ບັນດາກຸ່ມຝ່າຍຄ້ານຂອງອີຈິບ ກ່າວວ່າ ການພົບປະກັນທີ່ບໍ່ເຄີຍມີມາກ່ອນກັບລັດຖະບານ ໃນວັນອາທິດວານນີ້ ໄດ້ປະສົບກັບຄວາມລົ້ມແຫລວ ແລະບໍ່ໄດ້ຕອບສະໜອງຄວາມ
ຮຽກຮ້ອງຕ້ອງການທີ່ສໍາຄັນຂອງພວກຕົນ ທີ່ຢາກໃຫ້ປະທາ
ນາທິບໍດີ Hosni Mubarak ລາອອກຈາກຕໍາແໜ່ງໂດຍ
ທັນທີ ຫລັງຈາກຄອງອໍານາດມາໄດ້ເກືອບ 30 ປີນັ້ນ.
ກຸ່ມພະລາດອນພາບມຸສລິມແລະກຸ່ມຝ່າຍຄ້ານອື່ນໆຂອງອີຈິບ ກ່າວວ່າການຍິນຍອມຕ່າງໆທີ່ຮອງປະທານາທິບໍດີ Omar Suleiman ສະເໜີຕໍ່ເຂົາເຈົ້າໃນການໂອ້ລົມສົນທະນາກັນໃນວັນອາທິດວານນີ້ ແມ່ນບໍ່ພຽງພໍ ແຕ່ກໍໄດ້ເປັນບາດກ້າວທໍາອິດໃນການໂອ້ລົມສົນທະນາກັນ. ບໍ່ເປັນທີ່ຈະເເຈ້ງເທື່ອວ່າ ເວລາໃດທາງລັດຖະບານແລະພວກຜູ້ຕາງໜ້າກຸ່ມຝ່າຍຄ້ານຈະພົບປະກັນອີກ.
ລັດຖະບານອີຈິບກ່າວວ່າ ທ່ານ Suleiman ໄດ້ຕົກລົງທີ່ຈະຈັດຕັ້ງຄະນະກໍາມະການນຶ່ງຂຶ້ນ
ມາ ທີ່ຈະປະກອບດ້ວຍບຸກຄົນສໍາຄັນໃນດ້ານຕຸລາການແລະການເມືອງ ເພື່ອສຶກສາເບິ່ງການປະຕິຮູບກົດໝາຍລັດຖະທໍາມະນູນຂອງຊາດ ທີ່ຈະອະນຸມັດໃຫ້ມີຜູ້ສະໝັກເລືອກຕັ້ງຈໍານວນຫລາຍຂຶ້ນ ເຂົ້າແຂ່ງຂັນກັນໃນການເລືອກຕັ້ງປະທານາທິບໍດີນັ້ນ. ລັດຖະບານກ່າວຕື່ມວ່າ ຄະນະກໍາມະການທີ່ວ່ານີ້ຈະຖືກບັງຄັບໃຫ້ເສັດສິ້ນການສຶກສາຄົ້ນຄວ້າດັ່ງກ່າວນີ້ພາຍໃນອາທິດທໍາອິດຂອງເດືອນມິີນາໜ້ານີ້.
ລັດຖະບານໄດ້ຕົກລົງທໍາການໂອ້ລົມສົນທະນາກັນກັບຝ່າຍຄ້ານ ເພື່ອຕອບສະໜອງຕໍ່ການປະທ້ວງໃນທົ່ວປະເທດ ທີ່ໄດ້ເລີ້ມຂຶ້ນໃນທ້າຍເດືອນແລ້ວນີ້ ຕໍ່ຕ້ານການປົກຄອງແບບຜະເດັດການຂອງທ່ານ Mubarak ນັ້ນ.
ພວກນັກເຄື່ອນໄຫວຕໍ່ຕ້ານລັດຖະບານຫລາຍພັນຄົນໄດ້ໂຮມຊຸມນຸມປະທ້ວງເປັນມື້ທີ 14 ໃນວັນຈັນມື້ນີ້ ທີ່ຈະຕຸລັດ Tahrir ໃນໃຈກາງກຸງໄຄໂຣ ເພື່ອຮຽກຮ້ອງໃຫ້ທ່ານ Mubarak ລາອອກຈາກຕໍາແໜ່ງ ໂດຍບໍ່ຍອມຮັບເອົາຄໍາຮຽກຮ້ອງຂອງລັດຖະບານແລະທະຫານ ທີ່ໃຫ້ພາກັນຢຸດເຊົາປະທ້ວງນັ້ນ.
ພວກນັກເຄື່ອນໄຫວຫລາຍຄົນພາກັນນອນຄ້າງຄືນໃນຈະຕຸລັດ ໂດຍພາກັນປຸກຄ້າຍຜ້າຕັ້ງຂຶ້ນ.
