດ້​ເລີ່​ມຂຶ້ນອີກ ​ໃນ​ວັນ​ພະຫັດ​ມື້​ນີ້ ຢູ່​ນອກ​ຂອງ​ປ້ອມຕໍາຫຼວດ​ແຫ່ງ​ນຶ່ງ ​ໃນ​ເມືອງ El-Arish ປະມານ 50 ກິ​ໂລ​ແມັດ ຫ່າງ​ຈາກຊາຍ​ແດນ Isreal ​ແລະ​ເຂດ Gaza.

​ໃນ​ເວລາ​ນີ້ ຍັງ​ບໍ່​ທັນ​ມີ​ລາຍ​ງານ​ກ່ຽວ​ກັບຈໍ​ານວນ​ຜູ້​ບາດ​ເຈັບ​ລົ້ມຕາຍເທື່ອ.

ປະທານາທິບໍດີ ອີ​ຈິບ ທ່ານ Mohamed Morsi ​ໄດ້​ປົດຫົວໜ້າສືບ​ລັບຂອງ​ທ່ານ ​ແລະ​ເຈົ້າ​ແຂວງ​ໆ​ Sinai ເໜືອ ອອກຈາກ​ໜ້າ​ທີ່ ​ໃນ​ວັນ​ພຸດ​ວານ​ນີ້ ໃນ​ການ​ຊັບຊ້ອນ​ຕຳ​ແໜ່​ງທີ່​ສຳຄັນ​ຄັ້ງ​ໃໝ່. ກອງ​ທັບ​ອີ​ຈິບ​ກ່າ​ວວ່າ ຕົນ​ໄດ້​ອອກ​ປະຕິບັດ​ງານ​ໃນ​ວັນ​ພຸດ​ວານ​ນີ້ ​ເພື່ອຟື້ນຟູຄວາມ​ສະ​ຫງົບ ​ແລະ​ຢຶດຄືນ ​ເຂດ​ທີ່​ເກີດ​ຄວາມ​ວຸ້ນວາຍ​ລຸນ​ຫຼັງ ທີ່​ ​ການໂຄ່ນ​ລົ້ມ​ອະດີດປະທານາທິບໍດີ Hosni Mubarak ລົງ​ຈາກ​ຕຳ​ແໜ່​ງ.

ກຸ່ມ​ຫົວຮຸນ​ແຮງ​ໄດ້​ທໍາ​ການ​ໂຈມຕີຢ່າງນອງ​ເລືອດ​ຕໍ່ກອງ​ກໍາ​ລັງ​ທະຫານອີ​ຈິບໃນ​ວັນ​ອາທິດ​ແລ້ວ​ນີ້ ​ໂດຍ​ໄດ້​ສັງຫານກຳລັງ​ຮັກສາຊາຍ​ແດນອີ​ຈິບ 16 ຄົນ.

XS
SM
MD
LG