ພວກນາຍທະຫານທີ່ປົກຄອງອີຈິບ ກ່າວໃນວັນອາທິດມື້ນີ້ ວ່າ ພວກເຂົາເຈົ້າມີແຜນການຈະດໍາເນີນຄະດີພວກທີ່ຖືກ ກັກ 190 ຄົນ ທີ່ມີສ່ວນພົວພັນ ກັບເຫດການກໍ່ຄວາມ ຮຸນແຮງລະຫວ່າງກຸ່ມສາສະໜາ ທີ່ຍັງຜົນໃຫ້ ມີຜູ້ເສຍຊີວິດ 10 ຄົນ ໃນເຂດຊານເມືອງແຫ່ງນຶ່ງຂອງນະຄອນຫລວງ ໄຄໂຣຂອງອີຈິບນັ້ນ.
ຄໍາປະກາດດັ່ງກ່າວທີ່ເວົ້າວ່າ ພວກທີ່ຖືກຈັບກຸມທັງຫລາຍ ຈະຖືກດໍາເນີນ ຄະດີໃນສານທະຫານນັ້ນ ແມ່ນມີຂຶ້ນຫລັງ ຈາກກອງປະຊຸມສຸກເສີນຂອງຄະ ນະລັດຖະມົນຕີໃນຕອນ ເຊົ້າວັນອາທິດມື້ນີ້ ເພື່ອປຶກສາຫາລືກ່ຽວກັບເຫດການທີ່ ເກີດຂຶ້ນໃນຕອນກາງເວັນ ແລະ ກາງຄືນຂອງມື້ວານນັ້ນ.
ນາຍົກລັດຖະມົນຕີອີຈິບ ທ່ານ Essam Sharaf ໄດ້ລົບລ້າງການໄປຢ້ຽມຢາມພວກ ປະເທດເຂດອ່າວ ແລະຮຽກປະຊຸມຄະນະລັດຖະມົນຕີດ່ວນ ເພື່ອຮັບມືກັບເຫດການ ປະທະກັນລະຫວ່າງຊາວຄຣີສຕຽນ ແລະຊາວມູສລິມ ເມື່ອວັນເສົາວານນີ້ ທີ່ໜັງສືພິມແຫ່ງລັດຂອງອີຈິບ MENA ລາຍງານວ່າ ນອກຈາກມີຜູ້ເສຍຊີວິດ 10 ຄົນແລ້ວຍັງມີຜູ້ ໄດ້ຮັບບາດເຈັບອີກ 186 ຄົນ.
ພວກເຫັນເຫດການກ່າວວ່າ ພວກຊາວມູສລິມ ໄດ້ລວມກັນຢູ່ທີ່ໂບດ Coptic ໃນການ ຕອບໂຕ້ຕໍ່ຂ່າວລືທີ່ວ່າ ແມ່ຍິງຊາວຄຣີສຕຽນຄົນນຶ່ງໄດ້ຖືກ ກັກຕົວໄວ້ຢູ່ທີ່ໂບດແຫ່ງນັ້ນ ເພື່ອປ້ອງກັນບໍ່ໃຫ້ຜູ້ກ່ຽວປ່ຽນມານັບຖືສາສະ ໜາອີສລາມ. ຂ່າວລາຍງານອື່ນໆເວົ້າວ່າ ພວກປະທ້ວງເຊື່ອວ່າ ແມ່ຍິງຄຣີສຕຽນຄົນດັ່ງກ່າວນັ້ນໄດ້ປ່ຽນເປັນມຸສລິມໄປແລ້ວ ແຕ່ ກໍຖືກຂັດຂວາງບໍ່ໃຫ້ແຕ່ງງານກັບຊາຍຊາວມູສລິມ.
ລາຍງານເວົ້າວ່າ ພວກປະທ້ວງໄດ້ເລີ່ມຂວ່າງລະເບີດໄຟ ແລະກ້ອນຫິນ ສົ່ງຜົນໃຫ້ຕຶກ ບາງແຫ່ງທີ່ຢູ່ໃກ້ຄຽງນັ້ນ ລຸກໄໝ້ເປັນໄຟ. ພວກກໍາລັງຮັກສາຄວາມປອດໄພ ທີ່ຖືກສົ່ງໄປຍັງ ບ່ອນເກີດເຫດໄດ້ຍິງປືນຂຶ້ນຟ້າ ແລະໃຊ້ລະເບີດ ນໍ້າຕາເພື່ອແຍກສອງກຸ່ມອອກຈາກກັນ
ຄວາມສໍາພັນຂອງການນັບສືສາສະໜາທີ່ແຕກຕ່າງກັນນັ້ນແມ່ນເປັນຕົ້ນຕໍ ຂອງການເກີດ ຄວາມເຄັ່ງຕຶງໃນນະຄອນຫລວງໄຄໂຣ ບ່ອນທີ່ຊາວຄຣີສຕຽນປະກອບເປັນ 10 ເປີເຊັນ ຂອງປະຊາຊົນ 80 ລ້ານຄົນຂອງອີຈິບນັ້ນ.
