ນາຍົກລັດຖະມົນຕີອີຈິບ ທ່ານ Sharif Ismail ໄດ້ໃຫ້ການຢືນ
ຢັນ ກ່ຽວກັບ ອຸບັດຕິເຫດ ເຮືອບິນໂດຍສານຣັດເຊຍຕົກ ພ້ອມ
ດ້ວຍຜູ້ໂດຍສານ ແລະພະນັກງານ 224 ຄົນ ທີ່ເດີນທາງໄປນຳ
ເຮືອບິນລຳນີ້ ບໍ່ຮອດເຄິ່ງຊົ່ວໂມງ ລຸນຫຼັງທີ່ເຮືອບິນລຳນີ້ບິນຂຶ້ນ
ຈາກເມືອງຕາກອາກາດ Sharm El-Sheikh ຂອງອີຈິບ.
ເຈົ້າໜ້າທີ່ອີຈິບກ່າວວ່າ ຖ້ຽວບິນ 9268 ຂອງສາຍການບິນ Ko-
galymavia ທີ່ເປັນເຮືອບິນ ແອບັສ ເອ-321 ຊຶ່ງເປັນຖ້ຽວບິນ
ຮັບເໝົາ ທີ່ບັນທຸກຜູ້ໂດຍສານ 217 ຄົນ ຮວມທັງເດັກນ້ອຍ 17
ຄົນພ້ອມທັງພະນັກງານປະຈຳເຮືອບິນອີກ 7 ຄົນ. ຍັງບໍ່ທັນເປັນ
ທີ່ຈະແຈ້ງເທື່ອວ່າ ມີຜູ້ລອດຊີວິດມາໄດ້ຫລືບໍ່.
ທຳນຽບຂອງນາຍົກລັດຖະມົນຕີກ່າວວ່າ ທ່ານມີແຜນທີ່ຈະຈັດກອງປະຊຸມສຸກເສີນຄະນະ
ລັດຖະບານ ແລະເຈົ້າໜ້າທີ່ຮັກສາຄວາມປອດໄພ ໃນຂະນະທີ່ກະຊວງການຕ່າງປະເທດ
ຣັດເຊຍ ກ່າວຜ່ານທາງເຟສບຸກ ຂອງຕົນວ່າ ຕົນກຳລັງຕິດຕາມເບິ່ງສະຖານະການ ຢ່າງ
ໃກ້ຊິດ.
ເຮືອບິນໂດຍສານລຳນີ້ ພວມເດີນທາງໄປຍັງນຍະຄອນ St. Petersburg ຂອງຣັດເຊຍ. ເຮືອບິນລຳນີ້ໄດ້ບິນຂຶ້ນຈາກສະໜາມບິນໃນເວລາ 5 ໂມງ 51 ນາທີໃນຕອນເຊົ້າວັນເສົາ
ມື້ນີ້ ຕາມເວລາທ້ອງຖິ່ນແລະມີລາຍງານວ່າໄດ້ສູນເສຍການຕິດຕໍ່ກັບຫໍຄວບຄຸມການບິນ
ບໍ່ຮອດເຄິ່ງຊົ່ວໂມງຕໍ່ມາ. ລາຍງານທີ່ຍັງບໍ່ທັນໄດ້ຮັບການຢືນຢັນບາງກະແສແຈ້ງວ່າ ນັກ
ບິນໄດ້ວິທະຍຸແຈ້ງໃຫ້ຊາບວ່າ ໄດ້ເກີດ ຄວາມວຸ້ນວາຍບາງຢ່າງຂຶ້ນຢູ່ໃນເຮືອບິນ.
ສາເຫດທີ່ພາໃຫ້ເຮືອບິນຕົກຍັງບໍ່ທັນຮູ້ຈັກເທື່ອແຕ່ເຈົ້າໜ້າທີ່ກ່າວວ່າ ມັນບໍ່ໄດ້ຖືກຍິງຕົກ.
ໜັງສືພິມ All-Ahram ຂອງທາງການອີຈິບ ລາຍງານວ່າ ມີລົດໂຮງໝໍ ຢ່າງນ້ອຍ 15 ຄັນ
ກຳລັງມຸ່ງໜ້າໄປຍັງເມືອງ Al-Hassana ໃນເຂດທະເລຊາຍໄຊນາຍ ແລະໄດ້ມີການປະ
ກາດພາວະສຸກເສີນຢູ່ທີ່ນັ້ນ.
