ຮອງປະທານາທິບໍດີຂອງອີຈິບກ່າວວ່າ ລັດຖະບານຈະບໍ່ໂຍະຍານໃຫ້ມີການປະທ້ວງຕໍ່ຕ້ານລັດຖະບານ ຍືດເຍື້ອອອກໄປອີກ ທີ່ຈະຕຸລັດໃຫຍ່ ໃນໃຈກາງກຸງໄຄໂຣ ບ່ອນທີ່ພວກປະທ້ວງຫລາຍແສນຄົນພາກັນໄປໂຮມຊຸມນຸມກັນໃນວັນອັງຄານວານນີ້ ໃນຄວາມພະຍາຍາມຄັ້ງຫລ້າສຸດເພື່ອບັງຄັບໃຫ້ປະທານາທິບໍດີ Hosni Mubarak ທີ່ໄດ້ຄອງອໍານາດມາເປັນ ເວລາດົນນານ ລາອອກຈາກຕໍາແໜ່ງນັ້ນ.
ອົງການຂ່າວ MENa ຂອງທາງການອີຈິບ ອ້າງຄໍາເວົ້າຂອງຮອງປະ ທານາທິບໍດີ Omar Suleiman ທີ່ກ່າວວ່າ ວິກິດການທີ່ເກີດຂຶ້ນມາຍ້ອນການປະທ້ວງຕໍ່ຕ້ານທ່ານມູບາຣັກ ມາເປັນເວລາ 16 ມື້ ທີ່ຈະຕຸລັດ Tahrir ນັ້ນ ຈະຕ້ອງຍຸດຕິລົງໃນເວລາໄວທີ່ສຸດເທົ່າທີ່ເປັນໄປໄດ້. ທ່ານ Suleiman ກ່າວເຊ່ນນີ້ໃນການປາໄສຕໍ່ພວກບັນນາທິການໜັງສືພີມກຸ່ມນຶ່ງຂອງອີຈິບ ໃນຕອນແລງວັນອັງຄານວານນີ້.
ແຕ່ມີການອ້າງຄໍາເວົ້າຂອງທ່ານ Suleiman ວ່າ ລັດຖະບານບໍ່ຢາກທໍາການຕໍ່ລອງໃດໆກັບສັງຄົມອີຈິບ ໂດຍໃຊ້ເຄື່ອງມືຕໍາຫລວດ ແລະຢາກໃຊ້ການໂອ້ລົມສົນທະນາກັນ ເພື່ອພະຍາຍາມແກ້ໄຂບັນຫາຄໍາຮຽກຮ້ອງຕ່າງໆຂອງພວກປະທ້ວງນັ້ນຫລາຍກ່ວາ.
ປະຊາຊົນຫລາຍແສນຄົນພາກັນໂຮມຊຸມນຸມ ທີ່ຈະຕຸລັດ Tahrir ໃນວັນອັງຄານມວານນີ້ ອັນເປັນນຶ່ງຂອງການປະທ້ວງຄັ້ງໃຫຍ່ທີ່ສຸດໃນຮອບ 2 ສັບປະດາຜ່ານມາ ເພື່ອພະຍາຍາມ ບີບບັງຄັບໃຫ້ທ່ານມູບາຣັກ ທີ່ໄດ້ຄອງອໍານາດມາເກືອບ 30 ປີ ລາອອກຈາກຕໍາແໜ່ງ. ຫລາຍພັນຄົນຍັງໂຮມຊຸມນຸມກັນທີ່ຈະຕຸລັດໃນວັນພຸດມື້ນີ້ ຫລັງຈາກພາກັນຄ້າງຄືນຢູ່ໃນຕູບຜ້າໃບທີ່ຕັ້ງຂຶ້ນນັ້ນ.
ພວກນັກເຄື່ອນໄຫວອື່ນໆອີກພາກັນທໍາການປະທ້ວງ ເປັນມື້ທີສອງຢູ່ ນອກ ຕຶກສະພາຂອງອີຈິບ ຊຶ່ງຕັ້ງຢູ່ຫ່າງຈາກຈະຕຸລັດ Tahrir ໄປ 4-5 ຄູຫາ ຫລື block. ພວກປະທ້ວງບາງຄົນພາກັນນອນຢູ່ຕາມເດີ່ນ ຫວັງວ່າຈະຕັນທາງເຂົ້າຫາຕຶກສະພານັ້ນ. ພວກເຂົາເຈົ້າຮຽກ ຮ້ອງໃຫ້ສະມາຊິກສະພາທີ່ຖືກເລືອກຕັ້ງໃນທ້າຍປີແລ້ວນີ້ລາອອກ ໂດຍອ້າງວ່າ ເປັນການ ເລືອກຕັ້ງທີ່ມີການສໍ້ໂກງ ເພື່ອໃຫ້ພວກສະມາຊິກພັກລັດຖະບານໄດ້ຮັບໄຊຊະນະນັ້ນ.
