ນາຍົກລັດຖະມົນຕີເທີກີ ໄດ້ຮຽກຮ້ອງໄປຍັງປະທານາທິບໍດີອີຈິບ ທ່ານ Hosni Mubarak ໃຫ້ຮັບຟັງຄໍາຮຽກຮ້ອງຂອງປະຊາຊົນຂອງທ່ານ ໃນຂະນະທີ່ພວກເຂົາເຈົ້າສືບຕໍ່ທໍາການປະທ້ວງ ແລະຮຽກຮ້ອງໃຫ້ມີການປ່ຽນແປງນັ້ນ.
ນາຍົກລັດຖະມົນຕີ Recep Taayyip Erdogan ໄດ້ຮຽກຮ້ອງໃຫ້ທ່ານ Mubarak ຮັບຟັງຄໍາຮຽກຮ້ອງທີ່ມີມະນຸດສະທໍາຂອງປະຊາຊົນອີຈິບນັ້ນໃນຄໍາປາໄສຕໍ່ສະພາແຫ່ງຊາດເທີກີ ໃນມື້ນີ້.
ຂະນະດຽວກັນ ສະຫະລັດບໍ່ຖືສໍາຄັນ ການເຄື່ອນໄຫວຂອງທ່ານ Mubarak ທີ່ສະເໜີແຕ່ງຕັ້ງຄະນະລັດຖະບານໃໝ່ ທ່າມກາງການປະທ້ວງຕໍ່ຕ້ານທ່ານ ທີ່ພວມດໍາເນີນໄປຢູ່ນັ້ນ ໂດຍກ່າວວ່າ ສະຖານະການແມ່ນຮຽກຮ້ອງໃຫ້ດໍາເນີນການ ບໍ່ແມ່ນໃຫ້ສະເໜີແຕ່ງຕັ້ງຄະນະລັດຖະບານໃໝ່.
ທ່ານ Robert Gibbs ໂຄສົກປະຈໍາທໍານຽບຂ່າວ ກ່າວໃນວັນຈັນວານນີ້ວ່າ ສະຫະລັດຮຽກຮ້ອງໃຫ້ມີການປ່ຽນແປງໃນວິທີການປະຕິບັດງານຂອງປະເທດ ແຕ່ບໍ່ໄດ້ເຖິງຂັ້ນເວົ້າວ່າ ທ່ານ Mubarak ຄວນລາອອກຈາກຕໍາແໜ່ງ.
ຖ້ອຍຖະແຫລງຂອງທ່ານ Gibbs ມີຂຶ້ນໃນຂະນະທີ່ກຸງວໍຊິງຕັນສົ່ງ ທ່ານ Frank Wisner ອະດີດເອກອັກຄະລັດຖະທູດສະຫະລັດປະຈໍາກຸງໄຄໂຣ ໄປກົດດັນໃຫ້ພວກເຈົ້າໜ້າທີ່ອີຈິບທໍາການປະຕິຮູບໄປສູ່ປະຊາທິປະໄຕ.
ບັນດາເຈົ້າໜ້າທີ່ປະຈໍາທໍານຽບຂາວກ່າວວ່າ ສະຫະລັດກໍາລັງຊຸກຍູ້ໃຫ້ທ່ານ Mubarak ດໍາເນີນການເພື່ອສະໜອງຕອບຄໍາຮຽກຮ້ອງຕ່າງໆຂອງພວກປະທ້ວງ ໂດຍໃຫ້ຍົກເລີກກົດໝາຍພາວະສຸກເສີນ ອະນຸຍາດໃຫ້ພວກອົງການຈັດຕັ້ງຕ່າງໆທີ່ບໍ່ມີສ່ວນພົວພັນກັບລັດຖະບານ ດໍາເນີນງານໄດ້ ແລະໃຫ້ປ່ອຍພວກນັກໂທດການເມືອງທັງໝົດ.
